നീലേശ്വരത്തിനടുത്ത് മടിക്കൈ സര്‍വീസ് സഹകരണ എരിക്കുളം ശാഖയിലെ കലക്ഷന്‍ ഏജന്റായ എം.വി.സുനിത (38) സ്‌കൂട്ടറുമായി കുലംകുത്തിയൊഴുകുന്ന ചാലിലേക്കു വീണു. വീട്ടില്‍ നിന്നു ബാങ്കിലേക്കു പണമടയ്ക്കാന്‍ പോകവേ ഇന്നലെ രാവിലെ പതിനൊന്നോടെയാണ് ഇവര്‍ ബങ്കളം പുതിയകണ്ടം ചാലില്‍ വീണത്.

ഇറക്കമിറങ്ങുന്നതിനിടെ നിയന്ത്രണം വിട്ട സ്‌കൂട്ടര്‍ ചാലിന്റെ പാലത്തിലേക്കു കയറുന്നതിനു തൊട്ടു മുന്‍പുള്ള പൊന്തക്കാട്ടിലേക്കു ചെരിയുകയും അതുവഴി ചാലിലേക്കു വീഴുകയുമായിരുന്നു.

സ്‌കൂട്ടറുമായി കുലംകുത്തിയൊഴുകുന്ന ചാലിലേക്ക് ഇവര്‍ വീഴുന്നത് തൊട്ടു പിന്നാലെയുണ്ടായിരുന്ന പിക്കപ്പ് ജീപ്പിന്റെ ഡ്രൈവര്‍ മടിക്കൈ കോളിക്കുന്നിലെ എം.വി.രാജു കണ്ടിരുന്നു. ഇദ്ദേഹം വാഹനം നിര്‍ത്തി സുനിതയെ രക്ഷിക്കാനായി ചാലിലേക്കു ചാടി. ഇതിനിടെ ബഹളം കേട്ട് നാട്ടുകാരും സ്ഥലത്തെത്തി. സ്‌കൂട്ടറും പണവും രേഖകളുമടങ്ങിയ ബാഗും ഒഴുക്കില്‍ പെട്ടു. ചാലില്‍ നിന്നു കരയ്ക്കു കയറിയ സുനിതയെ നീലേശ്വരം തേജസ്വിനി സഹകരണ ആശുപത്രിയില്‍ പ്രഥമ ശുശ്രൂഷ നല്‍കി വീട്ടിലേക്കു വിട്ടു.

ഒരു മണിക്കൂറോളം നാട്ടുകാര്‍ നടത്തിയ തിരച്ചിലിനൊടുവില്‍ സ്‌കൂട്ടര്‍ കിട്ടി. ബങ്കളം- എരിക്കുളം റോഡില്‍ ആണ് പള്ളത്തു വയല്‍ ചാല്‍. വേനലില്‍ കൃഷി ആവശ്യത്തിനു വെള്ളം കെട്ടി നിര്‍ത്തുന്ന തടയണയാണ് ഇത്. നല്ല ഒഴുക്കുള്ള ചാലില്‍ 10 അടിക്കു മേല്‍ വെള്ളമുണ്ടായിരുന്നു. ബങ്കളം കൂട്ടപ്പുന്ന കള്ളിപ്പാലിലെ സുനിത പിലാത്തറ മുണ്ടൂരിലെ രമേശന്റെ ഭാര്യയാണ്.

സുനിതയുടെ ജീവന്‍ രക്ഷിച്ച രാജു എരിക്കുളം സ്റ്റാന്‍ഡിലെ പിക്കപ്പ് ഡ്രൈവര്‍ ആണ്.ഡിവൈഎഫ്‌ഐ ബങ്കളം യൂണിറ്റ് രാജുവിനെ ഉപഹാരം സമ്മാനിച്ച് അനുമോദിച്ചു.