ലൗ ജിഹാദ് നടക്കുന്നുണ്ടെന്ന സീറോ മലബാര‍് സിനഡിന്‍റെ സര്‍ക്കുലറിനെതിരെ എറണാകുളം - അങ്കമാലി അതിരൂപതാ മുഖപത്രത്തിൽ ലേഖനം. ലൗ ജിഹാദ് ആരോപണത്തെ പിന്തുണച്ച് സിനഡ് പുറത്തിറക്കിയ സര്‍ക്കുലര്‍ അനവസരത്തിലുള്ളതാണെന്നും പൗരത്വ നിയമ ഭേദഗതിയെ പിന്തുണച്ച് പിഓസി ഡയറക്ടര്‍ ഫാ. വര്‍ഗീസ് വള്ളിക്കാട്ട് ജന്മഭൂമി പത്രത്തിൽ ലേഖനമെഴുതിയത് ആശങ്കയുളവാക്കുന്നതാണെന്നുമാണ് ലേഖലനത്തിലെ വിമര്‍ശനം.

മതരാഷ്ട്രീയത്തിന്റെ പേരിൽ രാജ്യം കത്തുമ്പോൾ ഏതെങ്കിലും മതത്തെ ചെറുതാക്കുന്ന കാര്യങ്ങൾ പറഞ്ഞ് എരിതീയിൽ എണ്ണയൊഴിക്കാതിരിക്കുകയെന്നത് സാമാന്യ ബുദ്ധിയാണെന്ന് സഭാ പ്രസിദ്ധീകരണത്തിൽ വൈദികന്റെ ലേഖനം. എറണാകുളം-അങ്കമാലി അതിരൂപതയുടെ പ്രസിദ്ധീകരണമായ ’സത്യദീപ’ത്തിന്റെ ഏറ്റവും പുതിയ ലക്കത്തിലാണ് ’വരികൾക്കിടയിൽ’ എന്ന കോളത്തിൽ ഫാ. കുര്യാക്കോസ് മുണ്ടാടൻ രൂക്ഷ വിമർശനമുന്നയിക്കുന്നത്. ’പൗരത്വ നിയമവും ലൗ ജിഹാദും കൂട്ടിച്ചേർക്കാമോ’ എന്നാണ് തലക്കെട്ട്.

കേരളത്തിൽ ക്രിസ്ത്യൻ പെൺകുട്ടികളെ മതം മാറ്റാൻ ലക്ഷ്യമിട്ട് ആസൂത്രിതമായ തരത്തിൽ ലൗ ജിഹാദ് നടക്കുന്നുണ്ടെന്നായിരുന്നു കഴിഞ്ഞ ദിവസം ചേര്‍ന്ന സിനഡിനു ശേഷം സഭ പുറത്തിറക്കിയ സര്‍ക്കുലര്‍. പൗരത്വ നിയമ വിഷയത്തിൽ സഭ സ്വീകരിക്കുന്നത് ഇരട്ടത്താപ്പാണെന്ന ആരോപണത്തിനു പിന്നാലെയായിരുന്നു ലൗ ജിഹാദ് വിഷയത്തിൽ സംഘപരിവാര്‍ വാദത്തെ പിന്‍താങ്ങിയുള്ള സീറോ മലബാര്‍ സര്‍ക്കുലര്‍. കേരളത്തിൽ നിന്ന് ഐഎസിലേയ്ക്ക് റിക്രൂട്ട് ചെയ്യപ്പെട്ടെന്ന് കേരള പോലീസ് കണ്ടെത്തിയ 21 വ്യക്തികളിൽ പകുതിയോളം പേരും ക്രിസ്ത്യൻ വിഭാഗത്തിൽ നിന്ന് മതപരിവര്‍ത്തനം ചെയ്യപ്പെട്ടവരാണെന്നും ഈ കേസുകളിൽ പോലീസ് കൃത്യമായ നടപടിയെടുക്കുന്നില്ലെന്നുമായിരുന്നു സര്‍ക്കുലറിലെ വിമര്‍ശനം. പരമ്പരാഗത കോൺഗ്രസ് അനുഭാവം ഉപേക്ഷിച്ച് സീറോ മലബാര്‍ സഭാ നേതൃത്വം ബിജെപിയോട് അടുക്കുന്നതിന്‍റെ സൂചനയായാണ് ഈ നീക്കം വിലയിരുത്തപ്പെട്ടത്. എന്നാൽ ഇതിനെതിരെയാണ് എറണാകുളം അങ്കമാലി അതിരൂപത പരസ്യമായി രംഗത്തെത്തിയിരിക്കുന്നത്.

ലവ് ജിഹാദ് പ്രതികരണം അനവസരത്തിലാണെന്ന് വ്യക്തമാക്കിയ കുര്യാക്കോസ് മുണ്ടാടൻ താൻ അതിരൂപതയുടെ വികാരമാണ് ലേഖനത്തിൽ കുറിച്ചതെന്ന് ഒരു മാധ്യമത്തോട് പ്രതികരിച്ചു. മതരാഷ്ട്രീയത്തിന്‍റെ പേരിൽ രാജ്യം നിന്നു കത്തുമ്പോള്‍ ഏതെങ്കിലും മതത്തെ ചെറുതാക്കുന്ന കാര്യങ്ങള്‍ പറഞ്ഞ് എരിതീയിൽ എണ്ണയൊഴിക്കാതിരിക്കുക എന്നത് സാമാന്യബുദ്ധിയാണ്. സത്യദീപം മുൻ എഡിറ്റര്‍ കൂടിയായ കുര്യാക്കോസ് മുണ്ടാടൻ ലേഖനത്തിൽ കുറിച്ചു. ലൗ ജിഹാദ് എന്നൊന്ന് ഇല്ലെന്ന് സര്‍ക്കാരും ഹൈക്കോടതിയും അന്വേഷിച്ചു കണ്ടെത്തിയിട്ടുള്ളതാണെന്നും കുര്യാക്കോസ് മുണ്ടാടൻ പ്രതികരിച്ചു.

അതേസമയം, കര്‍ദിനാള്‍ അനുകൂല സംഘടനയായ കത്തോലിക്കാ ഫോറം ജനറൽ സെക്രട്ടറി കെന്നഡി കരിമ്പിൻകാലാ ലൗ ജിഹാദ് ആരോപണം ആവര്‍ത്തിച്ച സിനഡ് സര്‍ക്കുലറിനെ പിന്തുണച്ച് രംഗത്തെത്തിയിട്ടുണ്ട്. എന്നാൽ കര്‍ദിനാള്‍ ആലഞ്ചേരി അടക്കമുള്ള സീറോ മലബാര്‍ സഭയിലെ മെത്രാന്മാര്‍ വലിയ ആരോപണങ്ങള്‍ നേരിടുന്ന പശ്ചാത്തലത്തിൽ സഭ തന്ത്രപരമായ നിലപാട് സ്വീകരിക്കുകയാണെന്ന് അതിരൂപത സുതാര്യതാ സമിതി അധ്യക്ഷൻ ഷൈജു ആൻ്റണി പറഞ്ഞു. പ്രസ്താവനയിൽ കഴമ്പില്ലെന്ന് ഇത് പുറത്തിറക്കിയ മെത്രാന്മാര്‍ക്കടക്കം അറിയാമെന്നും എന്നാൽ ആര്‍എസ്എസിനെ പ്രീണിപ്പിക്കുക മാത്രമാണ് സഭയുടെ ലക്ഷ്യമെന്നും ഷൈജു ആന്‍റണി സമയം മലയാളത്തോട് പറഞ്ഞു. വിദേശഫണ്ട് സ്വീകരിച്ചതുമായി ബന്ധപ്പെട്ട് കര്‍ദിനാള്‍ ആലഞ്ചേരിയ്ക്കെതിരെ സിബിഐ അന്വേഷണത്തിനു വരെ സാധ്യതയുണ്ടെന്നും ഈ സാഹചര്യത്തിൽ ബിജെപിയെ പിന്തുണയ്ക്കുന്നതാണ് നലനിൽപ്പിന് നല്ലതെന്ന് സീറോ മലബാര്‍ സഭ തിരിച്ചറിയുകയാണെന്നും ഷൈജു ആന്‍റണി ആരോപിച്ചു.

അതേസമയം സംസ്ഥാനത്ത് ലൗ ജിഹാദ് നടക്കുന്നുണ്ടെന്ന ആരോപണം അന്വേഷിക്കാൻ സംസ്ഥാന പോലീസ് മേധാവി ലോക്നാഥ് ബെഹ്റയോട് കേന്ദ്ര ന്യൂനപക്ഷ കമ്മീഷൻ ആവശ്യപ്പെട്ടിട്ടുണ്ട്. ബിജെപി നേതാവ് കുമ്മനം രാജശേഖരൻ അടക്കം സീറോ മലബാര്‍ സഭയുടെ ആരോപണത്തെ പിന്തുണച്ച് രംഗത്തെത്തിയിരുന്നു.