ലോകത്ത് പണ്ടുമുതലേ സെല്‍ഫി ഉണ്ടായിരുന്നെങ്കിലും സ്മാര്‍ട്ട് ഫോണുകളുടെ അതിപ്രസരത്തോടെയാണ് നമ്മുടെ നാട്ടിലും സെല്‍ഫി പ്രേമം ഉണ്ടായത്. പണ്ടൊക്കെ ഒരു ഫോട്ടോയെടുത്ത് ഫിലിം വാഷ് ചെയ്ത് ചില്ലിട്ട് ഫ്രെയിം ചെയ്ത് വീട്ടില്‍ സൂക്ഷിക്കുക പതിവായിരുന്നു. പക്ഷെ അതിന് കാശും കൂടുതലായിരുന്നു. അതിനാല്‍ തന്നെ അപൂര്‍വവുമായിരുന്നു. അന്നൊക്കെ ഫോട്ടോഗ്രാഫര്‍മാരായിരുന്നു സമൂഹത്തിലെ താരം. അവരുടെ ഗമയും സ്റ്റൈലും ഒന്നു വേറെ തന്നെ. അവരുടെ ഗമ കണ്ടിട്ടാണോയെന്തോ ദൈവം എല്ലാവരുടെ കൈയ്യിലും ഓരോ ക്യാമറ നല്‍കിയത്. ഇന്നാകട്ടെ എല്ലാവരും ഫോട്ടോഗ്രാഫര്‍മാരാണ്. എല്ലാവരുടെ കൈയ്യിലും അന്നേരം ഫോട്ടോയെടുത്ത് ഗ്ലാമര്‍ കൂട്ടാന്‍ പറ്റുന്ന സ്മാര്‍ട്ട് ഫോണുണ്ട്. പ്രൊഫഷണല്‍ ഫോട്ടോഗ്രാഫര്‍മാരെ വെല്ലുന്ന ഫോട്ടോകളാണ് ഓരോരുത്തരും എടുക്കുന്നത്. മാത്രമല്ല ഫോട്ടോയെടുത്ത് ചില്ലിട്ട് വച്ച് വീട്ടില്‍ വരുന്നവരെ മാത്രം കാണിക്കേണ്ട. ഈ ലോകം മൊത്തം കണ്ടോളും. ചിരിക്കാന്‍ വക നല്‍കുന്ന കമന്റും കിട്ടി സായൂജ്യമടയാം. ഭാഗ്യമുണ്ടങ്കില്‍ വൈറലുമാകും. അതുവഴി വീട്ടുകാരും അറിഞ്ഞോളും.

സെല്‍ഫിയുടെ കഥ ഇങ്ങനെ നടക്കുമ്പോള്‍ എങ്ങനെ വെറൈറ്റി സെല്‍ഫിയെടുത്ത് മറ്റുള്ളവരില്‍ അസൂയ ഉളവാക്കുമെന്നുള്ള ചിന്തയുള്ളവരും കുറവല്ല. അവരുടെ മനോനില പലപ്പോഴും എത്തിക്കുന്നത് അത്യാപത്തിലേക്കാണ്. പിന്നീടൊരിക്കലും സെല്‍ഫി എടുക്കാന്‍ പറ്റാത്ത അവസ്ഥയിലേക്കാണ് അവരെ എത്തിക്കുന്നത്. നിരവധി ദുരന്തങ്ങളാണ് സെല്‍ഫി കാരണം ഉണ്ടായിട്ടുള്ളത്. അടുത്തിടെ പതിനേഴാം നിലയിലെ അപ്പാര്‍ട്ട്‌മെന്റിലെ ബാല്‍ക്കണിയില്‍ നിന്നും സെല്‍ഫിയെടുക്കാന്‍ ശ്രമിച്ച 16 കാരി പെണ്‍കുട്ടിക്ക് ദാരുണാന്ത്യം സംഭവിച്ചത് ഏറെ ശ്രദ്ധ നേടിയുന്നു. ദുബായിലെ ഷേഖ് സയീദ് റോഡിലെ അപ്പാര്‍ട്ട്‌മെന്റിലാണ് സംഭവം നടന്നത്. കസേരയില്‍ കയറി നിന്നായിരുന്നു പെണ്‍കുട്ടി സെല്‍ഫിക്ക് ശ്രമിച്ചത്. കസേര വഴുതിയപ്പോള്‍ പെണ്‍കുട്ടിക്ക് നിലതെറ്റി, ഇവര്‍ താഴേക്ക് പതിക്കുകയും ചെയ്യുകയായിരുന്നു. പെണ്‍കുട്ടിയുടെ സഹോദരി സംഭവത്തിന്റെ ദൃക്‌സാക്ഷിയായ നടുക്കുന്ന വാര്‍ത്തയാണ് കേട്ടത്.

അതിന്റെ ഞെട്ടല്‍ മാറും മുമ്പ് വീണ്ടും ജീവന്‍ എടുത്ത് സെല്‍ഫി എത്തിയിരിക്കുകയാണ്. കിണറിന്റെ പടിയില്‍ നിന്ന് സെല്‍ഫി എടുക്കാന്‍ ശ്രമിക്കവെ കിണറ്റിലേയ്ക്ക് വീണ് 24 കാരിക്കാണ് ദാരുണാന്ത്യമുണ്ടായത്. പ്രതിശ്രുതവരനൊപ്പം സെല്‍ഫി എടുക്കാന്‍ ശ്രമിക്കുന്നതിനിടെയാണ് അപകടം സംഭവിച്ചത്. ചെന്നൈ പട്ടാഭിറാം ഗാന്ധിനഗറില്‍ താമസിക്കുന്ന മേഴ്‌സി സ്‌റ്റെഫി ആണ് മരിച്ചത്. മേഴ്‌സിയെ രക്ഷിക്കാന്‍ ശ്രമിക്കുന്നതിനിടെ പ്രതിശ്രുത വരന്‍ 24 കാരനായ അപ്പുവും കിണറ്റിലേയ്ക്ക് വീണു.

ജനുവരിയില്‍ വിവാഹം നടക്കാനിരുന്ന ഇവര്‍ ഒരുമിച്ച് സ്ഥലങ്ങള്‍ സന്ദര്‍ശിക്കുന്നത് പതിവായിരുന്നു. കഴിഞ്ഞദിവസം വൈകീട്ട് ബൈക്കുമായെത്തിയ അപ്പു മേഴ്‌സിയുമൊത്ത് പുറത്തേക്കുപോയി. വണ്ടല്ലൂര്‍ മിഞ്ചൂര്‍ നാലുവരിപ്പാതയില്‍ വഴിയരികിലെ കൃഷിത്തോട്ടം കണ്ട മേഴ്‌സി ഫോട്ടോയെടുക്കാനായി ബൈക്ക് നിര്‍ത്താനാവശ്യപ്പെട്ടു. അവിടെയുണ്ടായിരുന്ന കിണറിന്റെ ഉള്ളിലേക്കിറങ്ങുന്ന പടിക്കെട്ടിലിരുന്ന് ഇരുവരും ചിത്രങ്ങളെടുത്തു. ഇതിന്റെ ഇടയിലാണ് മേഴ്‌സി കിണറ്റിലേയ്ക്ക് വീണത്.

രക്ഷിക്കാനായി കൈനല്‍കിയപ്പോഴാണ് അപ്പുവും കിണറ്റിലേയ്ക്ക് വീണത്. ഇതിനകം മേഴ്‌സി വെള്ളത്തില്‍ മുങ്ങിത്താണിരുന്നു. നിലവിളി കേട്ടെത്തിയ കൃഷിക്കാര്‍ വെള്ളത്തില്‍നിന്ന് അപ്പുവിനെ രക്ഷിച്ച് കരയ്‌ക്കെത്തിച്ചു. എന്നാല്‍ മേഴ്‌സിയെ കണ്ടെത്താനായില്ല. തുടര്‍ന്ന് അഗ്‌നിരക്ഷാസേന എത്തിയാണ് മേഴ്‌സിയുടെ മൃതദേഹം കണ്ടെടുത്തത്. അപ്പു ഇപ്പോള്‍ ഗുരുതരാവസ്ഥയില്‍ ആശുപത്രിയില്‍ ചികിത്സയിലാണ്.

ജനുവരിയിലെ ഇവരുടെ വിവാഹത്തിനുള്ള ഒരുക്കങ്ങള്‍ ഇപ്പോഴേ തുടങ്ങിയിരുന്നു. പന്തല്‍ ഒരുക്കേണ്ട മുറ്റത്ത് വിവാഹത്തില്‍ പങ്കെടുക്കേണ്ട ബന്ധുക്കള്‍ നിറകണ്ണുകളോടെയാണ് യുവതിയ്ക്ക് അന്ത്യയാത്ര നല്‍കിയത്. ഒരു സെല്‍ഫിയുണ്ടാക്കിയ വിനയേ...