ഓപ്പറേഷൻ ബിഗ് ഡാഡി'യില് കുറ്റപത്രം സമര്പ്പിച്ചു; ചുംബന സമരനേതാക്കളായ രശ്മി ആര് നായരും രാഹുല് പശുപാലനും കുറ്റക്കാരെന്ന് ക്രൈം ബ്രാഞ്ച്
ഓൺലൈൻ പെൺവാണിഭ കേസിൽ കുറ്റാരോപിതരായിരുന്ന ചുംബന സമര നേതാക്കളായ രശ്മി ആര് നായർക്കും രാഹുൽ പശുപാലനും എതിരെ ക്രൈം ബ്രാഞ്ച് കുറ്റപത്രം സമർപ്പിച്ചു. ഓൺലൈൻ പെൺവാണിഭവങ്ങൾ കണ്ടെത്താൻ നാലു വർഷം മുൻപ് ക്രൈം ബ്രാഞ്ച് രൂപീകരിച്ച ഓപ്പറേഷൻ ബിഗ് ഡാഡിയിലൂടെയാണ് ഇവരെ പിടികൂടിയത്. ഓൺലൈൻ പെൺവാണിഭം നടത്തിയെന്നതിന്റെ പേരിലാണ് രശ്മി, രാഹുല് എന്നിവരുള്പ്പടെ 13 പേര്ക്കെതിരെ ക്രൈംബ്രാഞ്ച് കുറ്റപത്രം സമർപ്പിച്ചത്. ഐ ജി എസ് ശ്രീജിത്ത് ഐപിഎസ് ആയിരുന്നു ഓപ്പറേഷന് ബിഗ് ഡാഡിക്ക് നേതൃത്വം നല്കിയത്
പ്രായപൂര്ത്തിയാകാത്ത ബംഗളൂരു സ്വദേശിനികളെ പ്രതികള് ലൈംഗികവ്യാപാരത്തിനായി കേരളത്തിലെത്തിച്ചെന്നാണ് കുറ്റപത്രത്തിൽ ഇവർക്കെതിരെയുള്ള ആരോപണം. ഓണ്ലൈന് വഴി പ്രതികള് സെക്സ് റാക്കറ്റ് നടത്തിയിരുന്നതായും കുറ്റപത്രത്തിൽ പറയുന്നു. തിരുവനന്തപുരം പോക്സോ കോടതിയിലാണ് കുറ്റപത്രം സമര്പ്പിച്ചത്. 2015ലാണ് ഓപ്പറേഷന് ബിഗ് ഡാഡിയില് രശ്മി ആര് നായരും രാഹുല് പശുപാലനും അറസ്റ്റിലായത്. നെടുമ്പാശ്ശേരിയില് വച്ചായിരുന്നു ഇരുവരും പിടിയിലായത്. കുടുംബം, സ്കൂൾ, ട്യൂഷൻ ക്ലാസ് തുടങ്ങിയ സ്ഥലങ്ങളിലും പൊതുസ്ഥലം ഉൾപ്പടെ സമൂഹത്തിൽ പെൺ കുട്ടികളുടെ സുരക്ഷ ഉറപ്പുവരുത്തുന്നത്തിനും , മറ്റ് സംസ്ഥാനങ്ങളിൽ നിന്നുള്ള പ്രായപൂർത്തിയാകാത്തവരെ മാംസക്കച്ചവടത്തിനായി കടത്തുന്നത് പരിശോധിക്കുന്നതിനുമാണ് 'ബിഗ് ഡാഡി' രൂപീകരിച്ചിരിക്കുന്നത്.
https://www.facebook.com/Malayalivartha
