ഹര്ത്താലിനെ വെല്ലുവിളിച്ച് ജയറാമിന്റെ സൈക്കിള് സവാരി
ഹര്ത്താല് ആണെങ്കിലും ബന്ദാണെങ്കിലും തന്റെ ശീലമായ സൈക്കിള് സവാരി ഒഴിവാക്കാന് ജയറാമിന് ആകില്ല. ഹര്ത്താലില് ഒഴിഞ്ഞ റോഡിലൂടെ സൈക്കിള് ചവിട്ടി ജയറാം ശ്രദ്ധേയമായി. തിരുവനന്തപുരത്ത് ഷൂട്ടിങ്ങിനെത്തിയ ജയറാം ഹര്ത്താല് ദിനത്തില് രാവിലെ സൈക്കിളുമായി പതിവു വ്യായാമത്തിന് ഇറങ്ങി.
ഹര്ത്താലിനെ തുടര്ന്ന് ഷൂട്ടിങ് മാറ്റിവച്ചെങ്കിലും തന്റെ പതിവു വ്യായാമം മുടക്കാന് ജയറാം ഒരുക്കമായിരുന്നില്ല. വഴുതക്കാട് താജ് വിവാന്തയിലാണ് ജയറാം താമസിച്ചത്. അവിടെ നിന്നു രാവിലെ സവാരി ആരംഭിച്ച ജയറാം ചാല, പത്മനാഭസ്വാമി ക്ഷേത്രം വഴി സെക്രട്ടേറിയറ്റിനു മുന്നിലെത്തി. പിന്നീട് തമ്പാനൂര്, ബേക്കറി ജങ്ഷന് വഴി ഹോട്ടലില് മടങ്ങിയെത്തി.
കൊച്ചി തൃപ്പൂണിത്തുറയിലെ വീട്ടില് താമസിക്കുമ്പോള് സൈക്കിള് സവാരിക്കു കൂട്ട് നടന് മമ്മൂട്ടിയാണ്. പുലര്ച്ചെ നാലിന് എഴുന്നേറ്റു കാറില് സൈക്കിളുമായി പനമ്പിള്ളി നഗറിലെ മമ്മൂട്ടിയുടെ വീടിനു മുന്നിലെത്തും. സൈക്കിളില് ഒരു റൗണ്ട് അടിക്കുമ്പോഴേക്കും മമ്മൂട്ടിയും സൈക്കിളുമായി ഇറങ്ങും. ഒപ്പം തങ്ങളുടെ സൈക്കിളുമായി മേക്കപ്പ്മാന് ജോര്ജ്, ട്രെയ്നര് സുനില് എന്നിവരുമെത്തും. ദിവസം 25 കിലോമീറ്ററാണ് ഇവര് സൈക്കിളില് സഞ്ചരിക്കുക. കണക്ക്. ഓരോ ദിവസത്തെയും റൂട്ട്, കലോറി ഇതിന്റെയെല്ലാം വിവരം മമ്മൂട്ടിയുടെ മൊബൈല് ആപ്പിലുണ്ട്. റോഡില് തിരക്കാകും മുമ്പേ ഏഴു മണിയോടെ തിരിച്ചെത്തും.
ചെന്നൈയിലാകുമ്പോള് അവിടത്തെ റേസ് കോഴ്സ് ഗ്രൗണ്ടിനു ചുറ്റുമാണു ജയറാമിന്റെ സൈക്കിള് സവാരി. പുലര്ച്ചെ അഞ്ചിന് ഇറങ്ങും. ഗ്രൗണ്ട് ഒന്നു വലംവയ്ക്കുമ്പോള് രണ്ടു കിലോമീറ്ററാകും. ഇങ്ങനെ 12 റൗണ്ട് എങ്കിലും ദിവസവും ചവിട്ടും. കൊച്ചിയില് തങ്ങള് സൈക്കിള് ചവിട്ടുമ്പോള് വലിയ ലോറികള് സമീപത്തു കൂടി പാഞ്ഞു പോകാറുണ്ട്. വിദേശ രാജ്യങ്ങളിലേതു പോലെ കേരളത്തിലും സൈക്കിള് യാത്രയ്ക്കായി പ്രത്യേക ട്രാക്ക് നിര്മ്മിക്കണമെന്നാണ് ജയറാമിന്റെ ആവശ്യം.
അമേരിക്കയില് നിര്മ്മിച്ച ട്രക്ക് എന്ന 18 ഗിയറുള്ള സൈക്കിളാണ് ജയറാം ഉപയോഗിക്കുന്നത്. 40 കിലോമീറ്റര് വേഗത്തില് ഈ സൈക്കിളില് സഞ്ചരിക്കാം. ജയറാം എവിടെ ഷൂട്ടിങ്ങിനു പോയാലും ഈ സൈക്കിളും ഒപ്പം കരുതും. തലസ്ഥാനത്തു \'തിങ്കള് മുതല് വെള്ളി വരെ\' എന്ന സിനിമയുടെ ഷൂട്ടിങ്ങിനാണ് താരം എത്തിയത്. കഴിഞ്ഞ രണ്ടാഴ്ചയായി ദിവസവും പുലര്ച്ചെ നഗരത്തിലൂടെ സൈക്കിള് ചവിട്ടാറുണ്ടെങ്കിലും ഹെല്മറ്റ് വച്ചിരിക്കുന്നതിനാല് ആരും തിരിച്ചറിയാറില്ല.
ഹര്ത്താല്മൂലം റോഡുകള് വിജനമായതിനാല് സൈക്കിള് ആസ്വദിച്ചു ചവിട്ടാനായെന്നാണു ജയറാം പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
