എല്‍ഡിഎഫിന്റെയും -യുവമോര്‍ച്ചാ ബിജെപി പ്രവര്‍ത്തകരുടേയും നേതൃത്വത്തിലുള്ള ഉപരോധ സമരം തുടങ്ങി. നിയമസഭയ്ക്കകത്ത് മാണിയെ ബജറ്റ് അവതരിപ്പിക്കാന്‍ സമ്മതിക്കില്ലെന്ന ഉറച്ച തീരുമാനത്തില്‍ പ്രതിപക്ഷ എംഎല്‍മാര്‍ സഭയ്ക്കകത്ത് നിലയുറപ്പിച്ചിട്ടുണ്ട്. എന്ത് വന്നാലും തടയുമെന്ന രീതിയില്‍ പോലീസും സഭയ്ക്ക് പുറത്ത് സമരക്കാരെ നേരിടാന്‍ തയ്യാറായി നിലകൊള്ളുന്നു. ആകെ കൂടി തലസ്ഥാന നഗരം യുദ്ധ സമാനമായ അന്തരീക്ഷത്തിലാണ്. എല്‍ഡിഎഫ് -ബിജെപി പ്രവര്‍ത്തകര്‍ വെവ്വേറെയാണ് നിയമസഭ ഉപരോധിക്കുന്നത്. സംഘര്‍ഷ സാധ്യത കണക്കിലെടുത്ത് വന്‍ പോലീസ് സന്നാഹവും ഇവര്‍ക്കൊപ്പമുണ്ട്.
എന്തുവന്നാലും മാണി തന്നെ ഇന്ന് രാവിലെ ഒമ്പതിന് ബഡ്ജറ്റ് അവതരിപ്പിക്കുമെന്ന തീരുമാനത്തിലുറച്ചാണ്  ഭരണപക്ഷവും നിലകൊള്ളുന്നത്. മാണി നിയമസഭയ്ക്കുള്ളില്‍ പ്രവേശിക്കുന്നത് തടയാന്‍ പ്രതിപക്ഷ നേതാവ് വി എസ്. അച്യുതാനന്ദന്റെ നേതൃത്വത്തില്‍ പ്രതിപക്ഷം ഇന്നലെ ഉച്ച മുതല്‍ സഭയ്ക്കുള്ളില്‍ കുത്തിയിരിക്കുകയാണ്. രാത്രി സഭയ്ക്കുള്ളില്‍ ഉറങ്ങി രാവിലെ സഭയിലേക്കുള്ള അഞ്ചു വാതിലുകളും ഉപരോധിക്കാനാണ് പ്രതിപക്ഷ നീക്കം. കീഴ്‌വഴക്കം ലംഘിച്ച് സ്പീക്കറുടെ ചേമ്പര്‍ വഴി മാണി വന്നാല്‍ സഭയില്‍ ഇറങ്ങാന്‍ അനുവദിക്കാതെ അവിടെയും തടയാനാണ് നീക്കം. മറുതന്ത്രമെന്നോണം മുഖ്യമന്ത്രിയും മന്ത്രി മാണിയുമടക്കം ഭരണപക്ഷ അംഗങ്ങളും നിയമസഭാ മന്ദിരത്തില്‍ തന്നെ തങ്ങുകയാണ്.
പ്രതിപക്ഷം സഭയ്ക്കുള്ളിലാണെങ്കില്‍ ഭരണപക്ഷം സഭാ മന്ദിരത്തില്‍ കഴിഞ്ഞൂ എന്ന വ്യത്യാസമേയുള്ളു. പുറത്തെ വിഷയങ്ങള്‍ ഇടതു മുന്നണി ഉപസമിതിയും അകത്തെ തന്ത്രങ്ങള്‍ പാര്‍ലമെന്ററി പാര്‍ട്ടിയും തീരുമാനിക്കും. നിയമസഭാ മന്ദിരത്തിലെ ഔദ്യോഗിക മുറിയില്‍ വാച്ച് ആന്‍ഡ് വാര്‍ഡിന്റെ സുരക്ഷാവലയത്തിലാണ് മാണി. ഇന്നലെ രാത്രി അച്ചടിച്ച ബഡ്ജറ്റ് പ്രസംഗം വെളുപ്പിന് പൊലീസ് നിയമസഭാ മന്ദിരത്തില്‍ എത്തിക്കും.
ബാര്‍ കേസില്‍ പ്രതിചേര്‍ത്ത മാണിയെ ബജറ്റ് അവതരണത്തില്‍ നിന്നു വിലക്കണമെന്ന ആവശ്യം തള്ളിയതോടെയാണ് എല്‍ഡിഎഫിന്റെ ബജറ്റ് ദിന പ്രതിഷേധം. സഭയില്‍ ഇന്നലെ വീണ്ടും ബാര്‍ പ്രശ്‌നം ഉയര്‍ത്തിയ പ്രതിപക്ഷം പ്രതിഷേധത്തിനൊടുവില്‍ അവിടെ കുത്തിയിരിപ്പു പ്രഖ്യാപിച്ചു. എല്‍ഡിഎഫ് തന്ത്രം വ്യക്തമായതോടെ പുറത്തെ സംഘര്‍ഷം ഒഴിവാക്കാമെന്നു യുഡിഎഫ് നേതൃത്വം തീരുമാനിച്ചു. സഭാസമുച്ചയത്തില്‍ തന്നെ മാണിക്കു തങ്ങാന്‍ സൗകര്യമൊരുക്കി.
നിയമസഭയിലേക്കുള്ള എല്ലാ വഴികളും ഇന്നലെ ഉച്ചയ്ക്കു ശേഷം പൊലീസ് ബാരിക്കേഡ് വച്ച് തടഞ്ഞു. ഏതു സാഹചര്യവും നേരിടാന്‍ രണ്ടായിരത്തിലേറെ പൊലീസ് തയ്യാറെടുത്തു കഴിഞ്ഞു. വൈകിട്ടോടെ യുവമോര്‍ച്ച പ്രവര്‍ത്തകരും രാത്രിയോടെ ഇടതു മുന്നണി പ്രവര്‍ത്തകരും നിയമസഭയിലേക്കുള്ള വഴികളില്‍ നിരന്നു. നഗരത്തിലെ മദ്യശാലകള്‍ ഇന്നലെ തന്നെ അടച്ചു. നഗരത്തിനുള്ളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി നല്‍കി. പാളയം യുദ്ധ സ്മാരകത്തിലൂടെ നിയമസഭയിലേക്കുള്ള വഴി യുവമോര്‍ച്ചയ്ക്കും പി.എം.ജി, എല്‍.എം.എസ് വഴികള്‍ ഇടതു മുന്നണിക്കുമാണ് പൊലീസ് അനുവദിച്ചിട്ടുള്ളത്.
മന്ത്രിമാരായ കെ. ബാബു, എം.കെ. മുനീര്‍, പി.കെ. അബ്ദുറബ്ബ്, പി.കെ. ജയലക്ഷ്മി, മഞ്ഞളാംകുഴി അലി തുടങ്ങിയവരും സഭാ സമുച്ചയത്തില്‍ തന്നെ തങ്ങുകയാണ്. മുഖ്യമന്ത്രി ഉമ്മന്‍ ചാണ്ടിയും മന്ത്രി രമേശ് ചെന്നിത്തലയും അടക്കമുള്ളവരും രാത്രി വൈകിയും അവിടെ തുടര്‍ന്നു. ഇന്നലെ ചുമതലയേറ്റ സ്പീക്കര്‍ എന്‍. ശക്തന്‍ സംഘര്‍ഷത്തിന് അയവുണ്ടാക്കാനായി പ്രതിപക്ഷ നേതാവ് വി എസ്. അച്യുതാനന്ദനുമായി ചര്‍ച്ച നടത്തിയെങ്കിലും പ്രയോജനം ചെയ്തില്ല. സിപിഐ(എം) സംസ്ഥാന സെക്രട്ടറി കോടിയേരി ബാലകൃഷ്ണനും മന്ത്രി രമേശ് ചെന്നിത്തലയും സഭാസമുച്ചയത്തില്‍ കണ്ടുമുട്ടിയപ്പോഴത്തെ ചര്‍ച്ചയും പിരിമുറുക്കം കുറച്ചില്ല.
സമരതന്ത്രങ്ങള്‍ വിലയിരുത്തി എല്‍ഡിഎഫ് ഉപസമിതി ഇന്നലെ രണ്ടുവട്ടം ചേര്‍ന്നു. എല്‍ഡിഎഫ് നിയമസഭാകക്ഷി യോഗം വൈകിട്ട് സഭയിലും ചേര്‍ന്നു. യുവമോര്‍ച്ചയും നിയമസഭ വളയല്‍ സമരം പ്രഖ്യാപിച്ചിരിക്കുന്നതിനാല്‍ ഇടകലരാതെ രണ്ടു സമരം ഉണ്ടാകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha