66വര്ഷം ഗുരുവായൂരപ്പന്റെ തങ്കതിടമ്പേറ്റിയ ഗജരത്നം ഗുരൂവായൂര് പത്മനാഭന് ഓര്മയായി... പത്മനാഭനെ അവസാനമായി കാണാന് ജനപ്രവാഹം
66വര്ഷം ഗുരുവായൂരപ്പന്റെ തങ്കതിടമ്പേറ്റിയ ഗജരത്നം ഗുരുവായൂര് പത്മനാഭന് ഓര്മയായി. പ്രായാധിക്യം മൂലമുള്ള അസുഖങ്ങള്ക്ക് അസമില്നിന്നുള്ള വിദഗ്ധരുടെ ചികിത്സയിലായിരുന്ന കൊമ്പന് ഇന്നലെ ഉച്ചയ്ക്ക് രണ്ടോടെയാണു ചെരിഞ്ഞത്. സംസ്കാരച്ചടങ്ങുകള് ഇന്നു നടത്തും.
ഗുരുവായൂരപ്പന്റെ പ്രിയങ്കരനെന്നു ഭക്തര് വിശേഷിപ്പിക്കുന്ന പത്മനാഭനെ ഗുരുവായൂര് ആനത്താവളത്തില് സംസ്കരിക്കാന് വനംവകുപ്പിന്റെ അനുമതി തേടി.
നിലമ്പൂര് കാടുകളില് പിറന്ന പത്മനാഭനെ 1954 ജനുവരി 18-ന് ഒറ്റപ്പാലത്തെ ഇ.പി. ബ്രദേഴ്സാണ് ഗുരുവായൂര് ക്ഷേത്രത്തില് നടയിരുത്തിയത്. അന്നു 14 വയസാണു കണക്കാക്കിയിരുന്നത്. ഗുരുവായൂര് കേശവനു ശേഷം വിശേഷവേളകളിലെല്ലാം ഗുരുവായൂരപ്പന്റെ തിടമ്പേറ്റിയിരുന്നതു പത്മനാഭനാണ്. ശ്രീലകത്തുനിന്നു തിടമ്പുമായി വരുമ്പോള് ആരും പറയാതെ തന്നെ വലംകാല് അമര്ത്തി ഇരിക്കുകയും പുറത്തു തിടമ്പു കയറ്റി എല്ലാവരും ഇരുന്നു എന്നുറപ്പാകുന്നതുവരെ അനങ്ങുക പോലുമില്ല. മാത്രവുമല്ല ഒരിക്കല്പ്പോലും തിടമ്പേറ്റിയ ശേഷം പത്മനാഭന് വികൃതി കാട്ടിയിട്ടില്ല.
ഗോപുരം കടന്നു അകത്തേക്കു വരുമ്പോഴും പോകുമ്പോഴും ശ്രീലകത്തിനു മുന്നില് നിന്നു തുമ്പി ഉയര്ത്തി വണങ്ങും. ഉത്സവസമയത്ത് തിടമ്പു പുറത്തേക്കെടുക്കുന്ന സമയത്തു ഭവ്യതയോടെ തല താഴ്ത്തി നില്ക്കുന്ന പത്മനാഭനെ കണ്ടവരാരും പിന്നീടൊരിക്കലും മറക്കില്ല. എഴുന്നള്ളിച്ചു നിര്ത്തുമ്പോഴെല്ലാം തുടര്ച്ചയായി പത്മനാഭന് ചെവിയാട്ടിക്കൊണ്ടേയിരിക്കും. ലക്ഷണമൊത്ത കൊമ്പനെ ഉത്സവമെഴുന്നള്ളിപ്പിനു കൊണ്ടുവരാന് ആനക്കമ്പക്കാര് മത്സരിച്ചതോടെ പത്മനാഭന്റെ ഏക്കത്തുക ലക്ഷങ്ങളിലെത്തി.
2004 ഏപ്രിലില് ഗുരുവായൂര് ദേവസ്വം ഗജരത്നപ്പട്ടം നല്കി. അസംഖ്യം ക്ഷേത്രങ്ങളില്നിന്നും പൂരപ്പറമ്പുകളില്നിന്നും ലഭിച്ച ബഹുമതികള് അനവധിയാണ്. പത്മനാഭന്റെ വിയോഗത്തില് പലരും വിതുമ്പുകയാണ്. പത്മനാഭനെ അവസാനമായി കാണാന് ജനപ്രവാഹമാണ്.
"
https://www.facebook.com/Malayalivartha