വാഹന വര്‍ക്ഷോപ്പുകള്‍ തുറക്കാന്‍ അനുമതി. കൂടുതല്‍ കടകളും തുറക്കാം. കേരളത്തില്‍ ലോക്ഡൗണില്‍ ഇളവുകള്‍ പ്രഖ്യാപിച്ച് മുഖ്യമന്ത്രി.
കോവിഡ് പ്രതിരോധത്തിനായി രാജ്യമെങ്ങും നടപ്പാക്കിയ ലോക്ക് ഡണ്‍ പിന്‍വലിക്കുന്നത് സംബന്ധിച്ച് വ്യക്തത വന്നിട്ടില്ല. 21 ദിവസത്തെ ലോക്ക് ഡണ്‍ ഏപ്രില്‍ 14ന് പൂര്‍്ത്തിയാകുമ്പോള്‍ ഘട്ടം ഘട്ടമായി മാത്രമേ നിയന്ത്രണം പിന്‍വലിക്കുകയുള്ളൂവെന്നാണ് കേന്ദ്രസര്‍ക്കാര്‍ വൃത്തങ്ങള്‍ നല്‍കുന്ന സൂചന. അതിനിടെ, കേരളത്തില്‍ ലോക്ഡൗണില്‍ നേരിയ ഇളവുകള്‍ പ്രഖ്യാപിച്ച് മുഖ്യമന്ത്രി പിണറായി വിജയന്. വാഹന വര്‍ക്ഷോപ്പുകള്‍ തുറക്കാന്‍ അനുമതി നല്‍കി. മൊബൈല്‍ ഫോണ്‍ വില്‍പനയും റീചാര്‍ജിങ്ങിനുമുള്ള കടകള്‍ ആഴ്ചയില്‍ ഒരു ദിവസം തുറക്കാം. കംപ്യൂട്ടര്‍, സ്‌പെയര്‍ പാര്‍ട്‌സ് കടകളും ആഴ്ചയില്‍ ഒരു ദിവസം തുറക്കാമെന്നു മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞു.
അതിനിടെ, രാജ്യത്തെ ലോക്ക് ഡൗണ്‍ കാലാവധി പൂര്‍ത്തിയാവുന്ന ഏപ്രില്‍ 15-നു ശേഷം നടപ്പാക്കേണ്ട നിര്‍ണായക തീരുമാനങ്ങളെക്കുറിച്ച് ആലോചിക്കാന്‍ കേന്ദ്രമന്ത്രിമാര്‍ക്ക് പ്രധാനമന്ത്രി മോദിയുടെ നിര്‍ദേശം. കേന്ദ്രമന്ത്രിമാരുമായി നടത്തിയ വീഡിയോ കോണ്‍ഫറന്‍സിങ്ങിലാണ് പ്രധാനമന്ത്രി ഇക്കാര്യം മുന്നോട്ടുവെച്ചത്. ലോക്ക്ഡൗണ്‍ നടപടികളും സാമൂഹിക അകലവും ഒരുമിച്ച് മുന്നോട്ടുപോണം, ലോക്ക്ഡൗണ്‍ അവസാനിച്ചാല്‍ ഉയര്‍ന്നുവരുന്ന സാഹചര്യത്തെ നേരിടാന്‍ ആവശ്യമായ നടപടികളെ രൂപപ്പെടുത്തേണ്ടതുണ്ട്. അതിനായി പത്ത് നിര്‍ണായകമായ തീരുമാനങ്ങളും കൂടുതല്‍ ശ്രദ്ധ ചെലുത്തേണ്ട പത്ത് മുന്‍ഗണന മേഖലകളും പട്ടക തയ്യാറാക്കണമെന്നാണ് കേന്ദ്രമന്ത്രിമാര്‍ക്ക് പ്രധാനമന്ത്രി നല്‍കിയ നിര്‍ദേശം.
കോവിഡ്-19 പ്രതിരോധത്തിനായി കേന്ദ്രമന്ത്രിമാര്‍ നടത്തുന്ന പ്രവര്‍ത്തനങ്ങളെയും പ്രധാനമന്ത്രി അഭിനന്ദിച്ചു. കൃത്യസമയങ്ങളില്‍ കേന്ദ്രമന്ത്രിമാര്‍ നല്‍കുന്ന അഭിപ്രായങ്ങളും പ്രതികരണങ്ങളും കോവിഡിനെതിരെയുള്ള പ്രതിരോധപരിപാടികള്‍ തീരുമാനിക്കുന്നതില്‍ ഫലപ്രദമാണെന്നും പ്രധാനമന്ത്രി പറഞ്ഞു. ലോക്ക്ഡൗണിനു ശേഷം ഉയര്‍ന്നുവരുന്ന നിരവധി വെല്ലുവിളികള്‍ ഉണ്ട്. ഇവയെ നേരിടേണ്ടതുണ്ട്. മന്ത്രിമാര്‍ അവരവരുടെ വകുപ്പുകളില്‍ അതീവ ശ്രദ്ധ പുലര്‍ത്തണം. ഇന്ത്യയ്ക്ക് മറ്റ് രാജ്യങ്ങളിലേക്കുള്ള ആശ്രിതത്വം കുറയ്ക്കേണ്ടതുണ്ട്. അതിനാല്‍ മെയ്ക്ക് ഇന്‍ ഇന്ത്യയെ പ്രോത്സാഹിപ്പിക്കേണ്ട ആവശ്യകതയെക്കുറിച്ചും പ്രധാനമന്ത്രി കൂടിക്കാഴ്ചയില്‍ സംസാരിച്ചു.
കാര്‍ഷികമേഖല, സമ്പദ് വ്യവസ്ഥ, ക്ഷേമപരിപാടികള്‍, തൊഴിലാളികളുടെ പ്രശ്നങ്ങള്‍ തുടങ്ങിയ നിരവധി വിഷയങ്ങളും കൂടിക്കാഴ്ചയില്‍ ചര്‍ച്ചയായി. കോവിഡ്-19 സദ്വ്യവസ്ഥയെ എങ്ങനെ പ്രതികൂലമായി ബാധിക്കും എന്നതിനെക്കുറിച്ചും പ്രധാനമന്ത്രി സംസാരിച്ചു. സാമ്പത്തിക ആഘാതം ലഘൂകരിക്കുന്നതിന് സര്‍ക്കാര്‍ യുദ്ധകാലാടിസ്ഥാനത്തില്‍ പ്രവര്‍ത്തിക്കേണ്ടതുണ്ട്. കൊറോണ ഹോട്ട്‌സ്‌പോട്ടുകള്‍ നിലവിലില്ലാത്ത വകുപ്പുകള്‍ സാവധാനം തുറക്കുന്നതിനുള്ള ഒരു പ്ലാന്‍ തയ്യാറാക്കണമെന്നും പ്രധാനമന്ത്രി ആവശ്യപ്പെട്ടിട്ടുണ്ട്.
അതേസമയം, ക്ഷീരകര്‍ഷകര്‍ക്ക് മാര്‍ച്ച് ഒന്നു മുതല്‍ 20 വരെ അളന്ന ഓരോ ലീറ്റര്‍ പാലിനും ഒരു രൂപ വീതം ആശ്വാസധനം നല്‍കുമെന്ന് മുഖ്യമന്ത്രി. ലോക്ഡൗണ്‍ അവസാനിക്കുന്ന തീയതിക്കു മുന്‍പ് പണം കൈമാറും. കോവിഡ് ബാധിതരായ ക്ഷീര കര്‍ഷകര്‍ക്കു 10,000 രൂപ ധനസഹായം നല്‍കും. ഗള്‍ഫ് രാജ്യങ്ങളില്‍ സ്‌കൂള്‍ ഫീസുകളില്‍ ഇളവ് അനുവദിക്കണമെന്നു മുഖ്യമന്ത്രി അഭ്യര്‍ഥിച്ചു. ഗള്‍ഫ് രാജ്യങ്ങളിലെ മലയാളി സ്‌കൂള്‍ മാനേജ്‌മെന്റുകളോടാണു മുഖ്യമന്ത്രി അഭ്യര്‍ഥന നടത്തിയത്. വിദേശത്തെ ഇന്ത്യക്കാര്‍ക്ക് ക്വാറന്റീന്‍ സൗകര്യമൊരുക്കാന്‍ സഹായിക്കണമെന്നാവശ്യപ്പെട്ട് മുഖ്യമന്ത്രി വിദേശകാര്യ മന്ത്രിക്കു കത്തയച്ചു. മുംബൈയിലും ഡല്‍ഹിയിലും കോവിഡ് ബാധിച്ച നഴ്‌സുമാര്‍ക്കു സഹായം വേണമെന്ന് പ്രധാനമന്ത്രിയോടും മുഖ്യമന്ത്രി അഭ്യര്‍ഥിച്ചു. സുരക്ഷാ ഉപകരണങ്ങളില്ലെന്ന പരാതിക്കു പരിഹാരമുണ്ടാക്കണം. മഹാരാഷ്ട്ര, ഡല്‍ഹി മുഖ്യമന്ത്രിമാരുമായി സംസാരിക്കുമെന്നും പിണറായി വിജയന് അറിയിച്ചു.
https://www.facebook.com/Malayalivartha
