ജഡ്ജിയും വക്കീലും... നിരന്തരം വിമര്ശിക്കുന്നു എന്നു കരുതി പാഷയോട് തെല്ലും വിരോധമില്ലെന്ന് അഡ്വ. ജയശങ്കര്
ജസ്റ്റിസ് കെമാല് പാഷയുടെ സുരക്ഷാ പിന്വലിച്ച സര്ക്കാര് നടപടിയെ വിമര്ശിച്ച് അഡ്വ. എ ജയശങ്കര്. കെമാല് പാഷയെ അപായപ്പെടുത്താന് യാതൊരു ഉദ്ദേശവുമില്ലെന്ന് ഐഎസ് വക്താവ് ദമാസ്കസില് നിന്ന് ഇ മെയില് അയച്ചിട്ടുണ്ട്. അതുകൊണ്ട് പോലീസുകാരെ പിന്വലിച്ചതെന്ന് ഫേസ്ബുക്കില് പങ്കുവെച്ച കുറിപ്പില് അഡ്വ. ജയശങ്കര് പരിഹസിക്കുന്നു.
ഐഎസ് ഭീഷണിയുള്ളതിനാല് രണ്ടു വര്ഷത്തോളമായി ജസ്റ്റിസ് കെമാല് പാഷയ്ക്ക് സായുധരായ ഉദ്യോഗസ്ഥരുടെ സുരക്ഷയുണ്ടായിരുന്നു. എന്നാല് നിലവില് ഭീഷണിയൊന്നും ഇല്ലെന്ന സുരക്ഷാ പരിശോധനാ കമ്മിറ്റിയുടെ വിലയിരുത്തലിനെ തുടര്ന്നാണ് പോലീസുകാരെ തിരിച്ചുവിളിച്ചത്. സര്ക്കാരിനെതിരെ വിമര്ശനങ്ങള് ഉന്നയിക്കുന്ന പശ്ചാത്തലത്തിലാണ് നടപടിയെന്ന് ജസ്റ്റിസ് കെമാല് പാഷയും വിമര്ശിച്ചിരുന്നു.
ഫേസ്ബുക്ക് കുറിപ്പിന്റെ പൂര്ണ രൂപം
ജസ്റ്റിസ് കെമാല് പാഷയുടെ മഹത്വത്തെ പറ്റി ആര്ക്കുമില്ല സംശയം. നിര്ഭയമായും നിര്ദയമായും നീതി നടപ്പാക്കിയ, ഏറ്റവുമധികം കുറ്റവാളികള്ക്കു തൂക്കുകയര് വിധിച്ച ന്യായാധിപന്. വിരമിച്ച ശേഷം പുതിയ ലാവണമൊന്നും സ്വീകരിക്കാതെ സര്ക്കാരിനെയും പോലീസിനെയും വിമര്ശിച്ചു കൊണ്ടേയിരിക്കുന്ന മഹാന്.
അദ്ദേഹത്തിന്റെ സുരക്ഷ ഉറപ്പാക്കാന് നിയോഗിച്ച നാല് കോണ്സ്റ്റബിള്മാരെ പോലീസ് തിരിച്ചു വിളിച്ചു. പ്രതികാര നടപടിയാണെന്ന് പാഷയും ആരാധകരും ആവലാതി പറയുന്നു.
പോലീസ് പറയുന്നത് വേറൊന്നാണ്: IS തീവ്രവാദികളുടെ ഭീഷണി ഉണ്ടായിരുന്നതു കൊണ്ടാണ് ഇദ്ദേഹത്തിന് പോലീസ് സംരക്ഷണം നല്കിയിരുന്നത്. ഇപ്പോള് ആ ഭീഷണിയില്ല. കെമാല് പാഷയെ അപായപ്പെടുത്താന് യാതൊരു ഉദ്ദേശവുമില്ലെന്ന് IS വക്താവ് ദമാസ്കസില് നിന്ന് ഇ മെയില് അയച്ചിട്ടുണ്ട്. അതുകൊണ്ട് കോണ്സ്റ്റബിള്സിനെ പിന്വലിച്ചു. സോ സിംപിള്! നിരന്തരം വിമര്ശിക്കുന്നു എന്നു കരുതി പാഷയോട് തെല്ലുമില്ല വിരോധം. ആ അല്പത്തരം കാണിക്കുന്നവരല്ല ഞങ്ങള്.
https://www.facebook.com/Malayalivartha
