സർക്കാർ ജീവനകാർക്ക് ഡിസംബർ രണ്ടിന് ലഭിക്കേണ്ട ശമ്പളം മുടങ്ങുമെന്ന ആശങ്കയിൽ ട്രഷറി. ആയിരം രൂപയുടെ ഫോൺബിൽ പേലും അടയ്ക്കാനാവാത്ത അവസ്ഥയിലുള്ള സർക്കാർ കോടികണക്കിന് രൂപ ശമ്പളമായി എങ്ങനെ നൽകുമെന്ന ആശങ്കയിലാണ്. എന്നാൽ ശമ്പളത്തിനുള്ള പണം കൈവശമുണ്ടെന്നാണ് സർക്കാർ പറയുന്നത്. മുഖ്യമന്ത്രി അടക്കം മൂന്ന് മന്ത്രിമാർ വിദേശയാത്ര നടത്തുകയാണ്. ഒപ്പം ഒരു കൂട്ടം ഉദ്യാഗസ്ഥരും ഇവരുടെ കുടുംങ്ങളുമുണ്ട്. ട്രഷറി പൂർണമായും പൂട്ടലിന്റെ വക്കിലാണ്. അതിനിടയിലാണ് മന്ത്രിമാരുടെ വിദേശ യാത്ര.

സർക്കാർ സാമ്പത്തിക പ്രതിസന്ധിയിലായിട്ട് കാലം കുറെയായെങ്കിലും ഇത്രയധികം പ്രതിസന്ധി അനുഭവിച്ചിട്ടില്ല. ശമ്പളം ഉൾപ്പെടെയുള്ള വിഷയങ്ങളിൽ ധനവകുപ്പ് സെക്രട്ടറി പോലും കൈമലർത്തിയ സ്ഥിതിയാണുള്ളത്. ട്രഷറി ഡയറക്ടർ കൃത്യമായ അവസ്ഥ ധനമന്ത്രിയുടെ പ്രൈവറ്റ് സെക്രട്ടറിയെ അറിയിക്കുന്നുണ്ട്. എന്നാൽ ധനമന്ത്രിയോ ധനസെക്രട്ടറിയോ ഇക്കാര്യത്തിൽ ഒരു നടപടിയും സ്വീകരിക്കുന്നില്ല.അവർക്ക് പരിഹരിതാനാവാത്ത വിഷയമായി മാറിയിരിക്കുകയാണ് ഇത്.

കേന്ദ്രസർക്കാർ ജി എസ് ടി കുടിശിക നൽകാത്തതും നികുതി കുടിശിക പിരിഞ്ഞുകിട്ടാത്തതുമാണ് പ്രതിസന്ധിക്ക് കാരണമായി മാറിയത്. എന്നാൽ സംസ്ഥാന സർക്കാരിന് ഡൽഹിയിൽ ലെയ്സൺ ഓഫീസർമാർ നിരവധിയുണ്ടെങ്കിലും അവർ ഒരു നടപടിയും സ്വീകരിക്കുന്നില്ല. കേന്ദ്ര സർക്കാർ കടുത്ത സാമ്പത്തിക പ്രതിസന്ധിയിലാണ്. അതു കൊണ്ടു തന്നെ സംസ്ഥാനത്തിന് അവകാശപ്പെട്ട തുക നൽകാൻ കേന്ദ്ര സർക്കാർ ഒരുക്കമല്ല. ഇതിനാവശ്യമായ സമ്മർദ്ദം കേന്ദ്രസർക്കാരിൽ ചെലുത്താൻ ആളുമില്ല. കേരള സർക്കാരിന്റെതായി ഡൽഹിയിലുള്ള ഉദ്യോഗസ്ഥരാകട്ടെ സർക്കാർ തലത്തിൽ നിന്നും അറിയിപ്പൊന്നും ലഭിക്കാത്തതിനാൽ ഒന്നിലും ഇടപെടുന്നില്ല.

മന്ത്രിസഭയിലെ ഏറ്റവും പ്രഗല്ഭനായ മന്ത്രിയാണ് തോമസ് ഐസക്. എന്നാൽ പിണറായി മന്ത്രിസഭയിൽ അദ്ദേഹം പുലർത്തുന്ന നിശബ്ദത തീർത്തും ദുരൂഹമാണ്. വി എസ് മന്ത്രിസഭയിൽ മികച്ച മന്ത്രിയെന്ന് പേരെടുത്ത ഐസക് ഇത്തവണ തുടക്കം മുതൽ നിശബ്ദനായിരുന്നു. മുഖ്യമന്ത്രിയുടെ നയങ്ങളോടുള്ള യോജിപ്പില്ലായ്മയാണ് ഐസക്കിനെ നിശബ്ദനാക്കിയതെന്ന് ഒരു കഥയുണ്ട്. പരസ്യമായ പ്രസ്താവനകളും പ്രകടനങ്ങളും പിണറായി ഇഷ്ടപ്പെടുന്നില്ല.

സർക്കാർ നടത്തുന്ന ധൂർത്തുകൾക്കെതീരെ ധനവകുപ്പ് പലവട്ടം രംഗത്തെത്തിയിട്ടുണ്ട്. എന്നാൽ ഐസക്കിന്റെ നിലപാടുകളെ പിണറായി പൂർണമായും തള്ളി. ധനവകുപ്പിന്റെ ശുപാർശകൾ മുഖ്യമന്ത്രിക്ക് നിസാരമായി തള്ളാവുന്നതേയുള്ളു. മന്ത്രിസഭയുടെ പരിഗണനക്ക് കൊണ്ടു വന്ന് ധനവകുപ്പിന്റെ തടസ്സവാദം മുഖ്യമന്ത്രിക്ക് തള്ളാം. മുഖ്യമന്ത്രിയും മന്ത്രിമാരും നടത്തുന്ന വിദേശയാത്രയിൽ ഐസക് പങ്കെടുക്കാതിരുന്നതും ഇതു കൊണ്ടാണ്. കടുത്ത അഭിപ്രായ ഭിന്നതയാണ് ഐസക്കിനുള്ളത്. സി പി എമ്മിന് താത്പര്യമുള്ള കേസുകളിൽ പുറത്തുനിന്നും അഭിഭാഷകരെ കൊണ്ടു വരുന്നതിനെതിരെയും ഐസക്കും ധനവകുപ്പും പ്രതികരിച്ചിരുന്നു. എന്നാൽ ഒരു ഫലവും ഉണ്ടായിട്ടില്ല. ധനപ്രതിസന്ധിയുടെ ആഴം മുഖ്യമന്ത്രിയെ അറിയിച്ചിട്ടുണ്ടെന്നാണ് അറിയുന്നത്. എന്നാൽ തീരുമാനമൊന്നും അദ്ദേഹം എടുത്തിട്ടില്ല.