ബജറ്റ് ദിന പ്രതിഷേധത്തില്‍ പ്രതിപക്ഷം അടിയന്തര പ്രമേയ നോട്ടീസ് നല്‍കി
ബജറ്റ് ദിനത്തില്‍ നിയമസഭയില്‍ നടത്തിയ പ്രതിപക്ഷ പ്രതിഷേധത്തിനിടെ എംഎല്‍എമാരെ ആക്രമിച്ച ഭരണകക്ഷി എംഎല്‍എമാര്‍ക്കെതിരെ നടപടി എടുക്കണമെന്ന് ആവശ്യപ്പെട്ട് പ്രതിപക്ഷം അടിയന്തര പ്രമേയത്തിന് നോട്ടീസ് നല്‍കി. വാച്ച് ആന്‍ഡ് വാര്‍ഡിനെയും ഗുണ്ടകളെയും ഉപയോഗിച്ച് പ്രതിപക്ഷത്തെ ആക്രമിച്ചെന്നാണ് ആരോപണം. പ്രമേയം ശൂന്യവേളയില്‍ അവതരിപ്പിക്കും. പ്രതിപക്ഷ ഉപനേതാവും സിപിഎം സംസ്ഥാന സെക്രട്ടറിയുമായ കോടിയേരി ബാലകൃഷ്ണനാണ് നോട്ടീസ് നല്‍കിയത്.
പ്രതിപക്ഷ നേതാവടക്കം 13 എംഎല്‍എമാരാണ് ഭരണപക്ഷ എംഎല്‍എമാര്‍ക്കെതിരെ പരാതി നല്‍കിയത്. അതേസമയം, അച്ചടക്കലംഘനം നടത്തിയ എംഎല്‍എമാര്‍ക്കെതിരെ ഇന്ന് സ്പീക്കര്‍ നടപടിയെടുത്തേക്കും. വി.ശിവന്‍കുട്ടി ഉള്‍പ്പെടെയുള്ള ഇടത് എംഎല്‍എമാര്‍ക്കെതിരെ നടപടി വന്നേക്കും. ഈ സമ്മേളന കാലയളവില്‍ മുഴുവന്‍ സസ്‌പെന്‍ഡ് ചെയ്യുന്നതു പോലുള്ള കടുത്ത തീരുമാനങ്ങള്‍ ഉണ്ടാകുമെന്നാണ് വിവരം.
നിയമസഭ ചേരുന്നതിന് വിഘാതമുണ്ടാക്കി, സ്പീക്കറുടെ വേദിക്കു കേടുവരുത്തി, ഉപകരണങ്ങള്‍ നശിപ്പിച്ചു, ഭരണപക്ഷ എംഎല്‍എമാരെ ആക്രമിച്ചു തുടങ്ങി നീണ്ട ആരോപണങ്ങളാണ് ഇടത് എംഎല്‍എമാര്‍ക്കെതിരെ ഉള്ളത്. സിപിഎമ്മിലെ വി.ശിവന്‍കുട്ടി, കെ.കുഞ്ഞമ്മദ്, ഇ.പി.ജയരാജന്‍ തുടങ്ങിയ പത്തോളം പേര്‍ക്കെതിരെ ഇതിന്റെ പേരില്‍ നടപടിയുണ്ടാകുമെന്നാണ് വിവരം.
പതിമൂന്നാം തീയതിയിലെ സഭാനടപടികള്‍ ചിത്രീകരിച്ച ടെലിവിഷന്‍ ചാനലുകളില്‍ നിന്ന് നിയമസഭാ സെക്രട്ടറിയറ്റ് വിഡിയോ ദൃശ്യങ്ങള്‍ ആവശ്യപ്പെട്ടിരുന്നു. ഇവയും നിയമസഭയിലെ ക്യാമറകളിലെ ദൃശ്യങ്ങളും പരിശോധിച്ച ശേഷമായിരിക്കും സ്പീക്കര്‍ അച്ചടക്കനടപടി പ്രഖ്യാപിക്കുന്നത്. നടപടി പ്രതിപക്ഷത്തില്‍ കേന്ദ്രീകരിക്കാനാണ് സാധ്യതയെന്ന് സ്പീക്കര്‍ എന്‍.ശക്തന്‍ ഇന്നലെ വ്യക്തമായ സൂചന നല്‍കിയിരുന്നു.
സഭയില്‍ അക്രമം കാട്ടിയവര്‍ക്കെതിരെ നടപടി വേണമെന്ന് നിയമസഭാ സെക്രട്ടറിയറ്റും ഗവര്‍ണറും സ്പീക്കറോട് ആവശ്യപ്പെട്ടിരുന്നു. എന്നാല്‍ വനിതാ അംഗങ്ങളെ കയ്യേറ്റം ചെയ്യുകയും ചട്ടവിരുദ്ധമായി സഭയില്‍ ലഡു വിതരണം നടത്തുകയും ചെയ്ത ഭരണപക്ഷ എംഎല്‍എമാര്‍ക്കെതിരെ നടപടിയുണ്ടാകുമോ എന്നത് സഭയുടെ തുടര്‍ന്നുള്ള നടത്തിപ്പില്‍ നിര്‍ണായകമാകും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
