കോവിഡ്19 സ്ഥിരീകരിച്ച് കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിഞ്ഞിരുന്ന റാന്നി ഐത്തല സ്വദേശികളായ വയോധിക ദമ്പതികളുടെ നാലാമത്തെ പരിശോധനഫലം നെഗറ്റിവ്. തിങ്കളാഴ്ചയാണ് നാലാംഘട്ട പരിശോധനഫലം ലഭിച്ചത്. ഇവരെ ഡിസ്ചാര്‍ജ് ചെയ്യുന്ന കാര്യം ചൊവ്വാഴ്ച മെഡിക്കല്‍ ബോര്‍ഡ് തീരുമാനിക്കുമെന്ന് ആശുപത്രി അധികൃതര്‍ അറിയിച്ചു.

കോട്ടയം ചെങ്ങളം സ്വദേശികളായ, ഇവരുടെ മകന്റെ മകളും ഭര്‍ത്താവും രോഗമുക്തരായി ശനിയാഴ്ച ആശുപത്രി വിട്ടിരുന്നു. ശനിയാഴ്ച ലഭിച്ച പരിശോധനഫലവും നെഗറ്റിവ് ആയിരുന്നു. മാര്‍ച്ച് എട്ടിനാണ് കോവിഡ് 19 ലക്ഷണത്തെ തുടര്‍ന്ന് വയോധിക ദമ്പതികളെയും ബന്ധുക്കളായ ചെങ്ങളം സ്വദേശികളായ യുവദമ്പതികളെയും കോട്ടയം മെഡിക്കല്‍ കോളജ് ആശുപത്രിയിലെ കോറോണ വാര്‍ഡില്‍ പ്രവേശിപ്പിച്ചത്.

വയോധികര്‍ക്ക് ശ്വാസംമുട്ടലും ഹൃദയസംബന്ധമായ അസുഖവും ഉണ്ടായിരുന്നതിനാല്‍ ആശങ്കാകുലമായിരുന്നു ആദ്യ ഒരാഴ്ച. മെഡിക്കല്‍ കോളജ് ആശുപത്രി സൂപ്രണ്ട് ഡോ. ടി.കെ. ജയകുമാര്‍, ആര്‍.എം.ഒ ഡോ. ആര്‍.പി. രഞ്ചിന്‍, എ.ആര്‍.എം.ഒ എന്നിവരുടെ നേതൃത്വത്തില്‍ പകര്‍ച്ചവ്യാധിവിഭാഗം മേധാവി ഡോ. സജിത് കുമാറിന്റെ ഉത്തരവാദിത്തത്തില്‍ മെഡിക്കല്‍ ബോര്‍ഡ് രൂപവത്കരിക്കുകയും ദിവസേന രാവിലെയും ഉച്ചകഴിഞ്ഞും ബോര്‍ഡ് കൂടുകയും ചെയ്തു.ആരോഗ്യ മന്ത്രി കെ.കെ. ശൈലജയുടെ നിരന്തര ഇടപെടലുമുണ്ടായിരുന്നു. 93ഉം 89ഉം വയസ്സുള്ള വയോധികരെ രോഗമുക്തമാക്കുകയായിരുന്നു പ്രഥമ പരിഗണന.

കൃത്യമായ പരിചരണവും ചികിത്സയും നല്‍കി നാലുപേരെയും രോഗമുക്തരാക്കിയ സന്തോഷത്തിലും ആഹ്ലാദത്തിലുമാണ് ആശുപത്രി അധികൃതര്‍. വയോധികരെ പരിചരിച്ച ഒരു നഴ്‌സിന് കോവിഡ് 19 സ്ഥിരീകരിച്ചിട്ടുണ്ട്. ഇവരോടൊപ്പം ഹോസ്റ്റലില്‍ താമസിച്ചിരുന്ന 21 പേരും മെഡിക്കല്‍ കോളജില്‍ നിരീക്ഷണത്തിലാണ്.