തിരുവനന്തപുരത്ത് യുവാവിനെ നടുറോഡിൽ കഴുത്തറുത്ത് കൊലപ്പെടുത്തിയ കേസിലെ പ്രതിക്ക് ജീവപര്യന്തം കഠിന തടവും മൂന്നു ലക്ഷം രൂപ പിഴയൊടുക്കാനും തിരുവനന്തപുരം ആറാം അഡീഷണൽ ജില്ലാ സെഷൻസ് കോടതി ശിക്ഷ വിധിച്ചു. കേസിലെ പ്രതിയായ നെടുമങ്ങാട് പനവൂർ വെള്ളാഞ്ചിറ കൊങ്ങണംകോട് വടക്കുംകര വീട്ടിൽ ശ്രീധരൻ മകൻ ശ്രീകുമാർ എന്നു വിളിക്കുന്ന കുമാറിനെ (40) യാണ് കോടതി ശിക്ഷിച്ചത്. പനവൂർ വെള്ളാഞ്ചിറ കുന്നിൽ വീട്ടിൽ സുകുമാരൻ മകൻ സോനു എന്നു വിളിക്കുന്ന ബിജു (30 ) വിനെയാണ് പ്രതി കൊലപ്പെടുത്തിയത്. പിഴയൊടുക്കിയില്ലെങ്കിൽ രണ്ടു വർഷത്തെ അധിക തടവനുഭവിക്കണം. പിഴത്തുക ഈടാക്കുന്ന പക്ഷം കൊല്ലപ്പെട്ട ബിജുവിന്റെ പിതാവിന് നൽകണം. കൂടാതെ ഇരകൾക്കുള്ള നഷ്ടപരിഹാര ഫണ്ടിൽ നിന്നും മതിയായ തുക നഷ്ടപരിഹാരം നൽകാൻ തിരുവനന്തപുരം ജില്ലാ ലീഗൽ സർവ്വീസസ് അതോറിറ്റിയോടും കോടതി ഉത്തരവിട്ടു. നിഷ്ഠൂര കൃത്യം ചെയ്ത പ്രതിക്ക് നല്ലനടപ്പ് നിയമത്തിന്റെ ഔദാര്യത്തിന് അർഹതയില്ലെന്നും വിധിന്യായത്തിൽ ജഡ്ജി ജോസ്.എൻ. സിറിൾ ചൂണ്ടിക്കാട്ടി.

2012 ജനുവരി 15 നാണ് കേസിനാസ്പദമായ സംഭവം നടന്നത്. കൊലപാതകത്തിന് ഒരു മാസം മുമ്പ് കൊല്ലപ്പെട്ട ബിജു പ്രതിയെ അടിച്ചതിലുള്ള വിരോധത്തിലാണ് കൊലപ്പെടുത്തിയതെന്നാണ് പ്രോസിക്യൂഷൻ കേസ്.
സംഭവ ദിവസം വൈകുന്നേരം വെള്ളാഞ്ചിറ ഷെരീഫിന്റെ ചായക്കടയിൽ ചായ കുടിച്ചു കൊണ്ടിരുന്ന ബിജുവിനെ പ്രതി കാണുകയും ചായക്കടയിൽ വച്ച് പരസ്പരം വഴക്കുണ്ടാക്കുകയും ചെയ്തു. ചായക്കടയിൽ നിന്ന് ഇറങ്ങി നടന്ന ബിജുവിനെ പിന്തുടർന്ന പ്രതി വെള്ളാഞ്ചിറ കല്ലറ റോഡിൽ തൈക്കാവിന് മുൻവശം റോഡിൽ വച്ച് ബിജുവിനെ തടഞ്ഞു നിർത്തി കൈവശം കരുതിയിരുന്ന പിച്ചാത്തി കൊണ്ട് കഴുത്തിൽ കുത്തി വലിച്ചറുത്ത് ഗുരുതരമായി പരിക്കേൽപ്പിക്കുകയlയിരുന്നു. സംഭവസ്ഥലത്ത് രക്തത്തിൽ കുളിച്ചു കിടന്ന ബിജുവിനെ നെടുമങ്ങാട് പോലീസെത്തി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
കൊല്ലപ്പെട്ട ബിജുവിന്റെ സഹോദരൻ വിനോദ് , പിതാവ് സുകുമാരൻ ഉൾപ്പെടെ 16 സാക്ഷികളെ പ്രോസിക്യൂഷൻ ഭാഗത്തേക്ക് വിസ്തരിച്ചു. 20 രേഖകളും 12 തൊണ്ടി മുതലുകളും കോടതി തെളിവിൽ സ്വീകരിച്ചു.