കാസര്കോട് ജനറല് ആശുപത്രിയിലെ പൂച്ചകള് മൃഗസംരക്ഷണ വകുപ്പിന്റെ 'കോവിഡ്' നിരീക്ഷണത്തില്
കാസര്കോട് ജനറല് ആശുപത്രിയിലെ പൂച്ചകളെ മൃഗസംരക്ഷണ വകുപ്പിന്റെ 'കോവിഡ്' നിരീക്ഷണത്തിലേക്കു മാറ്റി. കോവിഡ് നിരീക്ഷണത്തിലുള്ള രോഗികളുടെ പരാതിയെത്തുടര്ന്നായിരുന്നു നടപടി.
പൂച്ചകളുടെ പരാക്രമം ജനറല് ആശുപത്രിയിലെ ഒരു രോഗി സമൂഹ മാധ്യമങ്ങളിലൂടെ പ്രചരിപ്പിച്ചതിനെ തുടര്ന്നാണ് നഗരസഭ, മൃഗ സംരക്ഷണ വകുപ്പ്, ആരോഗ്യ വകുപ്പ് എന്നിവയുടെ നേതൃത്വത്തില് പട്ടിപിടുത്തക്കാരുടെ സഹായത്തോടെ പൂച്ചകളെ വലയിട്ടു പിടികൂടിയത്.
വെറ്ററിനറി സര്ജന്മാരായ ഡോ.ഫാബിന് പൈലി, ഡോ.അശ്വിന് എന്നിവര് അടങ്ങിയ സംഘം കോവിഡ് പ്രതിരോധ വസ്ത്രം ഉള്പ്പെടെ ധരിച്ചാണ് 2 കണ്ടന് പൂച്ചയും ഒരു അമ്മയും 2 കുഞ്ഞുങ്ങളുമടങ്ങിയ സംഘത്തെ പിടികൂടി പരിശോധിച്ചു റെയില്വേ സ്റ്റേഷന് റോഡില് മൃഗസംരക്ഷണ വകുപ്പിന്റെ എബിസി കേന്ദ്രത്തിലേക്കു മാറ്റിയത്.
എബിസി കേന്ദ്രത്തില് ബംഗാള് സ്വദേശികളായ പട്ടിപിടുത്തക്കാരുടെ പരിചരണത്തിലാണു പൂച്ചകള്. പാലും മറ്റു ഭക്ഷണവുമാണ് ഇതിനു നല്കുന്നത്. കോവിഡ്-19 ലോക്ഡൗണ് കാരണം നായപിടുത്തം നടക്കുന്നില്ല. ബംഗാള് സ്വദേശികള് പോയാല് എവിടെ പാര്പ്പിക്കുമെന്ന തലപുകച്ചിലിലാണു മൃഗസംരക്ഷണ വകുപ്പ് അധികൃതര്. എബിസി കേന്ദ്രത്തിന്റെ ചുമതലയുള്ള ഡോക്ടര് വിശാഖപട്ടണം സ്വദേശി ശ്രാവണ്, ചീഫ് വെറ്ററിനറി ഓഫിസര് ഡോ.ബി.ശിവനായ്ക്ക് എന്നിവര് ലോക്ഡൗണില് മംഗളൂരുവിലാണ്.
https://www.facebook.com/Malayalivartha
