എംഎല്‍എമാര്‍ക്കെതിരെ നടപടിയെടുത്താല്‍ അടുത്ത അങ്കത്തിന് പ്രതിപക്ഷം, നടപടിയെടുത്തേ തീരുവെന്ന് ഭരണ പക്ഷം
വെള്ളിയാഴ്ച നിയമസഭയിലുണ്ടായ സംഭവങ്ങള്‍ക്ക് കാരണക്കാരായ പ്രതിപക്ഷ എം.എല്‍.എമാര്‍ക്കെതിരെ കര്‍ശന നടപടി വേണമെന്ന് ഭരണപക്ഷം സ്പീക്കറോട് ആവശ്യപ്പെട്ടു. അതേസമയം വനിതാ എം.എല്‍.എമാരെ ആക്രമിച്ച ഭരണപക്ഷ എം.എല്‍.എമാര്‍ക്കെതിരെ നടപടി വേണമെന്ന് പ്രതിപക്ഷവും ശക്തമായ നിലപാട് എടുത്തതോടെ നിയമസഭയില്‍ അസാധാരണ പ്രതിസന്ധി രൂപപ്പെട്ടു. പ്രതിപക്ഷ എംഎല്‍എമാര്‍ക്കെതിരെ നടപടിയെടുത്താല്‍ സഭ സ്ഥംഭിക്കുന്നതടക്കമുള്ള നടപടികളിലേക്ക് പ്രതിപക്ഷം നീങ്ങുമെന്ന് മുന്നറിയിപ്പ് നല്‍കിയിട്ടുണ്ട്.
ശൂന്യവേളയില്‍ സ്പീക്കര്‍ വെവ്വേറെ വിളിച്ചു ചേര്‍ത്ത ഭരണ, പ്രതിപക്ഷ കക്ഷി നേതാക്കളുടെ യോഗത്തിലാണ് ഇരു കൂട്ടരും നിലപാടില്‍ ഉറച്ചു നിന്നത്. എം.എല്‍.എമാര്‍ക്കെതിരെ നടപടി എടുത്താല്‍ സഭാ നടപടികളുമായി സഹകരിക്കില്ലെന്നും പ്രതിപക്ഷം വ്യക്തമാക്കിയിട്ടുണ്ട്.
സ്പീക്കറുടെ കസേര മറിച്ചിട്ടതിനും കമ്പ്യൂട്ടറും മൈക്കും തകര്‍ത്തതിനും വി. ശിവന്‍കുട്ടി, ഇ.പി. ജയരാജന്‍, കെ. കുഞ്ഞഹമ്മദ് മാസ്റ്റര്‍, കെ.ടി. ജലീല്‍, കെ. അജിത്, സി.കെ. സദാശിവന്‍ എന്നിവര്‍ക്കെതിരെയും സഭ ചേരേണ്ട സമയത്തിന് തൊട്ടുമുമ്പ് ഡയസിലേക്ക് ഓടിക്കയറി സ്പീക്കറുടെ വഴിയില്‍ ഉപരോധം തീര്‍ത്ത ജെയിംസ് മാത്യു, എ. പ്രദീപ്കുമാര്‍, ബാബു എം. പാലിശേരി എന്നിവര്‍ക്കെതിരെ നടപടി വേണമെന്നുമാണ് ഭരണപക്ഷത്തിന്റെ ആവശ്യം.
എന്നാല്‍ വനിതാ എം.എല്‍.എമാരെ ആക്രമിച്ച ഭരണപക്ഷ എം.എല്‍.എമാരായ കെ. ശിവദാസന്‍ നായര്‍, എം.എ. വാഹിദ്, എ.ടി. ജോര്‍ജ്, ഡൊമിനിക് പ്രസന്റേഷന്‍, മന്ത്രി മാണിക്ക് ചുറ്റും നിന്ന് ലഡു വിതരണം ചെയ്ത കോണ്‍ഗ്രസിന്റെയും ലീഗിന്റെയും കേരള കോണ്‍ഗ്രസിന്റെയും അംഗങ്ങളായ മോന്‍സ് ജോസഫ്, തോമസ് ഉണ്ണിയാടന്‍, സി. മമ്മൂട്ടി, പി.കെ. ബഷീര്‍, ഷാഫി പറമ്പില്‍, ഹൈബി ഈഡന്‍, കെ.എം. ഷാജി തുടങ്ങിയവര്‍ക്കെതിരെ നടപടി വേണമെന്നാണ് പ്രതിപക്ഷത്തിന്റെ ആവശ്യം.
ഇതോടെ നിയമസഭ വീണ്ടും പ്രഷുബ്ദ്ധ രംഗകളിലേക്ക് നീങ്ങുമെന്ന് ഉറപ്പായി, ശൂന്യവേളയില്‍ മുഖ്യമന്ത്രി ഉമ്മന്‍ചാണ്ടിയാണ് സഭയില്‍ അതിക്രമം കാണിച്ച പ്രതിപക്ഷ എംഎല്‍എമാര്‍ക്കെതിരെ നടപടി ആവശ്യപ്പെട്ട് പ്രമേയം അവതരിപ്പിച്ചത്. എന്നാല്‍ ഇത് പ്രതിപക്ഷം എതിര്‍ത്തു. എന്നാല്‍ ഗവര്‍ണര്‍ ഇടപെട്ട സ്ഥിതിക്ക് നടപടിയുണ്ടായേ തീരുവെന്നാണ് ഭരണപക്ഷത്തിന്റെ നിലപാട്. എന്നാല്‍ ഭരണപക്ഷ എംഎല്‍എമാര്‍ക്കെതിരെയും നടപടി എടുത്തില്ലെങ്കില്‍ സമരം ശക്തമാക്കുമെന്ന് പ്രതിപക്ഷം സ്പീക്കറെ അറിയിച്ചിട്ടുണ്ട്. സമവായത്തിനായി ഇരുകൂട്ടരോടും സ്പീക്കര്‍ ചര്‍ച്ച നടത്തുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
