ഒരു കോവിഡ് രോഗി സര്‍ക്കാര്‍ ആശുപത്രിയുടെ തീവ്രപരിചരണ വിഭാഗത്തില്‍ ചികിത്സയില്‍ കഴിയുമ്പോള്‍ ആശുപത്രിയിലെ സൗകര്യങ്ങള്‍ക്കു പുറമേ സര്‍ക്കാരിനു ചെലവ് വരുന്നത് 2 ലക്ഷം രൂപ വരെയാണ്. സ്വകാര്യ ആശുപത്രികളില്‍ 15 മുതല്‍ 20 ലക്ഷം വരെ ചെലവു വരുന്ന ചികിത്സകളാണ് സൗജന്യമായി ആരോഗ്യവകുപ്പ് ലഭ്യമാക്കുന്നത്. വാര്‍ഡില്‍ കഴിയുന്ന രോഗിക്ക് ചികിത്സകള്‍ക്കായി ഒരു ലക്ഷം രൂപ വരെയും ചെലവു വരുന്നുണ്ട്.

ആരോഗ്യവകുപ്പാണ് രോഗിക്കുള്ള ഭക്ഷണം ഉള്‍പ്പെടെ സ്റ്റേഷനറി സാധനങ്ങള്‍ വരെ ലഭ്യമാക്കുന്നത്. രോഗിയുടെ സാംപിള്‍ പരിശോധന, സുരക്ഷാ വേഷങ്ങള്‍ക്കുള്ള തുക എന്നിവയാണ് ചെലവ് ഉയരാന്‍ കാരണമാകുന്നത്. തീവ്രപരിചരണ വിഭാഗത്തിലും മുറികളിലും ചികിത്സയില്‍ കഴിയുന്നവര്‍ക്കുള്ള പരിശോധനാ ഉപകരണങ്ങള്‍ വരെ പ്രത്യേകം വാങ്ങി ഉപയോഗിക്കുകയാണ്.

രോഗം സ്ഥിരീകരിക്കുന്ന രക്ത, സ്രവ സാംപിളുകള്‍ ഒരു പരിശോധനയ്ക്ക് വേണ്ടി വരിക 4000 രൂപയാണ്. ഒരു രോഗിക്ക് 8 പരിശോധന വരെ ആവശ്യമായി വരുന്നതിനാല്‍ പരിശോധനാചെലവ് 32,000 രൂപ വരെയാകും.

രോഗിയെ ചികിത്സിക്കുകയും പരിപാലിക്കുകയും ചെയ്യുന്ന ഡോക്ടര്‍മാരും നഴ്‌സുമാരും ശുചീകരണ ജീവനക്കാരും ധരിക്കുന്ന ശരീരം മുഴുവന്‍ മൂടുന്ന വ്യക്തിഗത സുരക്ഷാ കവചമായ പഴ്‌സനല്‍ പ്രൊട്ടക്ഷന്‍ എക്വിപ്‌മെന്റ് (പിപിഇ)-ന് 1,20,000-ത്തോളമാകും. 4 മണിക്കൂര്‍ ഡ്യൂട്ടിക്ക് ഒരു പിപിഇ യൂണിറ്റ് വീതം ഉപയോഗിക്കേണ്ടി വരുന്നു. ഒരു ദിവസം 10 പിപിഇ കിറ്റുകള്‍ വരെയാണ് ഒരു രോഗിക്കു വേണ്ടി ഉപയോഗിക്കേണ്ടി വരുന്നത്. ഇതിന് ഒരെണ്ണത്തിന് 600 രൂപ ശരാശരി വിലയാകുന്നുണ്ട്.

ആശുപത്രിയില്‍ ലഭ്യമല്ലാത്ത മരുന്നുകള്‍, പരിശോധനകള്‍ എന്നിവ നടത്തേണ്ടി വരുന്നതിന്റെ തുക പതിനായിരത്തിലധികം ആകും. ഓരോ രോഗിക്കും ഉപയോഗിക്കേണ്ടി വരുന്ന മെഡിക്കല്‍, സ്റ്റേഷനറി സാമഗ്രികളായ പിപി അപ്പാരറ്റസ്, സ്റ്റെതസ്‌കോപ്പ്, പള്‍സ് ഓക്‌സോ മീറ്റര്‍, രോഗിക്ക് ആവശ്യമായ മറ്റു സാധനങ്ങള്‍ എന്നിവയ്‌ക്കെല്ലാം കൂടി പതിനായിരത്തിലധികം ചെലവ് വരുന്നുണ്ട്.

തീവപ്രരിചരണവിഭാഗം, ഐസലേഷന്‍ വാര്‍ഡ് തുടങ്ങി ചികിത്സയിലും നിരീക്ഷണത്തിലും കഴിയുന്ന എല്ലാവര്‍ക്കും ആരോഗ്യവകുപ്പിന്റെ ചെലവിലാണ് ഭക്ഷണം ലഭ്യമാക്കുന്നത്. അതിന് എഴുപതിനായിരത്തിലധികം രൂപയാകുന്നുണ്ട്.

കോവിഡ് രോഗത്തെ നേരിടുന്നതിന് ജില്ലാ ആരോഗ്യവകുപ്പ് അടുത്ത 3 മാസത്തേക്കു വേണ്ടി 25 ലക്ഷം രൂപ ആരോഗ്യ വകുപ്പിനോട് ആവശ്യപ്പെട്ടു കത്ത് നല്‍കി. പിപിഇ യൂണിറ്റ്, സാനിറ്റൈസര്‍, ബോധവല്‍ക്കരണ പരിപാടികള്‍ തുടങ്ങിയവയ്ക്കു വേണ്ടിയാണ് തുക. ഒരു വര്‍ഷത്തേക്ക് ലഭ്യമാക്കിയ മാസ്‌ക്, സാനിറ്റൈസര്‍, പിപിഇ യൂണിറ്റ് എന്നിവ തീര്‍ന്നു കഴിഞ്ഞു.സാനിറ്റൈസറിന്റെയും മാസ്‌കുകളുടെയും ലഭ്യത കുറഞ്ഞതോടെ ഇവ രണ്ടും കോട്ടയം ജനറല്‍ ആശുപത്രിയില്‍ നിര്‍മിച്ചു തുടങ്ങിയിട്ടുണ്ടെന്നും ദേശീയ ആരോഗ്യ ദൗത്യം പ്രോഗ്രാം മാനേജര്‍ ഡോ. വ്യാസ് സുകുമാരന്‍ അറിയിച്ചു.