മിസ്റ്റര് വേള്ഡ് ചിത്തരേശ് നടേശന് സര്ക്കാരിന്റെ ആദരം, ദക്ഷിണകൊറിയയില് നടന്ന പതിനൊന്നാമത് ലോക ബോഡി ബില്ഡിംഗ് ചാമ്പ്യന്ഷിപ്പില് മിസ്റ്റര് വേള്ഡ് ചാമ്പ്യനായത്
എറണാകുളത്തെ ഒരു സാധാരണ ക്ഷീരകര്ഷക കുടുംബത്തില് ജനിച്ച ചിത്തരേശ് നടേശന് എന്ന ചെറുപ്പക്കാരന് ലോകത്തിന്റെ നെറുകയിലേക്ക് നടന്നു കയറിയത് കഠിനപരിശ്രമവും നിശ്ചയദാര്ഢ്യവും കൊണ്ടുമാത്രമാണെന്ന് സഹകരണ, ടൂറിസം, ദേവസ്വം മന്ത്രി കടകംപള്ളി സുരേന്ദ്രന്. ദക്ഷിണകൊറിയയില് നടന്ന പതിനൊന്നാമത് ലോക ബോഡി ബില്ഡിംഗ് ചാമ്പ്യന്ഷിപ്പില് മിസ്റ്റര് വേള്ഡ് ചാമ്പ്യനായ ചിത്തരേശ് നടേശന് സംസ്ഥാന യുവജനക്ഷേമ ബോര്ഡ് നല്കിയ സ്വീകരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. 90 കിലോ മത്സര വിഭാഗത്തിലാണ് ചിത്തരേശ് ലോക ചാമ്പ്യനായത്. ഓവറോള് കിരീടവും ലഭിച്ചു. അത് ചെറിയകാര്യമല്ലെന്നും മന്ത്രി പറഞ്ഞു.
ശരീരസൗന്ദര്യ സംരക്ഷണത്തിനായി ദിവസവും അഞ്ച് മണിക്കൂറാണ് ചിത്തരേശ് ചെലവഴിക്കുന്നത്. പകല് ജോലിക്ക് പോകും. ദിവസവും 40 മുട്ട കഴിക്കും ഒരു കിലോ ചിക്കനും. ഇങ്ങനെ ആഹാരം കഴിക്കാനുള്ള വരുമാനമുള്ള ജോലിയുണ്ടോ എന്ന് മന്ത്രി ചിത്തരേശിനോട് സ്വകാര്യമായി ചോദിച്ചു. ഇല്ലെന്നും കടംവാങ്ങിയും മറ്റുമാണ് ശരീരം സംരക്ഷിക്കുന്നതെന്ന് പറഞ്ഞു. അതിനാല് ചിത്തരേശിന് ജോലി ലഭിക്കുന്നതിന് സര്ക്കാര് അര്ഹമായ പരിഗണന നല്കുമെന്നും മന്ത്രി ഉറപ്പ് നല്കി. സര്ക്കാര് ഒരു വര്ഷം 50 കായിക താരങ്ങള്ക്ക് നിയമനം നല്കുന്നുണ്ട്. 201014 കാലത്ത് നിയമനങ്ങള് നടന്നില്ല. ഈ സര്ക്കാര് വന്ന ശേഷം 284 ഒഴിവുകള് നികത്താന് റാങ്ക് ലിസ്റ്റ് തയ്യാറായി. പി.എസ്.സിയില് കായിക താരങ്ങള്ക്ക് ഒരു ശതമാനം സംവരണം ഏര്പ്പെടുത്തി. 35ാമത് ദേശീയ ഗെയിംസില് സ്വര്ണമെഡല് നേടിയ 75 പേര്ക്ക് നിയമനം നല്കി. സന്തോഷ് ട്രോഫി കളിച്ച താരങ്ങള്ക്കും ഏഷ്യന് ഗെയിംസില് പങ്കെടുത്തവര്ക്കും ജോലി നല്കുമെന്നും മന്ത്രി അറിയിച്ചു.
തൈക്കാട് ഗവ. ആട്സ് കോളജില് നടന്ന ചടങ്ങില് യുവജനക്ഷേമ ബോര്ഡ് വൈസ് ചെയര്മാന് പി.ബിജു അധ്യക്ഷനായി. മെമ്പര് സെക്രട്ടറി മിനിമോള് എബ്രഹാം, അംഗം സന്തോഷ് കാല, സംസ്ഥാന ഒളിമ്പിക് അസോസിയേഷന് പ്രസിഡന്റ് സുനില്കുമാര്, കേരളാ യൂണിവേഴ്സിറ്റി സിന്ഡിക്കേറ്റ് അംഗം ബി. ബാലചന്ദ്രന്, ആട്സ് കോളജ് പ്രിന്സിപ്പല് ഉണ്ണികൃഷ്ണന് നായര്, എല്.എന്.സി.പി പ്രിന്സിപ്പല് ഡോ. ജി. കിഷോര്, ആട്സ് കോളജ് യൂണിയന് ചെയര്മാന് ആര് രോഹിത്, യുവജനക്ഷേമ ബോര്ഡ് ജില്ലാ പ്രോഗ്രാം ഓഫീസര് ചന്ദ്രികാ ദേവി എന്നിവര് സംസാരിച്ചു.
യുവജനക്ഷേമ ബോര്ഡ് ഡെപ്യൂട്ടി ഡയറക്ടര് സി.ആര് രാംകുമാര് സ്വാഗതം പറഞ്ഞു. ചിത്തരേശിന്റെ മാതാപിതാക്കളായ നടേശനും നിര്മലയും പങ്കെടുത്തു. ചടങ്ങില് യുവജനക്ഷേമ ബോര്ഡ് 25 വയസില് താഴെയുള്ള യുവതികള്ക്കായി ഡിസംബര് ഒന്പത് മുതല് 25 വരെ തലസ്ഥാനത്ത് നടത്തുന്ന കളരി പരിശീലനത്തിന്റെ രജിസ്ട്രേഷനുള്ള വെബ്സൈറ്റിന്റെ ഉദ്ഘാടനം വഴുതക്കാട് വിമന്സ് കോളജ് ചെയര്പേഴ്സണ് ഗായത്രി ഉദ്ഘാടനം ചെയ്തു.
https://www.facebook.com/Malayalivartha
