വട്ടിയൂര്‍ക്കാവിലെ വമ്പന്‍ വിജയത്തിന് പിന്നാലെ എംഎൽഎ വികെ പ്രശാന്തിനെ വെട്ടി നിരത്തി പാര്‍ട്ടി. തിരുവനന്തപുരം സര്‍ക്കിൾ സഹകരണ യൂണിയന്റെ സഹകരണ വാരാഘോഷ പരിപാടിയിലെ ഉദ്ഘാടക സ്ഥാനത്ത് നിന്നാണ് അവസാന നിമിഷം വികെ പ്രശാന്തിനെ ഇത്തരത്തിൽ ഒഴിവാക്കിയത്. വികെ പ്രശാന്തിന് പകരം കാട്ടാക്കട എംഎൽഎ ഐബി സതീഷിനെയാണ് താലൂക്ക് തല ഉദ്ഘാടകനായി എത്തിച്ചത്.

സി.പി.ഐ.എമ്മിന് മേല്‍കൈയുള്ള സര്‍ക്കിള്‍ സഹകരണ യൂണിയനില്‍ അവസാന നിമിഷം ഉദ്ഘാടകനെ മാറ്റാന്‍ കാരണം പാര്‍ട്ടി ജില്ലാ നേതൃത്വത്തിന്റെ ഇടപെടലാണെന്നാണ് സൂചന. ഉദ്ഘാടകൻ മാറിയ സാഹചര്യത്തിൽ ആദ്യമിറക്കിയ നോട്ടീസ് അടക്കം സംഘാടകര്‍ മാറ്റി ഇറക്കിയിരുന്നു. മന്ത്രി കടകംപള്ളി സുരേന്ദ്രന്‍ ഭരിക്കുന്ന സഹകരണ വകുപ്പിലാണ് നടപടിയെന്നത് ചര്‍ച്ചയായിട്ടുണ്ട്. എന്നാൽ വികെ പ്രശാന്തിന് മണ്ഡല പര്യടനത്തിന്റെ തിരക്കായതിനാലാണ് അവസാന നിമിഷം ഉദ്ഘാടകനെ മാറ്റിയതെന്നാണ് സംഘാടകരുടെ വിശദീകരണം.