ഈ സര്‍ക്കാര്‍ അധികാരത്തില്‍ വന്നശേഷം വൈദ്യുതി മോഷണത്തിനുള്ള പിഴ ഇനത്തില്‍ 15,76,29,660 രൂപ ഈടാക്കിയിട്ടുണ്ടെന്ന് മന്ത്രി ആര്യാടന്‍ മുഹമ്മദ്, റോഷി അഗസ്റ്റിന്‍, എന്‍. ജയരാജ്, എം.വി ശ്രേയാംസ്‌കുമാര്‍, പി.സി ജോര്‍ജ് എന്നിവരെ അറിയിച്ചു. സര്‍ക്കാര്‍ പ്രഖ്യാപിച്ച സൗരോര്‍ജ നയംവഴി 2017നകം 500 മെഗാവാട്ടും 2030നകം 2500 മെഗാവാട്ടും സൗരോര്‍ജത്തില്‍ നിന്നും ഉല്‍പാദിപ്പിക്കാനാണ് ലക്ഷ്യമെന്ന് വര്‍ക്കല കഹാര്‍, വി.ഡി സതീശന്‍, എം.എ വാഹിദ് എന്നിവരെ അറിയിച്ചു. കഴിഞ്ഞ വര്‍ഷം ഡിസംബര്‍ 31ലെ കണക്കുപ്രകാരം 1699.90 കോടി രൂപ കെ.എസ്.ഇ.ബിക്ക് പിരിഞ്ഞുകിട്ടാറുണ്ടെന്ന് കെ എസ് സലീഖയെ അറിയിച്ചു. സംസ്ഥാന സര്‍ക്കാര്‍ സ്ഥാപനങ്ങളുടെ 113.20 കോടിയും കേന്ദ്രസര്‍ക്കാര്‍ സ്ഥാപനങ്ങളുടെ 0.38 കോടിയും സംസ്ഥാന പൊതുമേഖലാ സഹകരണ സ്ഥാപനങ്ങളുടെ 909.53 കോടിയും കേന്ദ്രപൊതുമേഖലാ സ്ഥാപനങ്ങളുടെ 36.07 കോടിയും തദ്ദേശസ്ഥാപനങ്ങളുടെ 4.39 കോടിയും സ്വയംഭരണസ്ഥാപനങ്ങളുടെ 2.45 കോടിയും കുടിശിക ഉള്‍പടെയുള്ളതാണിത്.

ഇതിനുപുറമെ സ്വകാര്യസ്ഥാപനങ്ങളും വ്യക്തികളും വരുത്തിയ കുടിശിക 615.99 കോടിയാണ്. ഇതില്‍ 333.43 കോടി വിവിധ കേസുകളിപ്പെട്ട് തടസ്സപ്പെട്ടു കിടക്കുകയാണ്. യു.ഡി.എഫ് സര്‍ക്കാര്‍ അധികാരമേല്‍ക്കുമ്പോള്‍ കെ.എസ്.ഇ.ബിയിലെ കുടിശിക 1191.01 കോടി രൂപയായിരുന്നു. ഈ മാര്‍ച്ച് ഒന്നിലെ കണക്കനുസരിച്ച് വൈദ്യുതി ബോര്‍ഡിന് കീഴിലുള്ള ജലസംഭരണികളില്‍ 2592 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കാനുള്ള ജലമുണ്ട്. കഴിഞ്ഞവര്‍ഷം ഇതേകാലയളവില്‍ 2222 ദശലക്ഷം വൈദ്യുതി ഉല്‍പാദിപ്പിക്കാനുള്ള ജലം ഉണ്ടായിരുന്നു. കഴിഞ്ഞ വര്‍ഷത്തെ അപേക്ഷിച്ച് 370 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കാനുള്ള ജലം അധികമായുണ്ട്. സംസ്ഥാനത്ത് വൈദ്യുതി ഉപയോഗം കൂടുതലുള്ള മാര്‍ച്ച്, ഏപ്രില്‍ മാസങ്ങളില്‍ പവര്‍കട്ടും ലോഡ്‌ഷെഡിങും നടപ്പാക്കാതിരിക്കാനാണ് ശ്രമിക്കുന്നതെന്ന് കെ.എന്‍.എ ഖാദറിനെ മന്ത്രി അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha