തലസ്ഥാനത്ത് പ്രതിഷേധത്തിന്റെ കൊടുംകാറ്റ് വീശുന്നു, ശക്തമായ സുരക്ഷാ സന്നാഹം ഒരുക്കി പോലീസ്, എന്തും നേരിടാന്‍ തയ്യാറായി പോലീസ് സന്നാഹം
പ്രതിഷേധത്തിന്റെ കൊടുംകാറ്റ് വീശി തലസ്ഥാനം. നാളെ ധനമന്ത്രി കെ.എം. മാണി ബജറ്റ് അവതരിപ്പിക്കാനിരിക്കെ തലസ്ഥാനത്ത് ശക്തമായ സുരക്ഷാ സന്നാഹങ്ങളാണ് പൊലീസ് ഒരുക്കിയിരിക്കുന്നത്. നഗരത്തിന്റെ പല ഭാഗങ്ങളിലായി 2500 പൊലീസുകാരെയാണ് വിന്യസിച്ചിരിക്കുന്നത്. അഞ്ച് എസ്.പിമാരാണ് സുരക്ഷാ ക്രമീകരണങ്ങള്‍ക്ക് നേതൃത്വം നല്‍കുന്നത്. നിയമസഭയ്ക്ക് ചുറ്റുമുള്ള സുരക്ഷയും ശക്തമാക്കിയിട്ടുണ്ട്. നിയമസഭയുടെ എല്ലാ കവാടങ്ങളും പൊലീസ് വലയത്തിലാക്കും. സന്ദര്‍ശകരെ നിയമസഭാ വളപ്പിലേക്ക് കടത്തി വിടില്ല. നിയമസഭയ്ക്ക് ചുറ്റമുള്ള എല്ലാ റോഡുകളിലും പൊലീസ് പിക്കറ്റ് ഏര്‍പ്പെടുത്തും. പട്ടം, ജനറല്‍ ആശുപത്രി, വെള്ളയമ്പലം ഭാഗത്തുനിന്നും വാഹനങ്ങള്‍ വഴിതിരിച്ചുവിടും. പ്രതിഷേധക്കാരെ ബാരിക്കേഡ് ഉപയോഗിച്ച് തടയും. ബാരിക്കേഡ് മറി കടക്കാന്‍ ശ്രമിച്ചാല്‍ അറസ്റ്റ് ഉണ്ടാകും.
ബഡ്ജറ്റ് അവതരണ ദിനമായ നാളെ മന്ത്രിമാരേയും എം.എല്‍.എമാരേയും സുരക്ഷിതരായി സഭയിലെത്തിക്കുമെന്ന് ഐ.ജി. മനോജ് എബ്രഹാം പറഞ്ഞു. അക്രമസാധ്യതയുണ്ടെന്നാണ് ഇന്റലിജന്‍സില്‍ നിന്നും ലഭിക്കുന്ന റിപ്പോര്‍ട്ടെന്നും അക്രമമുണ്ടായാല്‍ ശക്തമായി പ്രതിരോധിക്കുമെന്നും മനോജ് വ്യക്തമാക്കി. നാളെ രാവിലെ അഞ്ച് മുതല്‍ പി.എം.ജി ജംഗ്ഷന്‍ വഴി നിയമസഭയിലേക്കുള്ള റോഡ് എല്‍ഡിഎഫ് പ്രവര്‍ത്തകര്‍ ഉപരോധിക്കും. ഇന്നു രാത്രിമുതല്‍ ഡിവൈഎഫ്‌ഐ പ്രവര്‍ത്തകര്‍ ഈ ഗേറ്റിലുണ്ടാകും. യുവമോര്‍ച്ച യുദ്ധസ്മാരക വഴി ഉപരോധിക്കും.
മാണിയെ ബഡ്ജറ്റ് അവതരിപ്പിക്കാന്‍ അനുവദിക്കില്ലെന്ന് ഇടതുപക്ഷ മുന്നണിയും ബി.ജെ.പിയും ആവര്‍ത്തിച്ചു. ഇന്ന് സഭ അവസാനിച്ചിട്ടും പിരിഞ്ഞു പോകാന്‍ കൂട്ടാക്കാതെ പ്രതിപക്ഷാംഗങ്ങള്‍ നിയമസഭയില്‍ തന്നെ തുടരുകയാണ്. നാളെ ബഡ്ജറ്റ് അവതരിപ്പിക്കാനെത്തുന്ന മാണിയെ നിയമസഭാ ഹാളിനകത്തേക്ക് പ്രവേശിപ്പിക്കുന്നത് തടയുകയാണ് പ്രതിപക്ഷത്തിന്റെ ലക്ഷ്യം. നിയമസഭയുടെ അഞ്ച് കവാടങ്ങളും ഉപരോധിക്കാനാണ് തീരുമാനം. കോടിയേരിയുടെയും വി.എസിന്റെയും നേതൃത്വത്തിലാകും ഉപരോധം നടക്കുക. സഭയില്‍ തങ്ങില്ലെന്ന് മാണി നേരത്തെ പറഞ്ഞിരുന്നു. എന്നാല്‍ ഇന്ന് അദ്ദേഹം നിയമസഭാ വിട്ടു പുറത്തു പോകാന്‍ സാധ്യതയില്ല എന്നാണ് അറിയുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
