കിഫ്ബിക്കെതിരെ പ്രതിപക്ഷവും മന്ത്രി ജി. സുധാകരനും ഉന്നയിച്ച ഗുരുതര ആരോപണങ്ങൾ നേരിടാൻ സർക്കാർ കോടികൾ മുടക്കി കിഫ്ബിക്ക് പരസ്യം നൽകുന്നു. എഫ് എം റേഡിയോ, റെയിൽവേ സ്റ്റേഷനുകൾ എന്നിവിടങ്ങളിലാണ് കിഫ്ബി പരസ്യങ്ങൾ പ്രകാരം പരത്തുന്നത്.

45000 കോടി രൂപയുടെ വികസന പ്രവര്‍ത്തനങ്ങള്‍ കിഫ്ബി വഴി നടപ്പാക്കിയെന്നാണ് മുഖ്യമന്ത്രിയുടെ അവകാശവാദമെങ്കിലും വെറും 553.97 കോടി രൂപയുടെ പദ്ധതികള്‍ മാത്രമാണ് കിഫ്ബി നടപ്പാക്കിയതെന്ന് പ്രതിപക്ഷം ആരോപിക്കുന്നു. കിഫ്ബി പ്രഖ്യാപിച്ച മിക്ക പദ്ധതികളും ഇപ്പോഴും കടലാസില്‍ ഉറങ്ങുന്നതേയുള്ളൂ. 2016-17 ല്‍ 73 മുഖ്യ പദ്ധതികളും 2017-18ല്‍ 19 പദ്ധതികളും 2018-19 ല്‍ 12 പദ്ധതികളുമാണ് പ്രഖ്യാപിച്ചത്. അതിലാണ് ഇത് വരെ 13 പദ്ധതികൾ മാത്രം പൂര്‍ത്തിയായത്. അതായത് പിണറായി സര്‍ക്കാരിന്റെ കാലത്ത് കിഫ്ബി പദ്ധതികളുടെ 20% പോലും പൂര്‍ത്തിയാവില്ല. ബാക്കി പദ്ധതികള്‍ പൂര്‍ത്തിയാക്കി പണം നല്‍കേണ്ട ഭാരം വരുന്ന സര്‍ക്കാരിന്റെ തലയിലായിരിക്കും പതിക്കുക.

വികസനപ്രവര്‍ത്തനത്തിന്റെ പേരില്‍ അഴിമതിയും ധൂര്‍ത്തും നടത്തുന്നതിനുള്ള സങ്കേതമായി കിഫ്ബിയെ ഇടതു മുന്നണി മാറ്റിയിരിക്കുന്നുവെന്ന പ്രതിപക്ഷ ആരോപണങ്ങളെ ശരിവയ്ക്കുന്ന തരത്തിലാണ് സർക്കാർ പരസ്യം നൽകുന്നത്. . സംസ്ഥാനം ഇത്രയും രൂക്ഷമായ സാമ്പത്തിക പ്രതിസന്ധിയിലൂടെ കടന്നു പോകുമ്പോഴും കിഫ്ബിയുടെ നേട്ടങ്ങള്‍ വിശദീകരിക്കാനെന്ന പേരില്‍ ലക്ഷങ്ങള്‍ ധൂര്‍ത്തടിച്ചു കൊണ്ടുള്ള മാമാങ്കമാണ് തിരുവനന്തപുരത്ത് നടത്തുന്നത്. പ്രദര്‍ശന വേദിയില്‍ എഴുതിവച്ചതു കൊണ്ടു മാത്രം വികസന പ്രവര്‍ത്തനങ്ങള്‍ നടപ്പാവില്ലെന്ന് രമേശ് ചെന്നിത്തല പറഞ്ഞു. യഥാര്‍ത്ഥത്തില്‍ സംസ്ഥാനത്തെ വികസന പ്രവര്‍ത്തനങ്ങളുടെ താളം തെറ്റിക്കുകയും സംസ്ഥാനത്തെ വന്‍കടക്കെണിയിലേക്ക് തള്ളിയിടുകയുമാണ് കിഫ്ബി ചെയ്തിരിക്കുന്നത്. കിഫ്ബി കാരണം പൊതുമരാമത്ത് വകുപ്പിന്റെ പ്രവര്‍ത്തനം തകിടം മറിഞ്ഞിരിക്കുകയാണെന്ന് മന്ത്രി ജി.സുധാകരന്‍ പരാതിപ്പെട്ടത് ഉദാഹരണം.
കിഫ്ബി ഉദ്യോഗസ്ഥരെ ബകനോടാണ് മന്ത്രി സുധാകരന്‍ ഉപമിച്ചത്. കിഫ്ബി ഏറ്റെടുത്തതു കാരണം സാധാരണ നിലയില്‍ നടക്കേണ്ട റോഡ് പണി പോലും നടക്കാതിരിക്കുകയാണ്.

കിഫ്ബിയില്‍ ഭരണഘടനാ സ്ഥാപനമായ സി.എ.ജിയുടെ സമ്പൂര്‍ണ്ണ ഓഡിറ്റിംഗ് നിഷേധിക്കുന്നത് തന്നെ അഴിമതി നടത്താനാണെന്ന് നേരത്തെ ആരോപണം ഉയർന്നിരുന്നു . 14(1) പ്രകാരമുള്ള ഓഡിറ്റിംഗ് നടത്താന്‍ അനുവദിക്കണമെന്ന് സി.എ.ജി ആവര്‍ത്തിച്ചാവശ്യപ്പെട്ടിട്ടും ഓഡിറ്റിംഗിന് അനുവദിക്കാത്തത് അഴിമതി പിടിക്കപ്പെടും എന്നതിനാലാണെന്ന് ചെന്നിത്തല പറഞ്ഞു.. കിഫ്ബി വഴി നടപ്പാക്കുന്ന വൈദ്യുതി ബോര്‍ഡിന്റെ 5000 കോടിയുടെ ട്രാന്‍സിഗ്രിഡ് പദ്ധതിയില്‍ ഇതിനകം പുറത്തു വന്ന കോടികളുടെ അഴിമതി ഇതിന് ഉദാഹരണമാണ്. എസ്റ്റിമേറ്റ് തുകയെക്കാള്‍ 50 മുതല്‍ 70 ശതമാനം വരെ ഉയര്‍ന്ന നിരക്കില്‍ കരാര്‍ നല്‍കി വന്‍കൊള്ളയാണ് ഈ പദ്ധതിയുടെ പേരില്‍ നടത്തുന്നത്. ഈ ഇടപാട് അടിമുടി സംശായസ്പദമാണ്.

മസാലാ ബോണ്ടും മറ്റും വഴി ഉയര്‍ന്ന പലിശയ്ക്ക് കിഫ്ബി വേണ്ടി ഈ സര്‍ക്കര്‍ വാങ്ങിക്കൂട്ടുന്ന പണം എങ്ങനെ തിരിച്ചടയ്ക്കുമെന്ന് ഒരു രൂപവുമല്ല. വരും വര്‍ഷങ്ങളില്‍ ഇത് സംസ്ഥാനത്തെ വലിയ കടക്കെണിയിലായിരിക്കും മുക്കുക. 9.72% പലിശക്കാണ് മസാലബോണ്ടു വഴി പണമെടുത്തത്. അത് അതിനെക്കാല്‍ കുറഞ്ഞ പലിശയ്ക്ക് വാണിജ്യ ബാങ്കുകളില്‍ഇട്ടിരിക്കുകയാണ്.

ഉയര്‍ന്ന ശമ്പള നിരക്കിലുള്ള ഉദ്യോഗസ്ഥപടയും വന്‍ ഓഫീസുകളും ആര്‍ഭടങ്ങളുമായി ധൂര്‍ത്തിന്റെ പര്യായമായി മാറിയിരിക്കുകയാണ് കിഫ്ബി. അഴിമതിക്കല്ല, യഥാര്‍ത്ഥത്തില്‍ സംസ്ഥാനത്തിന്റെ വികസനമാണ് ലക്ഷ്യമെങ്കില്‍ നിമാനുസൃതമായ ഓഡിറ്റിംഗ് നടത്താനെങ്കിലും സര്‍ക്കാര്‍ തയ്യാറുണ്ടോ എന്നും രമേശ് ചെന്നിത്തല ചോദിച്ചു.

എന്നാൽ അടുത്ത സർക്കാർ കിഫ്ബിക്കെതിരെ അന്വേഷണം നടത്തുമെന്ന് കരുതരുത്. കാരണം ഭരണപക്ഷവും പ്രതിപക്ഷവും കേരളത്തിൽ രമൃതയിലൂടെയാണ് നീങ്ങുന്നത്. അത് പരസ്പരമുള്ള അഴിമതി മറച്ചുവയ്ക്കാനാണെന്നത് ചെറിയ കുട്ടികൾക്ക് പോലുമറിയാം.