കണ്ണൂരില്‍ സി.പി.എമ്മിന്റെ താലിബാന്‍ മോഡല്‍ ആള്‍ക്കൂട്ട വിചാരണയും ആക്രമണവും. തൂമ്പയും വടിയും കൊണ്ട് ഉമ്മയേയും മകനേയും തല്ലിച്ചതച്ചു. ആന്തൂര്‍ ബക്കളം മൈലാടെ കൃഷിയിടത്തിലാണ് സംഭവം. പാര്‍ട്ടി ഗ്രാമത്തില്‍ വയല്‍ നികത്താന്‍ ശ്രമിച്ചുവെന്നാരോപിച്ചാണ് ആക്രമണം നടത്തിയതെന്ന് പരിക്കേറ്റ് ചികിത്സയില്‍ കഴിയുന്ന സ്ഥലം ഉടമ താഴെ ബക്കളത്തെ എ റഷീദ(46), മകന്‍ മുര്‍ഷിദ്(29) എന്നിവര്‍ പറയുന്നു. ഇരുവരും തളിപ്പറമ്പ് ലൂര്‍ദ്ദ് ആസ്പത്രിയില്‍ ചികിത്സയിലാണ്. സ്വന്തം ഉടമസ്ഥതയിലുള്ള കരഭൂമിയില്‍ വാഴ നടാന്‍ എത്തിയതായിരുന്നു ഉമ്മയും മകനും. ചൊവ്വാഴ്ച്ച ഉച്ചയോട് കൂടിയാണ് ബക്കളം മൈലാടെ ഗാന്ധി സ്മാരക വായനശാലക്ക് സമീപത്തുള്ള സ്ഥലത്ത് അക്രമം നടന്നത്.

തങ്ങളുടെ കൃഷിയിടത്തേക്ക് സി.പി.എം പ്രവര്‍ത്തകര്‍ ആയുധങ്ങളും വടിയുമായി അതിക്രമിച്ചു കയറുകയായിരുന്നെന്ന് റഷീദ പറഞ്ഞു. ഉന്നത സിപിഎം നേതാവ് കൂടിയായ ഒരു മന്ത്രിയുടെ മകന്റെ നേതൃത്വത്തിലുള്ള റിസോര്‍ട്ടിനായി കുന്നിടിക്കല്‍ നടക്കുന്ന സ്ഥലത്തിനടുത്താണ് സംഭവം നടന്നത്. സി.പി.എം പ്രവര്‍ത്തകരായ സുരേന്ദ്രന്‍, രജിത്, മനോഹരന്‍, ശശി എന്നിവരുള്‍പ്പെടെയാണ് അക്രമിച്ചതെന്ന് മുര്‍ഷിദും മാതാവ് റഷീദയും പറഞ്ഞു. തൂമ്പയെടുത്ത് അക്രമിച്ച സംഘം കൊല്ലുമെന്ന് ഭീഷണിപ്പെടുത്തി. തടയാന്‍ വന്ന ഉമ്മയെ ചവിട്ടി വീഴ്ത്തി. മുര്‍ഷിദിന്റെ മുഖത്തും കൈക്കും നടുവിനും റഷീദയുടെ നടുവിനുമാണ് പരിക്കേറ്റത്.

മൈലാടെ നെല്‍വയല്‍ മണ്ണിട്ട് നികത്തി വാഴ കൃഷിയും കവുങ്ങ് കൃഷിയും നടത്തുന്നത് ചോദ്യം ചെയ്യാനാണ് അവിടെ പോയതെന്നാണ് സിപിഎം പ്രവര്‍ത്തകര്‍ പറയുന്നത്. അക്രമം നടന്ന വിവരം അറിഞ്ഞ് സ്ഥലത്തെത്തിയ സുഹൃത്തുക്കളും ബന്ധുക്കളുമാണ് ഉമ്മയേയും മകനേയും ആശുപത്രിയില്‍ എത്തിച്ചത്. അത്രയും നേരം ചോര വാര്‍ന്നൊലിക്കുകയായിരുന്ന മുര്‍ഷിദിനെ സിപിഎമ്മുകാര്‍ ആള്‍ക്കൂട്ട വിചാരണ നടത്തുകയായിരുന്നു. ആ ഭൂമിയില്‍ കൃഷി ചെയ്യാനോ വീടുവെക്കാനോ പാടില്ലെന്നും സിപിഎമ്മുകാര്‍ ഭീഷണിപ്പെടുത്തിയിട്ടുണ്ട്. ഈ ഭൂമിയില്‍ നിന്ന് റഷീദയെയും കുടുംബത്തെയും തുരത്തിയോടിച്ച് സ്ഥലം തട്ടിയെടുക്കാനുള്ള സിപിഎം നീക്കത്തിന്റെ ഭാഗമാണ് അക്രമമെന്നും ആരോപണമുണ്ട്.

നേരത്തെ ഇതേ സ്ഥലത്തേക്ക് വന്ന വാഹനങ്ങളും സിപിഎം പ്രവര്‍ത്തകരില്‍ ചിലര്‍ തടഞ്ഞിരുന്നു. സംഭവത്തില്‍ തളിപ്പറമ്പ് പൊലീസ് അന്വേഷണം തുടങ്ങി. സിപിഎം ഭീഷണി മൂലം ആത്മഹത്യ ചെയ്യേണ്ടി വന്ന പ്രവാസി വ്യവസായി സാജന്റെ കണ്‍വെന്‍ഷന്‍ സെന്ററും ഈ പ്രദേശത്തിന് തൊട്ടടുത്തായാണ് സ്ഥിതി ചെയ്യുന്നത്. മറ്റ് രാഷ്ട്രീയ പാര്‍ട്ടികളിലുള്ളവരെ രാഷ്ട്രീയ വൈരാഗ്യത്തിന്റെ പേരില്‍ ഇത്തരത്തില്‍ തെരഞ്ഞെുപിടിച്ച് ആക്രമിക്കുകയും ഒറ്റപ്പെടുത്തുകയും ചെയ്യുന്നത് സി.പി.എമ്മിന്റെ പതിവ് രീതിയാണെന്ന് യു.ഡി.എഫുകാര്‍ ആരോപിച്ചു. അടുത്തകാലത്തായി പാര്‍ട്ടിയിലെ ഗ്രൂപ്പിസത്തിന്റെ ഭാഗമായി പാര്‍ട്ടി അംഗങ്ങളില്‍ ചിലരെയും ഇത്തരത്തില്‍ ആക്രമിക്കുകയും ഒറ്റപ്പെടുത്തുകയും ചെയ്യുന്നതായി ആരോപണം ഉയര്‍ന്നിട്ടുണ്ട്. സി.ഒ.ടി നസീര്‍ പാര്‍ട്ടി വിമതനായി വടകരയില്‍ മത്സരിച്ചപ്പോള്‍ അദ്ദേഹത്തിന് നേരെയുണ്ടായ വധശ്രമം അതിന് വ്യക്തമായ ഉദാഹരണമാണെന്ന് രാഷ്ട്രീയനിരീക്ഷകര്‍ വിലയിരുത്തുന്നു.