ഇഎംഎസ് ദിനാചരണചടങ്ങില്‍ പ്രതിപക്ഷ നേതാവ് വി.എസ്.അച്യുതാനന്ദന്റെ പ്രസംഗം സിപിഎം നേതൃത്വം വെട്ടി. സംസ്ഥാന സമ്മേളനത്തിനു ശേഷം വിഎസും പിണറായി വിജയനും ആദ്യമായി പങ്കെടുത്ത വേദിയിലാണ് സംഭവം.
സ്വാഗത പ്രസംഗത്തിനു ശേഷം ആദ്യം സംസ്ഥാന സെക്രട്ടറി കോടിയേരി ബാലകൃഷ്ണന്റേതായിരുന്നു ഊഴം. തുടര്‍ന്ന് സ്വാഭാവികമായും അടുത്തത് വിഎസ് എന്നു പ്രതീക്ഷിച്ചിരിക്കെ മൈക്ക് ജില്ലാ സെക്രട്ടറി കടകംപള്ളി സുരേന്ദ്രന്‍ കൈയിലെടുത്തു. എല്ലാ നേതാക്കളും ഇവിടെ ഉണ്ടെങ്കിലും ആരും പ്രസംഗിക്കുന്നില്ലെന്നും ചടങ്ങ് അവസാനിപ്പിക്കുകയാണെന്നും അധ്യക്ഷനായിരുന്ന കടകംപള്ളി സുരേന്ദ്രന്‍ പറഞ്ഞു. എഴുതിക്കൊണ്ടുവന്നില്ലെങ്കിലും പ്രസംഗിക്കാന്‍ തയാറായി തന്നെയായിരുന്നു വിഎസ് എത്തിയിരുന്നത്. ചടങ്ങ് സമാപിച്ചതോടെ ആരോടും മിണ്ടാതെ വിഎസ് മടങ്ങി.സംസ്ഥാന സെക്രട്ടറിയും വിഎസും സംസാരിക്കുന്ന പതിറ്റാണ്ടിലേറെ നീണ്ട പതിവാണ് നിയമസഭയ്ക്കു മുന്നിലെ ഇഎംഎസ് പാര്‍ക്കില്‍ ഇന്ന് അവസാനിപ്പിച്ചത്.
ഇഎംഎസ് ദിനാചരണത്തില്‍ സംസ്ഥാന സെക്രട്ടറിക്കൊപ്പമുള്ള വിഎസിന്റെ പ്രസംഗം, കാലാകാലങ്ങളില്‍ മുഖ്യമന്ത്രിയോ പ്രതിപക്ഷ നേതാവോ ആയിരുന്നതുകൊണ്ടു മാത്രമായിരുന്നില്ല. സിപിഎം രൂപീകരിക്കാന്‍ 1964ല്‍ സിപിഐ ദേശീയ കൗണ്‍സിലില്‍ നിന്ന് ഇറങ്ങിപ്പോരുമ്പോള്‍ ഇഎംഎസിനൊപ്പമുണ്ടായിരുന്ന നേതാവെന്ന നിലയില്‍ കൂടിയായിരുന്നു. ആ പതിവിനാണ് ഇക്കുറി അവസാനമായിരിക്കുന്നത്.
കേന്ദ്രനേതൃയോഗങ്ങള്‍ക്കു മുന്നോടിയായി വിഎസിനോടുള്ള സമീപനത്തില്‍ മാറ്റമില്ലെന്ന പ്രഖ്യാപനമായാണ് നേതൃത്വത്തിന്റെ തീരുമാനം വിലയിരുത്തപ്പെടുന്നത്. അതേസമയം, വിഎസും പിണറായിയും സംസാരിച്ചാല്‍ ഉണ്ടായേക്കാവുന്ന ഭവിഷ്യത്തുക്കള്‍ മുന്‍കൂട്ടികണ്ട് ഒഴിവാക്കിയതാണെന്നും വ്യാഖ്യാനമുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha