വെസ്റ്റ് ഇൻഡീസിനെതിരായ മൂന്ന് മത്സരങ്ങളുടെ ഏകദിന പരമ്പരയ്ക്ക് മുന്നോടിയായി സൂപ്പര്‍ താരങ്ങളായ രോഹിത് ശർമ്മയും വിരാട് കോലിയും വീണ്ടും ഇന്ത്യൻ ജേഴ്‌സിയിൽ ഒന്നിച്ചു. ഇന്നലെ തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ നടന്ന ആദ്യ പരിശീലന സെഷനിലാണ് ഇരുവരും ഒന്നിച്ചിറങ്ങിയത്. ഞായറാഴ്‌ചയാണ് പരമ്പരയിലെ ആദ്യ മത്സരം നടക്കുക.

കഴിഞ്ഞ ജൂലൈയിൽ നടന്ന ഇംഗ്ലണ്ട് പര്യടനത്തിലാണ് കോലിയും രോഹിത്തും അവസാനമായി ഒരുമിച്ച് കളിച്ചത്. ജൂലൈ 14-ന് ലോർഡ്‌സിൽ നടന്ന മൂന്നാം ഏകദിനത്തിന് ശേഷം രണ്ടു മാസത്തിലേറെയുള്ള ഇടവേള കഴിഞ്ഞാണ് ഇരു വെറ്ററൻ താരങ്ങളും വീണ്ടും ഒന്നിച്ച് നെറ്റ്‌സിൽ പരിശീലനം നടത്തുന്നത്.

പരിശീലനത്തിൽ വിരാട് കോലി വളരെ മികച്ച ഫോമിലാണ് കാണപ്പെട്ടത്. നെറ്റ്‌സിൽ ബൗളർമാരെ അനായാസം നേരിട്ട കോലി തന്‍റെ ട്രേഡ്‌മാര്‍ക് ഷോട്ടുകൾ പുറത്തെടുത്തു. കുൽദീപ് യാദവിനെ ക്രീസിന് പുറത്തേക്കിറങ്ങി മിഡ്-വിക്കറ്റിന് മുകളിലൂടെ സിക്‌സര്‍ പറത്തിയ കോലി, പിന്നാലെ നമൻ ധീറിനെതിരെ സ്ട്രെയിറ്റ് ഡ്രൈവിലൂടെ മറ്റൊരു സിക്‌സറും നേടി.

മഴ കാരണം അല്പം വൈകിയാണ് രോഹിത് ശർമ്മ രണ്ടാമത്തെ ഗ്രൂപ്പിനൊപ്പം ബാറ്റിങ്ങിനിറങ്ങിയത്. വിൻഡീസ് പേസർമാരുടെ വെല്ലുവിളി നേരിടാൻ സജ്ജമാകുന്നതിനായി പ്രസീദ് കൃഷ്‌ണയോട് ഷോർട്ട് ബോളുകൾ എറിയാൻ രോഹിത് ആവശ്യപ്പെടുകയും പുൾ ഷോട്ടുകൾ പരിശീലിക്കുകയും ചെയ്‌തു.

വൈകുന്നേരം 5:30 മുതൽ രാത്രി 8:30 വരെയായിരുന്നു ഇന്ത്യൻ ടീമിന്‍റെ പരിശീലനം. ക്യാപ്റ്റൻ ശുഭ്‌മന്‍ ഗില്ലിനും മറ്റ് ഏകദിന ടീം അംഗങ്ങൾക്കുമൊപ്പം വ്യാഴാഴ്‌ച തന്നെ ഇരുവരും തിരുവനന്തപുരത്ത് എത്തിയിരുന്നു.