പുതിയ വൈദ്യുതി കണക്ഷൻ ഫീസ് കുത്തനെ കൂട്ടി റെഗുലേറ്ററി കമ്മീഷൻ. പോസ്റ്റ്, അധിക വയർ, ട്രാൻസ്ഫോർമർ തുടങ്ങിയവ ആവശ്യമുള്ളവർക്ക് ലാഭകരവും അല്ലാത്തവർക്ക് നഷ്ടവും ആകുന്നവിധമാണ് നിരക്ക് വർദ്ധനയുള്ളത്. പുതുക്കിയ ഫീസ് ഒക്ടോബർ 12 മുതൽ നിലവിൽ വരും.

ഫീസ് പരിഷ്‌കരിച്ചതോടെ ചിലയിനങ്ങളിൽ മൂന്നിരട്ടി വരെയാണ് വർദ്ധനവ്. ലൈനിൽനിന്ന് 200 മീറ്ററിനുള്ളിൽ പോസ്റ്റും മറ്റുസാധനങ്ങളും വേണ്ട കണക്ഷനും വേണ്ടാത്തതിനും ഒരേ നിരക്കാണ്. മുൻപ് വെവ്വേറെയായിരുന്നു നിരക്ക് ഈടാക്കിയിരുന്നത്.

കിലോവാട്ട് അടിസ്ഥാനത്തിൽ നിരക്കുകൾ ഏകീകരിച്ചതോടെ, ഉപഭോക്താവിന് അപേക്ഷയ്‌ക്കൊപ്പം ഉടൻ തന്നെ ഫീസ് അടയ്ക്കാനായി കഴിയും. നിലവിൽ കെഎസ്ഇബി ഫീസ് കണക്കാക്കുന്നതുവരെ കാത്തിരിക്കേണ്ടിയിരുന്നു. 200 മീറ്ററിനപ്പുറം കൂടുതൽ ഉപകരണങ്ങളും പോസ്റ്റും വേണ്ടയിടത്ത് നിലവിലെ നിരക്ക് തുടരും.

ഇതും രണ്ടുമാസത്തിനകം പരിഷ്‌കരിച്ച് ശുപാർശ നൽകാനായി ആവശ്യപ്പെട്ടിട്ടുണ്ട്. രണ്ട് കിലോവാട്ടുവരെ സിംഗിൾ ഫെയ്സ് ഗാർഹിക കണക്ഷന് ഇനി രണ്ടായിരം രൂപ നൽകണം. ഇതുവരെ അഞ്ചുകിലോവാട്ടുവരെ 1740 രൂപയായിരുന്നു ഫീസ്. രണ്ടിന് മുകളിലും അഞ്ച് കിലോവാട്ടുവരെയുള്ളത് 1740 രൂപയിൽനിന്ന് 5000 രൂപയാക്കി. ഗാർഹികേതര കണക്ഷന് ഒരു കിലോവാട്ടുവരെ 2500 രൂപയും രണ്ട് കിലോവാട്ടുവരെ മൂവായിരം രൂപയും നൽകേണ്ടതാണ്.

ത്രീഫെയ്സിൽ അഞ്ചുമുതൽ 10 കിലോവാട്ടുവരെ 4220 രൂപയായിരുന്നു. ഇത് അഞ്ചുമുതൽ ഏഴുവരെ എണ്ണായിരം രൂപയും ഏഴുമുതൽ 10 വരെ 10,000 രൂപയുമായി വർധിപ്പിച്ചു. ത്രീഫെയ്സിൽ കിലോവാട്ട് കൂടുന്തോറും ഫീസ് വർധന തോതും ഉയരുന്ന തരത്തിലാണ് പരിഷ്‌കാരം. എൽടി ത്രീഫെയ്സിൽ നിലവിൽ 10 മുതൽ 25 കിലോവാട്ടുവരെ 14,420 രൂപയായിരുന്നു. പുതിയ നിരക്കിൽ 10 മുതൽ 30 കിലോവാട്ടുവരെ ഒരു കിലോവാട്ടിന് 1560 രൂപവീതം നൽകണം. 25 കിലോവാട്ടിന് 39,000 രൂപ നൽകണം. കണക്ടഡ് ലോഡിൽ മാറ്റംവരുത്താതെ സിംഗിൾ ഫെയ്സ് ത്രീ ഫെയ്സ് ആക്കി തരംമാറ്റാൻ കിലോവാട്ടിന് 700 രൂപയാണ് ഫീസ് വരിക.

25 മുതൽ 50 കിലോവാട്ടുവരെ 21,750 രൂപയായിരുന്നു. ഇനി 30 മുതൽ 40 വരെ കിലോവാട്ടിന് 2890 രൂപ വീതമാണ് നിരക്ക്. 50ന് മുകളിൽ 100 കിലോവാട്ടുവരെ കിലോവാട്ടിന് 5670 രൂപയും. അതായത് 50 കിലോവാട്ട് കണക്ടഡ് ലോഡുള്ള കണക്ഷന് 21,750 രൂപ നൽകിയിരുന്നതിന് ഇനി 2.11 ലക്ഷം രൂപ നൽകണം. ഈ വിഭാഗത്തിൽ ട്രാൻസ്ഫോർമർ ആവശ്യമെങ്കിൽ അതിനോ മറ്റ് സാധനങ്ങൾക്കോ പണം ഈടാക്കുകയില്ല.