ദോഹ വിമാനത്താവളത്തില്‍ തിരുവനന്തപുരത്തേക്കുള്ള എയര്‍ ഇന്ത്യ വിമാനത്തിനായി മൂന്നര മണിക്കൂറോളം കാത്തുനിന്ന ശേഷം യാത്രക്കാര്‍ക്ക് നിരാശയും സങ്കടവും സമ്മാനിച്ച് വിമാനം റദ്ദാക്കല്‍ വാര്‍ത്ത. ദോഹയില്‍നിന്നു പ്രാദേശിക സമയം 3.30-ന് പുറപ്പെടേണ്ടിയിരുന്ന വിമാനത്തിനായി കാത്തിരുന്നത് 181 യാത്രക്കാരാണ്.

മൂന്നു മണിയോടെയാണ് സര്‍വീസ് റദ്ദാക്കിയതായി എയര്‍ ഇന്ത്യ യാത്രക്കാരെ അറിയിച്ചത്. അതേസമയം, സാങ്കേതിക പ്രശ്നം എന്നല്ലാതെ ഇന്ത്യന്‍ എംബസി വൈകിട്ടു വരെ കൂടുതല്‍ പ്രതികരിച്ചിട്ടില്ല. ഹമദ് രാജ്യാന്തര വിമാനത്താവളത്തില്‍ രാവിലെ 11.30-മുതല്‍ തന്നെ യാത്രക്കാര്‍ എത്തിത്തുടങ്ങിയിരുന്നു. നാട്ടില്‍നിന്നു വിമാനത്തിന് പുറപ്പെടാന്‍ കഴിയാത്തതിനാല്‍ ഇവരെ ചെക്ക് ഇന്‍ ചെയ്യാന്‍ അനുവദിച്ചില്ല.

ഉദ്യോഗസ്ഥരോ സംഘടനാ ഭാരവാഹികളോ വിമാനത്താവളത്തില്‍ എത്താത്തതും യാത്രക്കാരെ രോഷാകുലരാക്കി. ഗര്‍ഭിണികള്‍, കൈക്കുഞ്ഞുങ്ങള്‍, അടിയന്തര ചികിത്സ വേണ്ടവര്‍, മുതിര്‍ന്ന പൗരന്മാര്‍, ജോലി നഷ്ടപ്പെട്ടവര്‍ എന്നിവരുള്‍പ്പെടെയുള്ള യാത്രക്കാര്‍ മണിക്കൂറുകള്‍ വിമാനത്താവളത്തില്‍ കാത്തിരുന്നിട്ടും ഭക്ഷണമോ മറ്റു സൗകര്യങ്ങളോ ഇന്ത്യന്‍ എംബസിയോ എപ്പെക്‌സ് സംഘടനകളോ ഏര്‍പ്പെടുത്തിയില്ല.

വിമാനം റദ്ദാക്കിയ സാഹചര്യത്തില്‍, ഗര്‍ഭിണികള്‍ക്ക് യാത്ര ചെയ്യാനുള്ള ആരോഗ്യമുണ്ടെന്ന് കാട്ടുന്ന ഗൈനക്കോളജിസ്റ്റിന്റെ സര്‍ട്ടിഫിക്കറ്റ് വീണ്ടും വാങ്ങേണ്ടി വരും. ഇതിന്റെ കാലാവധി 3 ദിവസമാണ്. ഒരാഴ്ച കൂടി മാത്രം വിമാന യാത്രയ്ക്ക് അനുമതിയുള്ള ഗര്‍ഭിണികള്‍ ഓരോ ദിവസം കഴിയുമ്പോഴും ആശങ്കയിലാണ്.