കോഴിക്കോട് ബാലുശേരി നന്മണ്ട സ്വദേശികളായ ധന്യയുടെയും ക്ഷേത്ര പൂജാരിയായ പ്രശാന്തിന്റെയും അഞ്ചുവയസ്സുകാരനായ മകൻ ആശീർവാദ് ഇന്ന് ഒരു അപൂർവ രോഗത്തോട് പോരാടുകയാണ്. കുട്ടികളിലെ പേശികളെ ക്രമേണ പൂർണ്ണമായും തളർത്തുന്ന 'ഡുഷേൻ മസ്കുലർ ഡിസ്ട്രോഫി' (DMD) എന്ന ഗുരുതരമായ ജനിതക രോഗമാണ് ആശീർവാദിനെ ബാധിച്ചിരിക്കുന്നത്. 5000 ആൺകുട്ടികളിൽ ഒരാൾക്ക് മാത്രം വരാവുന്ന ഈ രോഗാവസ്ഥയിൽ കുഞ്ഞിന് ഇപ്പോൾ നടക്കാനും പടികൾ കയറാനും ഏറെ ബുദ്ധിമുട്ടാണ്. മകന്റെ കാലുകൾക്ക് കരുത്ത് പൂർണ്ണമായി നഷ്ടപ്പെടുന്നതിന് മുൻപ് 'എൽവിഡിസ്' എന്ന ജീൻ തെറാപ്പി ചികിത്സ നൽകിയാൽ അവനെ സാധാരണ ജീവിതത്തിലേക്ക് തിരികെ കൊണ്ടുവരാൻ സാധിക്കും. ദുബായിലെ മെഡ്‌കെയർ ആശുപത്രിയിൽ ഈ ചികിത്സ ലഭ്യമാണെന്ന് കുടുംബം കണ്ടെത്തി. എന്നാൽ അതിനായി വേണ്ടിവരുന്ന തുക ഒരു സാധാരണ കുടുംബത്തിന് സ്വപ്നം കാണാൻ പോലുമാകാത്ത ഒന്നാണ്— 10.65 ദശലക്ഷം ദിർഹം, അതായത് ഏകദേശം 28 കോടി ഇന്ത്യൻ രൂപ!

മറ്റ് വഴികളില്ലാതെ വന്നതോടെ, യുഎഇ ഭരണാധികാരിയും ദുബായ് രാജാവുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ കാരുണ്യം തേടി ധന്യ സമൂഹമാധ്യമങ്ങളിൽ വിഡിയോ പങ്കുവെക്കുകയായിരുന്നു. മുൻപ് ജോർദാൻ സ്വദേശിയായ ഒരു കുഞ്ഞിന് സമാനമായ രീതിയിൽ ദുബായ് ഭരണാധികാരിയുടെ ഇടപെടലിലൂടെ ചികിത്സാ സഹായം ലഭിച്ച വാർത്തയാണ് ഈ അമ്മയ്ക്ക് ഏക പ്രതീക്ഷ. ഇൻസ്റ്റാഗ്രാമിലും ഫേസ്ബുക്കിലുമായി ലക്ഷക്കണക്കിന് ആളുകൾ ഇതിനകം ഈ വിഡിയോ കണ്ടുകഴിഞ്ഞു. അപേക്ഷ രാജാവിലേക്ക് നേരിട്ടെത്തിക്കാൻ അറബി ഭാഷയിലും വിഡിയോ ഒരുക്കാനുള്ള ശ്രമത്തിലാണ് ഈ കുടുംബം. ആശീർവാദിന് സ്വന്തം കാലുകളിൽ നടക്കണം, അമ്മയുടെ കൈപിടിച്ച് ഒരുപാട് ദൂരം മുന്നോട്ട് പോകണം. ഒരു അമ്മയുടെ പ്രാർത്ഥന യുഎഇ ഭരണാധികാരികളുടെ കാരുണ്യ ഹസ്തങ്ങളിലേക്ക് എത്താൻ നമുക്കും ഈ വാർത്ത പരമാവധി പങ്കുവെക്കാം.