സംസ്ഥാന ബജറ്റിന് ഒരു ദിവസം മാത്രം ശേഷിക്കേ കൂടുതല്‍ മന്ത്രിമാര്‍ ബാര്‍ കോഴ ആരോപണത്തിന് വിധേയരാകുന്നു. സര്‍ക്കാരിലെ പ്രബലന്മാരായ 3 മന്ത്രിമാരുടെ പേരുകളാണ് ഇപ്പോള്‍ പുതിയ ശബ്ദരേഖയിലൂടെ വെളിയില്‍ വന്നിരിക്കുന്നത്. ആഭ്യന്തര മന്ത്രി രമേശ് ചെന്നിത്തല, കെ ബാബു, വി എസ് ശിവകുമാര്‍ എന്നീ മന്ത്രിമാര്‍ കോഴ വാങ്ങിയെന്ന് പറയുന്ന ശബ്ദ രേഖയാണ് പുറത്ത് വന്നത്. ബാര്‍ ഹോട്ടല്‍ ഉടമാ അസോസിയേഷന്‍ യോഗത്തിലെ ശബ്ദരേഖയാണ് ഇത് വ്യക്തമാക്കുന്നത്.
കെപിസിസി ഓഫീസില്‍ വച്ച് രമേശ് ചെന്നിത്തലയ്ക്ക് പണം കൊടുത്തില്ലേ എന്ന് ബിജു രമേശ് ശബ്ദരേഖയില്‍ ചോദിക്കുന്നുണ്ട്. ഇതിന് കൈക്കൂലി കൊടുത്തുവെന്ന് ഒരു ബാറുടമ മറുപടി പറയുന്നു. എല്ലാം പറഞ്ഞാല്‍ രമേശ് ചെന്നിത്തല പ്രതിയാവില്ലേ എന്ന് ബിജു രമേശിന്റെ ചോദ്യം. അങ്ങനെ പറഞ്ഞാല്‍ കെ ബാബുവും വി എസ് ശിവകുമാറും പ്രതിയാകില്ലേ എന്നും ബിജു രമേശ് പറയുന്നു. നമ്മളെല്ലാം പറഞ്ഞാല്‍ ഇവരെല്ലാം പെട്ടുപോകുമെന്നും ഒരു ബാറുടമ പറയുന്നു. സത്യം പുറത്ത് വന്നാല്‍ നാലഞ്ച് മന്ത്രിമാര്‍ പുറത്തു പോകും. ഒന്നുകില്‍ എല്ലാം പുറത്ത് പറഞ്ഞ് എല്ലാം കത്തിക്കണമെന്നും ബാറുടമകള്‍ പറയുന്നു.
ശിവകുമാറിന് നെയ്യാറ്റിന്‍കരിയിലെ വീട്ടില്‍ പോയി 20 ലക്ഷം രൂപ നല്‍കിയെന്നാണ് ആരോപണം ഉയരുന്നത്. കപ്യൂട്ടറൈസ് ചെയ്ത ഡെലിവറിങ് യൂണിറ്റ് മാനുവലാക്കാന്‍ മാണി ഒരു കോടി രൂപ ചോദിച്ചെന്ന് ഇതേ യോഗത്തില്‍ വെളിപ്പെടുത്തലുണ്ട്. ഇത് പ്രകാരം അത് മാനുവലാക്കി പിന്നീട് നമ്മുടെ ഫീസ് കൂട്ടാന്‍ തീരുമാനിച്ചു. അതും മാണിയുടെ സമ്മര്‍ദ്ദ തന്ത്രമായിരുന്നു എന്ന് ബിജു രമേശ് പറയുന്നു.

കാശ് വാങ്ങാത്തത് നന്നായി എന്ന് സാഹിബ് പറഞ്ഞതായി യോഗത്തില്‍ ബാറുടമ വി എം രാധാകൃഷ്ണന്‍ പറയുന്നു. താനൊഴികെ എല്ലാവരും പണം വാങ്ങിയതായി സാഹിബ് സമ്മതിച്ചുവെന്നും രാധാകൃഷ്ണന്റെ ശബ്ദമുണ്ട്. മന്ത്രി പികെ കുഞ്ഞാലിക്കുട്ടിയെയാണ് താന്‍ സാഹിബ് എന്ന് വിളിക്കുന്നതെന്ന് വി എം രാധാകൃഷ്ണന്‍ സമ്മതിക്കുകയും ചെയ്തു. നിയമസഭ നടന്നുകൊണ്ടിരിക്കെ സര്‍ക്കാരിനെ വെട്ടിലാക്കുന്നതാണ് പുതിയ ശബ്ദരേഖ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha