കടുത്ത വയറുവേദനയെ തുടര്‍ന്ന് ഗര്‍ഭിണിയായ 28കാരി ആശുപത്രിയിലേക്കുള്ള യാത്രയ്ക്കിടെ ഓട്ടോറിക്ഷയില്‍ പ്രസവിച്ചു. ആംബുലന്‍സ് ലഭ്യമാകാത്തതിനെ തുടര്‍ന്ന് യുവതി ഓട്ടോറിക്ഷയില്‍ ആശുപത്രിയിലേക്കുള്ള യാത്രയ്ക്കിടെ പ്രസവിച്ച നാലുകുട്ടികളും മരിച്ചു. മദ്ധ്യപ്രദേശിലെ മാണ്ട്‌ല ജില്ലയിലെ ബിച്ചിയ ബ്ലോക്കിന് കീഴിലുള്ള നൈഗന്‍വ ഗ്രാമത്തില്‍ ഇന്നലെയാണ് സംഭവം നടന്നത്.

രജനി സിംഗ്രാം എന്ന 28 കാരിയുടെ കുട്ടികളാണ് പ്രസവത്തിന് പിന്നാലെ മരണപ്പെട്ടത്. കടുത്ത വയറുവേദന അനുഭവപ്പെട്ടതിനെത്തുടര്‍ന്ന് എത്രയും വേഗം യുവതിയെ ആശുപത്രിയില്‍ എത്തിക്കാനായി ബന്ധുക്കള്‍ സര്‍ക്കാര്‍ ആംബുലന്‍സിനെ ബന്ധപ്പെട്ടെങ്കിലും ലഭിച്ചില്ല. ഇതോടെയാണ് ബന്ധുക്കള്‍ ഓട്ടോറിക്ഷ വിളിച്ച് യുവതിയുമായി ഘുട്ടാസ് പ്രാഥമികാരോഗ്യ കേന്ദ്രത്തിലേക്ക് തിരിച്ചത്.

പ്രാഥമിക ചികിത്സയ്ക്ക് ശേഷം യുവതിയെ ബിച്ചിയയിലെ കമ്മ്യൂണിറ്റി ഹെല്‍ത്ത് സെന്ററിലേയ്ക്ക് എത്തിക്കാന്‍ ഡോക്ടര്‍മാര്‍ നിര്‍ദേശം നല്‍കുകയായിരുന്നു. ആശുപത്രിയിലേക്കുള്ള യാത്രയ്ക്കിടെ യുവതി ഓട്ടോറിക്ഷയ്ക്കുള്ളില്‍വച്ച് തന്നെ കുട്ടികള്‍ക്ക് ജന്മം നല്‍കുകയായിരുന്നു. മൂന്ന് ആണ്‍കുട്ടികള്‍ക്കും ഒരു പെണ്‍കുട്ടിയ്ക്കുമാണ് യുവതി ജന്മം നല്‍കിയത്.

കൃത്യമായ വൈദ്യസഹായം ലഭിക്കാത്തതിനെ തുടര്‍ന്ന് കുട്ടികളുടെ ആരോഗ്യനില വഷളാവുകയും നാല് പേരും മരണപ്പെടുകയുമായിരുന്നു എന്ന് കുടുംബം പറഞ്ഞു. ആംബുലന്‍സ് ലഭിക്കാത്തതും അടിയന്തരമായി ചികിത്സ ലഭിക്കാത്തതുമാണ് കുട്ടികള്‍ മരിക്കാന്‍ കാരണമെന്നാണ് കുടുംബത്തിന്റെ ആരോപണം.

എന്നാല്‍ യുവതി ഏകദേശം 30 ആഴ്ച ഗര്‍ഭിണിയായിരുന്നുവെന്നും കുഞ്ഞുങ്ങള്‍ മാസം തികയാതെയാണ് ജനിച്ചതെന്നും ബിച്ചിയ ബ്ലോക്ക് മെഡിക്കല്‍ ഓഫീസര്‍ ഡോ. അനൂപ് കുമാര്‍ ഭാരതി പറഞ്ഞു. നിലവില്‍ യുവതിയുടെ ആരോഗ്യനില തൃപ്തികരമാണെന്നാണ് വിവരം.