സ്ത്രീകള്‍ക്കും കുട്ടികള്‍ക്കും നേരെയുള്ള അതിക്രമങ്ങളുടെ ക്രൂരതയാണ് ഓരോ ദിവസവും പുറത്തു വരുന്നത്. പ്രണയം നടിച്ച് പെണ്‍കുട്ടികളെ പീഡിപ്പിക്കുന്നവരും കുറവല്ല. അത്തരത്തിലൊരു വാര്‍ത്തയാണ് തലസ്ഥാന നഗരിയില്‍ നിന്നും വരുന്നത്. വിവാഹ വാഗ്ദാനം നല്‍കി ആദിവാസി പെണ്‍കുട്ടിയെ ലൈംഗികമായി പീഡിപ്പിക്കുകയും സുഹൃത്തുക്കള്‍ക്ക് കാഴ്ച വയ്ക്കുകയും ചെയ്ത സംഭവത്തില്‍ മൂന്ന് പേരെ പോലീസ് അറസ്റ്റ് ചെയ്തു. ലോഡ്ജില്‍ താമസമാക്കിയിരുന്ന ഇവരെ മുറിയുടെ വാതില്‍ പൊളിച്ച് അകത്ത് കയറിയാണ് പിടികൂടിയത്. അടുത്ത ദിവസം പെണ്‍കുട്ടിയെ മാര്‍ത്താണ്ഡത്ത് എത്തിച്ച് മറ്റൊരു സംഘത്തിന് വില്‍്ക്കാനായിരുന്നു ഇവരുടെ പദ്ധതി.

പാലോട് പെരിങ്ങമ്മല ഒഴുകുപാറ മുനീറ മന്‍സിലില്‍ 19 കാരനായ മുഹ്‌സീന്‍ ആണ് പെണ്‍കുട്ടിയെ വിവാഹ വാഗ്ദാനം നല്‍കി ലോഡ്ജിലേക്ക് കൂട്ടിക്കൊണ്ട് പോന്നത്. തുടര്‍ന്ന് ലോഡ്ജില്‍ വെച്ച് പ്രതി പെണ്‍കുട്ടിയെ ലൈംഗികമായി പീഡിപ്പിച്ചു. പിന്നീട് ഇയാളുടെ സുഹൃത്തുക്കളായ തമിഴ്‌നാട് മാര്‍ത്താണ്ഡം പൊങ്ങിന്‍കല പുത്തന്‍വീട്ടില്‍ 21 കാരനായ ആസിന്‍, കല്‍ക്കുളം തിരുവട്ടാര്‍ മാര്‍ത്താണ്ഡം കണ്ണന്‍കരവിളയില്‍ വീട്ടില്‍ 32 കാരനായ വിജയകുമാര്‍ എന്നിവരും പെണ്‍കുട്ടിയെ പീഡിപ്പിച്ചു. ഇവരെ മൂന്ന് പേരെയുമാണ് പോലീസ് അറസ്റ്റ് ചെയ്തത്.

പെണ്‍കുട്ടിയെ കാണാനില്ലെന്ന് പരാതിയുമായി അമ്മ കഴിഞ്ഞ 17ന് പാലോട് പോലീസില്‍ പരാതി നല്‍കിയിരുന്നു. തുടര്‍ന്ന് പോലീസ് നടത്തിയ അന്വേഷണത്തിലാണ് മുഹ്‌സിനുമായി പെണ്‍കുട്ടിക്ക് അടുപ്പമുണ്ടായിരുന്നുവെന്ന് വ്യക്തമായത്. ഇതോടെ മുഹ്‌സിന്റെ ഫോണ്‍ കേന്ദ്രീകരിച്ച് നടത്തിയ അന്വേഷണത്തിലാണ് ആസിനെയും വിജയകുമാറിനേയും കുറിച്ചുള്ള വിവരങ്ങള്‍ പൊലീസിന് ലഭിച്ചത്. പൊലീസിന്റെ പരിശോധനയില്‍ ഇവരുടെ ഫോണുകളെല്ലാം നന്ദിയോട് മേഖലയില്‍ വെച്ച് സ്വിച്ച് ഓഫ് ആക്കിയതായി കണ്ടെത്തി.

പെണ്കുട്ടിയെ ഇടിഞ്ഞാറില്‍നിന്നു മുഹ്‌സിന്‍ മലയോര ഹൈവേയുടെ ജോലികളില്‍ ഏര്‍പ്പെട്ടിരിക്കുന്ന ഹിറ്റാച്ചിയുടെ െ്രെഡവര്‍മാരായ വിജയകുമാര്‍, ആസിന്‍ എന്നിവര്‍ വാടകയ്ക്കുതാമസിക്കുന്ന താന്നിമൂട്ടിലെ ലോഡ്ജ് മുറിയിലെത്തിക്കുകയായിരുന്നു. ആണ്‍ വേഷം ധരിപ്പിച്ചാണ് പെണ്‍കുട്ടിയെ മറ്റുള്ളവരുടെ കണ്ണുവെട്ടിച്ചു ലോഡ്ജിനുള്ളില്‍ എത്തിച്ചത്.

ലോഡ്ജില്‍ എത്തിയ പൊലീസ് സംഘം മുറിയുടെ വാതില്‍ ചവിട്ടിപ്പൊളിച്ച് അകത്തു കയറുകയായിരുന്നു. ഈ സമയം മുറിയില്‍ പെണ്കുട്ടിയും പ്രതികളുമുണ്ടായിരുന്നു. അടുത്ത ദിവസം പെണ്കുട്ടിയെ മാര്‍ത്താണ്ഡത്തെ ഒരു സംഘത്തിന് വില്‍ക്കാനായിരുന്നു പദ്ധതിയെന്ന് പ്രതികള്‍ പൊലീസിനോട് പറഞ്ഞു. ഒന്നാം പ്രതി മുഹ്‌സിന്‍ പ്രായപൂര്‍ത്തിയാകുന്നതിനു മുന്‍പും ബെംഗളൂരുവില്‍ കൊണ്ടുപോയി പീഡിപ്പിച്ചിരുന്നുവെന്ന് പെണ്‍കുട്ടി മൊഴി നല്‍കിയിട്ടുണ്ട്. ഇയാള്‍ക്കെതിരെ പോക്‌സോ നിയമപ്രകാരവും കേസെടുത്തതായി പോലീസ് വ്യക്തമാക്കി.

അതിനിടെ സ്ത്രീകള്‍ക്കെതിരായ അതിക്രമങ്ങള്‍ ഉയരുമ്പോള്‍ അത് തടയാന്‍ പുതിയ മാര്‍ഗ നിര്‍ദ്ദേശങ്ങളുമായി ആന്ധ്രപ്രദേശ് സര്‍ക്കാര്‍ രംഗത്ത് വന്നത് ഏറെ ശ്രദ്ധ നേടിയിരുന്നു. ഇതിനായി പുതിയ നിയമനിര്‍മ്മാണം നടത്താനാണ് തീരുമാനം. കേസുകളില്‍ ഒരാഴ്ചയ്ക്കുള്ളില്‍ അന്വേഷണം പൂര്‍ത്തിയാക്കുകയാണ് പ്രധാനപ്പെട്ട നിര്‍ദ്ദേശങ്ങളിലൊന്ന്. ബലാത്സംഗക്കേസുകളില്‍ 21 ദിവസത്തിനകം വധശിക്ഷ നടപ്പാക്കുമെന്നും ആന്ധ്രപ്രദേശ് സര്‍ക്കാര്‍ പറയുന്നു.

ഈ നിര്‍ദ്ദേശങ്ങളടങ്ങിയ ബില്‍ ബുധനാഴ്ച നിയമസഭയില്‍ അവതരിപ്പിക്കും. ഹൈദരാബാദ് ഉന്നാവോ കേസുകളില്‍ രാജ്യമെമ്പാടും പ്രതിഷേധം ഉയരുന്നതിനിടെയാണ് പുതിയ നിയമനിര്‍മ്മാണവുമായി ആന്ധ്രപ്രദേശ് സര്‍ക്കാര്‍ രംഗത്തെത്തിയിരിക്കുന്നത്.