മാടത്തരുവി വെള്ളച്ചാട്ടത്തിനു സമീപം കുടുങ്ങിയ 4 പേരെ അഗ്നിശമന സേന സാഹസികമായി രക്ഷപ്പെടുത്തി
കോഴഞ്ചേരിയ്ക്കടുത്ത് മാടത്തരുവി വെള്ളച്ചാട്ടത്തിന് സമീപം ഇന്നലെ വൈകുന്നേരം നാലുപേര് പെട്ടുപോയി. കോഴഞ്ചേരിയില് ഒരു വിവാഹനിശ്ചയത്തിന് എത്തിയ സംഘത്തിലെ 25 വയസോളം പ്രായമുള്ള ആറംഗസംഘത്തിലെ നാലുപോരായിരുന്നു അവര്. കൂട്ടത്തില് ഒരു അധ്യാപകനും ഉണ്ടായിരുന്നു. ആറംഗസംഘത്തിലെ ഒരു യുവാവ് അവിടുത്തെ നാട്ടുകാരനാണ്. അയാളാണ് മാടത്തരുവി വെള്ളച്ചാട്ടത്തെക്കുറിച്ച് ഇവരോട് പറയുന്നത്. ഇതുപ്രകാരം ചടങ്ങിന് ശേഷം മാടത്തരുവി വെള്ളച്ചാട്ടം കാണാനും കുളിക്കാനും വേണ്ടിയാണു ഇവര് അരുവിയില് എത്തിയത്.
ഇന്നലെ വൈകിട്ടു പെയ്ത മഴയ്ക്ക് മുന്പ് എത്തിയ ഇവര് പാറപ്പുറത്തു കൂടി മറുകര കടന്നു. പിന്നാലെ ശക്തമായ മഴ പെയ്തു. ഇതോടെ അരുവിയില് ജലനിരപ്പു കൂടി. വഴുക്കലുള്ള പാറയിലൂടെ ഇവര്ക്ക് എതിര് ദിശയില് എത്താന് കഴിയാതെ വന്നു. കൂട്ടത്തിലുള്ള രണ്ടുപേര് എങ്ങനെയൊക്കെയോ അപ്പുറത്ത് എത്തി. ബാക്കി നാലുപേര്ക്ക് എത്താന് സാധിച്ചില്ല.
അപ്പുറത്ത് എത്തിയ രണ്ടുപേര് ആദ്യം പൊലീസ് കണ്ട്രോള് റൂമിലാണ് വിവരം അറിയിച്ചത്. അവരാണ് അഗ്നിശമന സേനയെ വിവരം അറിയിച്ചത്. ഇന്നലെ വൈകുന്നേരം ഏകദേശം ആറര മണിയോടെയാണ് റാന്നി അഗ്നിശമന സേനയുടെ ഓഫീസിലേക്ക് കോള് വന്നത്. നാലുപേര് മാടത്തരുവി വെള്ളച്ചാട്ടത്തിന് സമീപം കുടുങ്ങി കിടക്കുന്നെന്നായിരുന്നു അറിയിപ്പ്. കനത്തമഴ പോലും വകവയ്ക്കാതെ അഗ്നിശമനസേന തല്ക്ഷണം മാടത്തരുവിയിലേക്ക് പാഞ്ഞു. പ്രധാനറോഡില് നിന്നും ഒരാള്ക്ക് കഷ്ടിച്ച് നടക്കാന് സാധിക്കുന്ന ഒറ്റയടിപാതയിലൂടെയാണ് വെള്ളച്ചാട്ടത്തിലേക്ക് എത്തുന്ന വഴി. മലവെള്ളം പൊങ്ങിക്കൊണ്ടിരിക്കുന്നതിനിടെ നാലുപേര് വെള്ളച്ചാട്ടത്തിന്റെ അപ്പുറത്തുള്ള ഒരു പാറയില് പേടിച്ച് വിറച്ചിരിക്കുന്നതാണ് അവരെത്തിയപ്പോള് കണ്ടത്.
സേന അവിടെ എത്തുമ്പോഴേക്കും നല്ല ഇരുട്ടായി. മഴയുമുണ്ട്, വെള്ളവും പൊങ്ങിക്കോണ്ടിരിക്കുന്നു. ഒരു വിധത്തിലും അക്കരെ കടക്കാനാകാത്ത അവസ്ഥയായിരുന്നു. കുറച്ചുകൂടി പൊക്കത്തില് വെള്ളം കുറവുള്ള പ്രദേശത്തേക്ക് അഗ്നിശമനസേനയില് നിന്നുള്ള ആറംഗസംഘം ഇറങ്ങി. അവിടെ നിന്നും അക്കരെ ഇക്കരെ വടം വലിച്ച് കെട്ടി കൈകോര്ത്ത് പിടിച്ച് ഓരോരുത്തരെയായി മറുകര എത്തിക്കുകയായിരുന്നു. മലവെള്ളം പൊങ്ങിയത് കണ്ട് അവര് ഭയന്നിരുന്നു. ആദ്യം രക്ഷപെട്ട രണ്ടുപേര്ക്കൊപ്പം ഇവരും അവരുടെ പുറകേ അരുവി കടക്കാന് ശ്രമിച്ചിരുന്നെങ്കില് ജീവന് തന്നെ നഷ്ടമാകുമായിരുന്നു. നാട്ടുകാര്ക്ക് മാടത്തരുവിയുടെ രീതി അറിയാമായിരുന്നത് കൊണ്ട് അവരാരും രക്ഷാപ്രവര്ത്തനത്തിനുള്ള സാഹസം കാണിച്ചില്ല.
https://www.facebook.com/Malayalivartha