കൈതമുക്കിലെ കുട്ടികള്‍ മണ്ണ് വാരി തിന്നത് പട്ടിണി മൂലമല്ലെന്ന് കുട്ടികളുടെ അമ്മയുടെ വെളിപ്പെടുത്തൽ. അഞ്ചാമത്തെ കുട്ടി മണ്ണ് വാരി തിന്നാറുണ്ടെന്നും എത്ര വിലക്കിയാലും കുട്ടി ആ ശീലം മാറ്റില്ലെന്നും അമ്മ ശ്രീദേവി പറഞ്ഞു.

വിശപ്പ് സഹിക്കാന്‍ കഴിയാതെ പിഞ്ചുകുട്ടി മണ്ണ് വാരി തിന്നു എന്ന വാര്‍ത്തക്ക് അടിസ്ഥാനമില്ലെന്ന് തെളിക്കുന്ന പ്രതികരണമാണ് കുട്ടികളുടെ മാതാവ് ശ്രീദേവി പങ്ക് വെയ്ക്കുന്നത്. മാധ്യമപ്രവര്‍ത്തകരുടെ ചോദ്യത്തിന് മറുപടിയായിട്ടാണ് ശ്രീദേവി ഇക്കാര്യം വ്യക്തമാക്കിയത്.

ശ്രീദേവി-കുഞ്ഞുമോന്‍ ദമ്ബതികളുടെ രണ്ട് വയസ് മാത്രം പ്രായമുള്ള അഞ്ചാമത്തെ മകനാണ് ഇന്നലെ ശിശുക്ഷേമ സമിതി ജീവനക്കാര്‍ കുട്ടികള്‍ ദത്ത് എടുക്കാന്‍ എത്തിയപ്പോള്‍ കൈയ്യില്‍ പറ്റിയ മണ്ണ് തിന്നുന്നത് കണ്ടത്. ഇത് പട്ടിണി മൂലം ആണെന്ന ജീവനക്കാരുടെ തെറ്റിധാരണ കൊണ്ടാവാം വാര്‍ത്ത കാട്ട് തീ പോലെ പടര്‍ന്നത്. എന്നാല്‍ കുട്ടിയുടെ സ്വഭാവവൈകല്യം മൂലമാണിത് സംഭവിച്ചതെന്ന് കുട്ടികളുടെ മാതാവ് തന്നെ വ്യക്തമാക്കിയിരിക്കുകയാണ്.

'കുട്ടികൾ മണ്ണ് വാരി തിന്നേണ്ട അവസ്ഥ ഇല്ലായിരുന്നുവെന്നും കുടുംബത്തിന് അംഗൻവാടിയിൽ നിന്നുള്‍പ്പെടെ ഭക്ഷണം എത്തിച്ചിരുന്നതായും ശ്രീകണ്ഠേശ്വരം വാർഡ് കൗൺസിലർ മായ രാജേന്ദ്രൻ പ്രതികരിച്ചു. 'കുടുംബം പട്ടിണി ആയിരുന്നില്ല. യുവതിയുടെ ഭർത്താവ് മദ്യപിച്ച് ബഹളമുണ്ടാക്കാറുണ്ട്'. ഇവരുടെ കുടുംബത്തെ ലൈഫ് പദ്ധതിയിൽ ഉൾപ്പെടുത്തണമെന്ന് ആവശ്യപ്പെട്ടിരുന്നുവെന്നും കൗൺസിലർ പറഞ്ഞു.

തിരുവനന്തപുരം നഗരമധ്യത്തില്‍ വിശപ്പകറ്റാന്‍ വഴിയില്ലാത്തതിനാല്‍ ഒരമ്മ തന്‍റെ ആറുമക്കളില്‍ നാലുപേരെ ശിശുക്ഷേമസമിതിയുടെ സംരക്ഷണത്തിന് വിട്ടുനല്‍കുന്നുവെന്ന വാര്‍ത്ത ഇന്നലെയാണ് പുറത്തുവന്നത്. വാര്‍ത്ത പുറത്തുവന്നതിന് പിന്നാലെ സംഭവത്തിലിടപെട്ട് നിരവധിപ്പേരാണ് രംഗത്തെത്തിയത്. കുട്ടികളുടെ അമ്മയ്ക്ക് തിരുവനന്തപുരം നഗരസഭ, താല്‍കാലിക ജോലി നല്‍കി.

കൈതമുക്കിലെ പുറമ്പോക്കിലെ ഷെഡില്‍ കഴിയുന്ന കുടുംബത്തിലെ മക്കളില്‍ മൂത്തയാള്‍ക്ക് 7 വയസ്സും ഏറ്റവും ഇളയ ആള്‍ക്ക് മൂന്ന് മാസവുമാണ് പ്രായം. മദ്യപാനിയായ ഭര്‍ത്താവ് കൂലിപ്പണിക്കാരനാണ്. ഭക്ഷണത്തിനുള്ള പണമോ മറ്റ് സഹായങ്ങളോ ഭര്‍ത്താവ് നല്‍കിയിരുന്നില്ല. കുട്ടികളെയും ഭാര്യയെയും ഇവര്‍ മര്‍ദ്ദിച്ചിരുന്നതായും വിവരമുണ്ട്. നിരന്തരമായി മര്‍ദ്ദിച്ചിരുന്നതായി കുട്ടികള്‍ ശിശുക്ഷേമ സമിതിക്ക് മൊഴി നല്‍കിയതിന്‍റെ അടിസ്ഥാനത്തില്‍ പിതാവിനെതിരെ കേസെടുക്കുമെന്ന് അധികൃതര്‍ വ്യക്തമാക്കിയിട്ടുണ്ട്. പ്രാഥമികമായി നടത്തിയ പരിശോധനയില്‍ കുട്ടികള്‍ക്ക് ആരോഗ്യപ്രശ്നങ്ങളുണ്ടെന്ന് വ്യക്തമായിരുന്നു. കുട്ടികളെ വിശദമായ വൈദ്യപരിശോധനയ്‍ക്ക് വിധേയമാക്കാനാണ് തീരുമാനം.

കൈതമുക്കിൽ 11 കുടുംബങ്ങളാണ് 18 സെന്‍റ് ഭൂമിയിലെ ഒറ്റമുറി വീടുകളില്‍ താമസിക്കുന്നത്. വീട് ലഭിക്കാൻ ലൈഫ് പദ്ധതിയില്‍ അപേക്ഷ നൽകിയിട്ടും ലഭിച്ചില്ലെന്ന് കോളനിവാസികള്‍ പറയുന്നു. ഇവിടെ ഒറ്റമുറി വീടുകളിൽ കഴിയുന്ന ഇവർ സ്വന്തമായി ഭൂമിയും മേൽകൂരയും ആവശ്യപ്പെട്ട് ചെല്ലാത്ത സ്ഥലങ്ങളില്ല. സർക്കാർ പറഞ്ഞ എല്ലാ പദ്ധതികളിലും അപേക്ഷ നൽകി. പക്ഷേ ഫലമുണ്ടായില്ല. ലൈഫ് പദ്ധതിയിലടക്കം പട്ടികയിൽ പേര് വരും എന്നാൽ ഒടുവിൽ തഴയപ്പെടും. ഇപ്പോഴത്തെ സംഭവങ്ങളുടെ പശ്ചാത്തലത്തിൽ 11 കുടുംബങ്ങളെയും പുനരധിവസിപ്പിക്കണമെന്നാണ് ഇവരുടെ ആവശ്യം. കോളനിവാസികളുടെ ആവശ്യം അനുഭാവപൂർവം പരിഗണിക്കുമെന്ന് മന്ത്രി കടകംപള്ളി സുരേന്ദ്രൻ പറഞ്ഞു.

പുറമ്ബോക്കില്‍ താമസിക്കുന്ന 12 കുടുംബങ്ങള്‍ക്കും വീട് നല്‍കുമെന്നും സര്‍ക്കാര്‍ പ്രഖ്യാപിച്ചിട്ടുണ്ട്. നഗരസഭയുടെ പ്രത്യേക പദ്ധതിയിലുള്‍പ്പെടുത്തിയാണ് വീട് നല്‍കുക.