രാജ്യം മുഴുവന്‍ ലോക്ക് ടൗണില്‍ കുടുങ്ങി കിടക്കുകയാണ്. പല മേഖലകളും നിശ്ചലമായി.എന്നാല്‍ ഏറ്റവും ആശങ്ക ഉയര്‍ത്തുന്നത് വിദ്യാഭ്യാസ രംഗമാണ്. പാതി വഴിയില്‍ അവസാനിച്ച പരീക്ഷകളും ക്ലാസ്സുകളും എല്ലാം കുട്ടികളിലും രക്ഷിതാക്കളും വലിയ ആശങ്ക ഉയര്‍ത്തുന്നുണ്ട്. ഈ സാഹചര്യത്തില്‍ ലോക് ഡൗണ്‍ നിയമങ്ങള്‍ പാലിച്ചുകൊണ്ട് ഇത്തവണത്തെ അക്കാദമിക് വര്‍ഷം ആരംഭിക്കുന്നതിന് തയ്യാറെടുക്കുകയാണ് വിദ്യാഭ്യാസ വകുപ്പ് . ഇതിനായി അധ്യാപകരെ സജ്ജരാക്കുന്നതിനുള്ള ഓണ്‍ലൈന്‍ പരിശീലന പദ്ധതി വ്യാഴാഴ്ച ആരംഭിക്കുമെന്ന് വിദ്യാഭ്യാസ മന്ത്രി സി.രവീന്ദ്രനാഥ് അറിയിച്ചു. വിക്ടേഴ്‌സ് ചാനലിലൂടെയും ഓണ്‍ലൈനായുമായാണ് പരിശീലനം.

കൊവിഡും ലോക്ക് ഡൌണും വിദ്യാഭ്യാസ മേഖലയെ താളം തെറ്റിച്ചിരിക്കുകയാണ്. പുതിയ അധ്യയനവര്‍ഷം തുടങ്ങുന്നത് സംബന്ധിച്ചും അവ്യക്തതകള്‍ നിലനില്‍ക്കുകയാണ് . എങ്കിലും ആധുനിക സാങ്കേതിക വിദ്യ ഉപയോഗിച്ച് അധ്യയനം മുടങ്ങാതിരിക്കാനാണ് ശ്രമമെന്ന് വിദ്യാഭ്യാസ മന്ത്രി വ്യക്തമാക്കി.അവധിക്കാലത്തെ അധ്യാപക പരിശീലനം ഓണ്‍ലൈന്‍ വഴി നടപ്പാക്കാനാണ് ഗവണ്‍മെന്റിന്റെ തീരുമാനം. അതിനനുസരിച്ച് മോഡ്യൂളുകള്‍ ചിട്ടപ്പെടുത്തിയിട്ടുണ്ടെന്നും വിദ്യാഭ്യാസ മന്ത്രി ഫേസ്ബുക്കില്‍ വ്യക്തമാക്കി. ഒന്നുമുതല്‍ ഏഴുവരെ ക്ലാസ്സുകളിലെ അധ്യാപകര്‍ക്കാണ് ആദ്യഘട്ടത്തില്‍ പരിശീലനം നല്‍കുക എന്നാണ് ഇപ്പോഴത്തെ തീരുമാനം. . എല്ലാ അധ്യാപകരും പരിശീലന പരിപാടിയില്‍ നിര്‍ബന്ധമായും പങ്കെടുക്കണം.
ജൂണ്‍ ഒന്നിന് തന്നെ സ്‌കൂളുകള്‍ തുറക്കാന്‍ കഴിയും എന്നാണ് പ്രതീക്ഷിക്കുന്നത്. എന്നാല്‍ സാഹചര്യം അനുകൂലമല്ലാത്ത പക്ഷം അന്നുതന്നെ ഓണ്‍ലൈന്‍ ക്ലാസുകള്‍ ആരംഭിക്കുന്നതിനുള്ളള്ള ശ്രമങ്ങളാണ് വിദ്യാഭ്യാസവകുപ്പ് നടത്തുന്നതെന്നും മന്ത്രി അറിയിച്ചു.
പല സ്‌കൂളുകളും ഇപ്പോള്‍ തന്നെ വിവിധ രീതിയിലുള്ള ഓണ്‍ലൈന്‍ പരിശീലനങ്ങള്‍ വിദ്യാര്‍ത്ഥികള്‍ക്കായി ആരംഭിച്ചിട്ടിട്ടുണ്ട്.വിവിധ പ്രൊജെക്ടുകളും പാഠ്യ -പഠ്യേതര പ്രവര്‍ത്തങ്ങളും സംഘടിപ്പിച്ചുകൊണ്ടു കുട്ടികളുടെ ലോക്ക് ഡൗണ്‍ കാലഘട്ടത്തെ വിരസതകള്‍ അകറ്റുകയാണ് അധ്യാപകര്‍. ഒപ്പം ക്രിയാത്മകമായ പഠന പ്രവര്‍ത്തങ്ങളും നല്‍കികൊണ്ട് അധ്യയന കാലഘട്ടത്തിനു മികവേകാനുള്ള ശ്രമത്തിലാണ് വിദ്യാലയങ്ങള്‍.