ബജറ്റ് ഉപരോധം തലസ്ഥാനത്തെ ക്രമസമാധാനം താറുമാറാക്കും. ഏത് അടിയന്തര ഘട്ടത്തെയും നേരിടാന്‍ സജ്ജമായി പോലീസും ഗത്യന്തരമില്ലാതെ പറഞ്ഞ വാക്കുപാലിക്കാന്‍ സിപിഎമ്മും നിരത്തിലിറങ്ങുന്നതോടെ തലസ്ഥാനത്ത് യുദ്ധസമാനമായ സാഹചര്യം ഉണ്ടാകുമെന്നുറപ്പ്. മുന്‍ നിരയില്‍ ഗുണ്ടകളെയും, അധോലോക സംഘങ്ങളെയും ഉള്‍പ്പെടുത്തി ശക്തമായ പ്രതിരോധമാണ് സിപിഎം ആസൂത്രണം ചെയ്യുന്നത്. സമരം അക്രമത്തിലേക്ക് വഴുതി വീഴാനാണ് സാധ്യത. എന്തിനും തയ്യാറായി നില്‍ക്കുന്ന ചാവേറുകളുടെ ആക്രമണ നിരയും തൊട്ടു പിന്നില്‍ സംരക്ഷിത വലയത്തിലായിരിക്കും നേതാക്കള്‍.

കൈവിട്ട കളിക്ക് അണികളെ ആഹ്വാനം ചെയ്ത വി. ശിവന്‍കുട്ടി ചാനല്‍ ചര്‍ച്ചയില്‍ പറഞ്ഞത് വീട്ടിലേക്കു തിരിച്ചു ചെല്ലും എന്നുറപ്പില്ലാതെയാണ് 13 ന് നിയമസഭയിലെത്തുകയെന്നാണ്. ഇതു അണികളെ ആവേശം കൊള്ളിക്കാനുദ്ദേശിച്ചാണ്. തിരുവനന്തപുരം ജില്ലയിലെ അന്യസംസ്ഥാന തൊഴിലാളി ക്യാമ്പില്‍ നിന്നും ആളുകളെ കൂട്ടമായെത്തിക്കാന്‍ ശ്രമം നടക്കുന്നുണ്ട്.
സ്ത്രീകളെ കൂടുതലായെത്തിച്ച് സമരം കൊഴുപ്പിക്കാമെന്ന ആദ്യ തീരുമാനം ഇപ്പോള്‍ തിരുത്തി. തൊട്ടടുത്ത് നിലയുറപ്പിക്കുന്ന യുവ മോര്‍ച്ച പ്രവര്‍ത്തകര്‍ അവതാളത്തിലാകും. സര്‍ക്കാര്‍ ഇടതു പക്ഷത്തിനും, യുവമോര്‍ച്ചയ്ക്കും സംരക്ഷിത അകലം സമരമേഖലയില്‍ കൊടുത്താലും പരസ്പര തള്ളിക്കയറ്റത്തില്‍ നയം പാളും.
സമരത്തിലേക്ക് മാരകായുധങ്ങളുമായി കടന്നു വരാതിരിക്കാന്‍ പോലീസ് പ്രത്യേകം ശ്രദ്ധിക്കുന്നുണ്ട്. എങ്കിലും സ്റ്റുഡന്റ്‌സ് സെന്റര്‍, സമീപത്തെ ചില വീടുകള്‍ എന്നിവ കേന്ദ്രീകരിച്ച് വന്‍ ആയുധശേഖരവും ഇതിനകം നടത്തിയിട്ടുണ്ട് എന്നറിയുന്നു. ഇന്നു വൈകിട്ട് ഈ മേഖലയില്‍ ശക്തമായ പോലീസ് റെയ്ഡ് ഉണ്ട് എന്നറിയുന്നു. സമരത്തെ തുടര്‍ന്നുള്ള പോലീസ് നടപടിയില്‍ ചിതറിയോടുന്ന പ്രവര്‍ത്തകര്‍ തൊട്ടടുത്ത വീടുകളിലേക്ക് ഓടി കയറും എന്നു പേടിച്ച് പരിസരവാസികള്‍ വീടുപൂട്ടി കൂട്ടത്തോടെ ബന്ധുവീടുകളിലേക്ക് പോയി തുടങ്ങി. ഇന്നു വൈകിട്ടു മുതല്‍ ഉപരോധമാരംഭിക്കുമെന്ന സിപിഎം പ്രഖ്യാപനം സ്ഥലവാസികളില്‍ ഏറെ പരിഭ്രാന്തിയുളവാക്കിയിട്ടുണ്ട്.
ജനകീയ സമരങ്ങളില്‍ നിന്നു വ്യത്യസ്തമായി അക്രമമഴിച്ചു വിട്ട് അരാജകത്വം സൃഷ്ടിച്ചുള്ള ഈ സമരരീതിയോട് തലസ്ഥാനം അമര്‍ഷത്തോടെയാണ് പ്രതികരിക്കുന്നത്. സോളാര്‍ സമരത്തിന്റെ നാണക്കേടു മാറ്റാന്‍ ശ്രമിച്ച് ഭീകരാന്തരീക്ഷം സൃഷ്ടിക്കുന്ന ഈ സമരത്തിന് ഒരുപക്ഷെ ഇടതുപക്ഷം വലിയ വിലകൊടുക്കേണ്ടി വന്നേക്കാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha