കുരുക്ക് മുറുകുന്ന വഴി... ശ്രീകുമാര് മേനോന് ഭിഷണിപ്പെടുത്തിയെന്ന കേസില് നിന്നും അണുകിട പിന്നോട്ട് പോകാതെ മഞ്ജുവാര്യര്; ഒടിയന് സെറ്റിലുണ്ടായ സംഭവ വികാസങ്ങള് കേസില് നിര്ണായകമായും; ഒടിയന് സെറ്റിലുള്ളവരെ വിളിച്ചു വരുത്താന് പോലീസ് നീക്കം
മഞ്ജുവാര്യരും സംവിധായകന് ശ്രീകുമാര് മേനോനും തമ്മിലുള്ള കേസ് ക്ലൈമാക്സിലേക്ക് നീങ്ങുകയാണ്. ശ്രീകുമാര് മേനോന് ഭീഷണിപ്പെടുത്തുന്നുവെന്ന നടി മഞ്ജു വാര്യരുടെ പരാതിയില് ക്രൈംബ്രാഞ്ച് സാക്ഷികളുടെ മൊഴിയെടുക്കല് തുടരുന്നു. ഒടിയന് സിനിമയുടെ സെറ്റിലുണ്ടായിരുന്ന എല്ലാവരെയും വിളിച്ചുവരുത്തി മൊഴിയെടുക്കാനാണു നീക്കം. സെറ്റില് കേക്ക് മുറിക്കുന്നതിനിടെ ശ്രീകുമാര് മേനോന് കയര്ത്തു സംസാരിക്കുകയും മോശമായി പെരുമാറുകയും ചെയ്തുവെന്നതാണ് പ്രധാന പരാതി. സെറ്റില് കേക്ക് മുറിച്ചപ്പോഴുണ്ടായിരുന്ന എല്ലാവരില്നിന്നും മൊഴിയെടുക്കും.
നിര്മാതാവ് ആന്റണി പെരുമ്പാവൂര്, പ്രൊഡക്ഷന് കണ്േട്രാളര് സജി സി. ജോസഫ്, മഞ്ജു വാരിയരുടെ ഓഡിറ്റര്, മഞ്ജു ഫാന്സ് അസോസിയേഷന് സെക്രട്ടറി രേഖ തുടങ്ങിയവരില്നിന്നു മൊഴിയെടുത്തു. കൂടുതല് പേരില്നിന്ന് മൊഴിയും തെളിവുമെടുത്ത ശേഷമായിരിക്കും തുടര്നടപടികളിലേക്കു കടക്കുകയെന്ന് അന്വേഷണസംഘം അറിയിച്ചു.
ജാമ്യമുള്ള വകുപ്പുകള് പ്രകാരമാണ് ശ്രീകുമാര് മേനോന് എതിരെ പൊലീസ് കേസെടുത്തിരിക്കുന്നത് എന്നത് മാത്രമാണ് ആശ്വാസം. മൊഴി എടുത്ത ശേഷം ശ്രീകുമാര് മേനോനില് നിന്ന് തെളിവെടുക്കും. കേസില് ഇടപെടാന് താര സംഘടനയായ അമ്മയും സാങ്കേതിക പ്രവര്ത്തകരുടെ സംഘടനയായ ഫെഫ്കയും വിസമ്മതം അറിയിച്ചിരുന്നു. ഇതോടെയാണ് നിയമ നടപടികളുമായി പൊലീസ് മുന്നോട്ട് പോയത്.
സമൂഹമാധ്യമങ്ങളിലൂടെ ശ്രീകുമാര് മേനോന് തനിക്കെതിരെ ദുഷ്പ്രചാരണം നടത്തിയെന്നും താന് മോശക്കാരിയാണെന്ന് വരുത്തിത്തീര്ക്കാന് ശ്രമിച്ചുവെന്നുമാണ് മഞ്ജു വാര്യര് ശ്രീകുമാര് മേനോനെതിരെ മൊഴി നല്കിയിരിക്കുന്നത്. തൃശ്ശൂര് ക്രൈം ബ്രാഞ്ച് എസ് പി സി ഡി ശ്രീനിവാസനായിരുന്നു മഞ്ജു വാര്യരുടെ മൊഴി രേഖപ്പെടുത്തിയത്. തന്നെ ശ്രീകുമാര് മേനോന് അപകടത്തില്പ്പെടുത്തുമെന്ന് ഭയമുണ്ടെന്നും മഞ്ജു വാര്യര് അന്വേഷണസംഘത്തെ അറിയിച്ചിരുന്നു. ഒടിയന് സിനിമയ്ക്ക് ശേഷം താന് നേരിട്ട സൈബര് ആക്രമണത്തിന് പിന്നില് ശ്രീകുമാര് മേനോനാണെന്നാണ് മഞ്ജുവിന്റെ പരാതി. എന്നാല് ആരോപണങ്ങള് നിഷേധിച്ച ശ്രീകുമാര് മേനോന് അന്വേഷണത്തോട് സഹകരിക്കുമെന്ന് വ്യക്തമാക്കിയിരുന്നു. തന്നെ സഹായിച്ചവരെ മറക്കുന്നതാണ് മഞ്ജുവിന്റെ സ്വഭാവം എന്നതുള്പ്പെടെയുള്ള പ്രത്യാരോപണങ്ങളാണ് ശ്രീകുമാര് മേനോന് പോസ്റ്റില് ഉയര്ത്തിയത്.
മഞ്ജുവാര്യര് ചാവക്കാട് കോടതി മജിസ്ട്രേറ്റ് മുമ്പാകെ 164ാം നിയമ പ്രകാരം കേസില് രഹസ്യമൊഴി നല്കിയിരുന്നു. കോടതിയിലെത്തിയ മഞ്ജുവില് നിന്നും അടച്ചിട്ട കോടതിയിലാണ് മൊഴിയെടുത്തത്. ക്രൈംബ്രാഞ്ച് മഞ്ജുവിന്റെ പുള്ളിലെ വീട്ടിലെത്തിയും തൃശൂരില് ആസ്ഥാനത്തേക്ക് വിളിച്ചു വരുത്തിയും മൊഴിയെടുത്തിരുന്നു. ഇതില് ഡിജിറ്റല് തെളിവുകളുള്പ്പെടെ അന്വേഷക സംഘത്തിന് കൈമാറിയിരുന്നു.
2017 മുതല് കരിയറിനേയും, സ്ത്രീത്വത്തേയും നിരന്തരം അപമാനിക്കുകയും, സമൂഹമാധ്യമങ്ങളിലും, ഒടിയന് ഷൂട്ടിങ് സൈറ്റുകളിലും നിരന്തരം തേജോവധം ചെയ്യുകയും ചെയ്തതുമടക്കം ഗുരുതര ആരോപണങ്ങളാണ് പരാതിയിലുള്ളത്. ശ്രീകുമാര് മേനോന്റെ പേരിലുള്ള പുഷ് കമ്പനി വഴി 2013ല് കരാറിലേര്പ്പെട്ട് പരസ്യചിത്രങ്ങളില് അഭിനയിക്കുകയും മഞ്ജുവാര്യര് ഫൗണ്ടേഷന്റെയും ചാരിറ്റി പ്രവര്ത്തനത്തിന്റെയും മേല്നോട്ടവും നല്കിയിരുന്നു. 2017 ല് കരാര് റദ്ദാക്കിയതിന്റെ വിദ്വേഷത്തില് വിവിധ മാനഹാനിയും ഭീഷണിയും ചെയ്ത് വരികയാണെന്നതടക്കമാണ് പരാതിയിലുള്ളത്.
ശ്രീകുമാര് മേനോന് സംവിധാനം ചെയ്ത ഒടിയന് എന്ന സിനിമയില് മഞ്ജു വാര്യര് ആയിരുന്നു നായിക. നടിയെ ആക്രമിച്ച കേസില് ദിലീപ് കുടുങ്ങിയപ്പോള് നല്കിയ ജാമ്യ ഹര്ജിയിലും ശ്രീകുമാര് മേനോനെതിരെ പരാമര്ശമുണ്ടായിരുന്നു. ഇതിനിടെയാണ് ഒടിയന് സിനിമ തുടങ്ങുന്നത്. ഇതെല്ലാം മുന്നില് കണ്ടാണ് ഒടിയന് സെറ്റിലെ മുഴുവന് പേരേയും ചോദ്യം ചെയ്യുന്നത്.
https://www.facebook.com/Malayalivartha