വൈദ്യുതി പോസ്റ്റില്‍ അറ്റകുറ്റപ്പണി നടത്തുന്നതിനിടെ വൈദ്യുതാഘാതമേറ്റു റോഡില്‍ വീണു ലൈന്‍മാന്‍ തലപിളര്‍ന്ന് അതിദാരുണമായി മരിച്ച സംഭവത്തില്‍ ചങ്ങനാശേരി പോലീസ് അന്വേഷണം നടത്തും. ടൗണ്‍ വൈദ്യുതി സെക്ഷനിലെ ലൈന്‍മാന്‍ ഇത്തിത്താനം മലകുന്നം സ്വദേശി കൊച്ചുപറമ്പില്‍ ദേവസ്യയാണ് (കുട്ടപ്പന്‍-45) മരിച്ചത്.
ഞായറാഴ്ച വൈകുന്നേരം ആറിന് ചൂളപ്പടി-കടമാഞ്ചിറ റോഡില്‍ 11 കെവി ലൈനിന്റെ പോസ്റ്റില്‍ അറ്റകുറ്റപ്പണികള്‍ നടത്തുന്നതിനിടെയാണ് അപകടം. അപകടം സംബന്ധിച്ച് പോലീസ് കേസെടുത്തിട്ടുണ്ട്. അപകടകാരണം കണെ്ടത്താന്‍ വൈദ്യുതി വകുപ്പ് ഇന്‍സ്‌പെക്ടറെക്കൊണ്ട് അന്വേഷണം നടത്തുമെന്ന് സിഐ വി.എ. നിഷാദ്‌മോന്‍ പറഞ്ഞു.
അതേസമയം ലൈന്‍മാന്‍ വീണു മരിച്ചത് മേലുദ്യോഗസ്ഥരുടെ അനാസ്ഥയാണെന്ന ആക്ഷേപവും ഉയര്‍ന്നിട്ടുണ്ട്. ഞായറാഴ്ച വൈകുന്നേരമുണ്ടായ കാറ്റിലും മഴയിലും ചങ്ങനാശേരി നഗരത്തിന്റെ വിവിധ ഭാഗങ്ങളില്‍ വൈദ്യുതി ബന്ധം തടസപ്പെട്ടിരുന്നു. നാട്ടുകാര്‍ വൈദ്യുതി ഓഫീസില്‍ പരാതിപ്പെട്ടതു പ്രകാരം ചൂളപ്പടി-കടമാഞ്ചിറ റോഡിലുള്ള പോസ്റ്റില്‍ കയറി അറ്റകുറ്റപ്പണികള്‍ നടത്തുന്നതിനിടെ ചെത്തിപ്പുഴ സബ് സ്റ്റേഷന്റെ ഫീഡറില്‍ നിന്നു വൈദ്യുതി പ്രവഹിച്ചതാണ് ദേവസ്യയുടെ മരണത്തിനിടയാക്കിയതെന്നാണ് മറ്റ് ഉദ്യോഗസ്ഥര്‍ നല്‍കുന്ന സൂചന.
വൈദ്യുതി ബന്ധം തകരാറിലാകുമ്പോള്‍ ബന്ധപ്പെട്ട മേലുദ്യോഗസ്ഥരാണ് മറ്റു ലൈനുകളില്‍ നിന്നും വൈദ്യുതി പ്രവഹിക്കുന്നില്ലെന്ന് ഉറപ്പുവരുത്തി ലൈന്‍മാന്‍മാര്‍ക്ക് ജോലി ചെയ്യുന്നതിനു വേണ്ട സുരക്ഷ ഉറപ്പാക്കേണ്ടത്. അതിനാല്‍ ബന്ധപ്പെട്ട ഉദ്യോഗസ്ഥരുടെ അനാസ്ഥയാണ് അപകടത്തിനു കാരണമെന്നാണ് ഒരുവിഭാഗം ജീവനക്കാര്‍ ആരോപിക്കുന്നത്.-

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha