ഒറ്റദിവസത്തിനിടെ തൃശൂര്‍ ജില്ലയില്‍ നിന്ന് കാണാതായ ആറ് പെണ്‍കുട്ടികളെയും പോലീസ് കണ്ടെത്തി. സമൂഹമാധ്യമങ്ങളിലൂടെ പരിചയപ്പെട്ടവര്‍ക്കൊപ്പമാണ് നാല് പെണ്‍കുട്ടികള്‍ പോയതെന്ന് പോലീസ് പറയുന്നു. തൃശൂര്‍ വെസ്റ്റ് പോലീസ് സ്‌റ്റേഷനില്‍ റജിസ്റ്റര്‍ ചെയ്ത ഒരു കേസില്‍ മാത്രം കുട്ടിയ്ക്കു പ്രായപൂര്‍ത്തിയായിട്ടില്ല. ഈ കുട്ടിയാകട്ടെ കുടുംബപ്രശ്‌നങ്ങള്‍ കാരണം വീടുവിട്ടുപോയതാണ്. ചാലക്കുടിയിലെ പെണ്‍കുട്ടി മാത്രം അയല്‍വാസിയ്‌ക്കൊപ്പമാണ് പോയത്. ഇരുപത്തിനാലു മണിക്കൂറിനിടെ പെണ്‍കുട്ടികളെ കാണാതായതിന് ആറ് കേസുകള്‍ റജിസ്റ്റര്‍ ചെയ്തിരുന്നു.

സാമുഹിക മാധ്യമങ്ങളിലൂടെ പരിചയപ്പെട്ട് പ്രണയത്തിലായവരാണ് കൂടുതലും. കോളജ് വിദ്യാര്‍ഥികളാണ് ഭൂരിഭാഗം പേരും. ഓരോ മാസവും പെണ്‍കുട്ടികളെ കാണാതായതിന് സ്‌റ്റേഷനുകളില്‍ റജിസ്റ്റര്‍ ചെയ്യുന്ന കേസുകള്‍ കൂടിയിട്ടുണ്ട്. പ്രായപൂര്‍ത്തിയായ പെണ്‍കുട്ടികളെ കണ്ടെത്തിയ വിവരം വീട്ടുകാരെ അറിയിക്കുക മാത്രമാണ് പോലീസിന് നിയമപരമായി ചെയ്യാന്‍ കഴിയുന്നത്. രക്ഷിതാക്കള്‍ ജാഗ്രത പാലിക്കണമെന്ന് പോലീസ് പറയുന്നു. പുതുക്കാട്, മാള, പാവറട്ടി, ചാലക്കുടി, വടക്കാഞ്ചേരി, അയ്യന്തോള്‍ സ്‌റ്റേഷനുകളിലാണ് ഈ കേസുകള്‍ റജിസ്റ്റര്‍ ചെയ്തിട്ടുള്ളത്. സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തിലാണ് പെണ്‍കുട്ടികളെ കണ്ടെത്താന്‍ കഴിഞ്ഞത്.

സമൂഹമാധ്യമങ്ങളിലൂടെ പരിചയപ്പെടുന്നവരുമായി ഇറങ്ങിപ്പോകുന്ന സ്ത്രീകളുടെയും പെണ്‍കുട്ടികളുടെയും എണ്ണം സംസ്ഥാനത്ത് വര്‍ദ്ധിച്ചുവരുകയാണ്. കഴിഞ്ഞ രണ്ടാഴ്ചയ്ക്കിടെ തിരുവനന്തപുരത്ത് യുവതികളായ വീട്ടമ്മമാര്‍ മക്കളെ ഉപേക്ഷിച്ച് സമൂഹമാധ്യമങ്ങളിലൂടെ പരിചയപ്പെട്ട യുവാക്കളുമായി ഒളിച്ചോടിയിരുന്നു. ഇതില്‍ നെയ്യാറ്റിന്‍കര സ്വദേശിനി മകളെ നേമം ബസ്‌റ്റോപ്പില്‍ ഉപേക്ഷിച്ചിട്ടാണ് മുങ്ങിയത്. കോട്ടയത്തുള്ള കാമുകന്റെ വീട്ടില്‍ നിന്നാണ് യുവതിയെ പൊലീസ് അറസ്റ്റ് ചെയ്തത്. യുവതിയേയും കാമുകനേയും പൊലീസ് അറസ്റ്റ് ചെയ്ത് റിമാന്‍ഡിലാക്കി. ബാലാവകാശ നിയമപ്രകാരം കുട്ടികളെ സംരക്ഷിച്ചില്ലെന്ന വകുപ്പ് ചുമത്തിയാണ് ഇരുവരെയും അറസ്റ്റ് ചെയ്തത്.

മക്കളെ ഉപേക്ഷിച്ച് കാമുകനൊപ്പം പോയ കാട്ടാക്കട കോട്ടാകുഴി സ്വദേശി അഞ്ജുവിനെയും കാമുകന്‍ രാജേഷിനെയും ജുവനയില്‍ ജസ്റ്റിസ് ആക്ട് പ്രകാരം അറസ്റ്റ് ചെയ്ത് ഇന്നലെ റിമാന്‍ഡിലാക്കി. അഞ്ജുവിന്റെ ആദ്യ വിവാഹത്തില്‍ 13 വയസ്സുള്ള മകനും രണ്ടാം വിവാഹത്തില്‍ ഒന്‍പത് വയസ്സുള്ള മകളുമുണ്ട്. ഭര്‍ത്താവിന്റെ പരാതിയെ തുടര്‍ന്നാണ് കേസ് എടുത്തത്.