ഏഷ്യൻ ഗെയിംസ് ബാഡ്മിൻറണിൽ നിലവിലെ ചാമ്പ്യന്മാരായ ഇന്ത്യയുടെ സാത്വിക്സായിരാജ് റാങ്കിറെഡ്ഡി-ചിരാഗ് ഷെട്ടി സഖ്യത്തിന് അപ്രതീക്ഷിത പരാജയം. പുരുഷ ഡബിൾസ് ആദ്യ റൗണ്ടിൽ തായ്‌ലൻഡിൻറെ പീരത്ചായ് സുഖ്ഫുൻ - പക്കപോൺ തീരാരത്സകുൽ സഖ്യത്തോടാണ് ലോക അഞ്ചാം നമ്പർ ജോഡിയായ ഇന്ത്യൻ സഖ്യം പരാജയപ്പെട്ടത്.

‌ഇച്ചിനോമിയ സിറ്റി മുൻസിപ്പൽ ജിംനേഷ്യത്തിൽ നടന്ന പോരാട്ടത്തിൽ മൂന്ന് സെറ്റുകൾ നീണ്ട പോരാട്ടത്തിനൊടുവിലായിരുന്നു നിലവിലെ സ്വർണ്ണ മെഡൽ ജേതാക്കളുടെ ഞെട്ടിക്കുന്ന പരാജയം. ആദ്യ സെറ്റ് 21-12 എന്ന സ്കോറിന് നേടി സാത്വിക്കും ചിരാഗും മികച്ച തുടക്കമാണ് കുറിച്ചത്. എന്നാൽ തുടർന്നുള്ള രണ്ട് സെറ്റുകളിൽ മികച്ച തിരിച്ചുവരവ് നടത്തിയ ലോക 36-ാം നമ്പർ തായ് സഖ്യം 21-19, 21-14 എന്ന സ്കോറിന് തുടർച്ചയായ സെറ്റുകൾ പിടിച്ചെടുത്ത് വിജയം ഉറപ്പിച്ചു.

ഏഷ്യൻ ഗെയിംസിലെ പുരുഷ ടീം ഇനത്തിൽ ഇന്ത്യ വെങ്കല മെഡൽ നേടിയപ്പോഴും ചൈനയുടെ ലോക ചാമ്പ്യന്മാരായ ലിയാങ് വെയ് കെങ് - വാങ് ചാങ് സഖ്യത്തെ പരാജയപ്പെടുത്തി ഇരുവരും തിളങ്ങിയിരുന്നു. എന്നാൽ വ്യക്തിഗത ഇനത്തിൽ ആദ്യ റൗണ്ടിൽ തന്നെ പുറത്തായതോടെ കിരീടം നിലനിർത്താനുള്ള ഇന്ത്യൻ സഖ്യത്തിൻറെ പ്രതീക്ഷകൾ അസ്തമിക്കുകയും ചെയ്തു.