ഹൈക്കോടതി ഉത്തരവിനെ തുടർന്ന് മാസപ്പടി വിഷയത്തിൽ പിണറായി വിജയനും മുഹമ്മദ് റിയാസിനും ടി.വീണയ്ക്കുമെതിരെ തിങ്കളാഴ്ച വിജിലൻസ് കേസെടുത്തേക്കും. തിരുവനന്തപുരത്തെ സ്പെഷ്യൽ ഇൻവെസ്റ്റിഗേഷൻ യൂണിറ്റിനെ അന്വേഷണം ഏൽപ്പിക്കുന്നതാണ് പരിഗണനയിലുള്ളത്.

മാസപ്പടി നൽകിയ സി.എം.ആർ.എല്ലിന്റെ ആസ്ഥാനം കൊച്ചിയിലായതിനാൽ അവിടെയും അന്വേഷണമുണ്ടാവും. വിവിധ ജില്ലകളിൽ അന്വേഷണം നടത്തേണ്ടതിനാൽ വിവിധ യൂണിറ്റുകളിലെ ഉദ്യോഗസ്ഥരെ ഉൾപ്പെടുത്തും.

പിണറായിക്കെതിരായ ഇ.ഡി റിപ്പോർട്ടും രേഖകളും ക്രൈംബ്രാഞ്ച് അന്വേഷണ സംഘം വിജിലൻസിന് കൈമാറിയിട്ടുണ്ടായിരുന്നു. വിജിലൻസ് ഡയറക്ടർ മനോജ് എബ്രഹാമിന്റെ നിർദ്ദേശപ്രകാരം എഫ്.ഐ.ആർ തയ്യാറാക്കിയിട്ടുണ്ട്. പിണറായിയെ ഒന്നാം പ്രതിയാക്കിയാവും എഫ്.ഐ.ആറെന്നാണ് സൂചനകളുള്ളത്. കേസെടുക്കാനുള്ള ഹൈക്കോടതി ഉത്തരവിനെതിരെ പിണറായി വിജയനടക്കം തിങ്കളാഴ്ച ഡിവിഷൻ ബെഞ്ചിനെ സമീപിക്കുമെന്നും അറിയുന്നു.

തന്റെ ഭാഗം കേൾക്കാതെയാണ് ഉത്തരവെന്നാവും അപ്പീലിൽ ചൂണ്ടിക്കാട്ടുക. ഡി.ജി.പിക്ക് ഇ.ഡി നൽകിയ കത്തിൽ ഹവാല, കൈക്കൂലി, അധികാരദുർവിനിയോഗം, അഴിമതി, കള്ളപ്പണം വെളുപ്പിക്കൽ അടക്കം ചൂണ്ടിക്കാട്ടിയിട്ടുണ്ട്. ഇവയെല്ലാം എഫ്.ഐ.ആറിലുണ്ടാവുമെങ്കിലും ഹവാലയും കള്ളപ്പണ ഇടപാടുകളും അന്വേഷിക്കാനാവുക ഇ.ഡിക്കാണ്.

വിജിലൻസ് എഫ്.ഐ.ആർ രജിസ്റ്റർ ചെയ്താലുടൻ അതിന്റെ അടിസ്ഥാനത്തിൽ ഇ.സി.ഐ.ആർ രജിസ്റ്റർ ചെയ്ത് ഇ.ഡി അന്വേഷണം ആരംഭിക്കും. അന്വേഷണത്തിൽ കൂടുതൽ കുറ്റകൃത്യങ്ങൾ വെളിവായാൽ ബി.എൻ.എസ് പ്രകാരം കേസെടുക്കുമെന്നും വ്യക്തമാക്കി വിജിലൻസ്.