തിരുവനന്തപുരം വിമാനത്താവളത്തിലെ സ്വര്‍ണക്കടത്ത് കേസിന്റെ അന്വേഷണം രാജ്യന്തര അതിര്‍ത്തികള്‍ കടക്കുമെന്ന് സൂചന. ദേശീയ സുരക്ഷ ഉപദേഷ്ടാവ് അജിത് ഡോവല്‍ എന്‍.ഐ.എയുടെ അന്വേഷണത്തില്‍ ഇതിനോടകം തന്നെ ഇടപെട്ടു കഴിഞ്ഞു. എന്‍.ഐ.എയുടെ അന്വേഷണം യു.എ.ഇലേക്ക വ്യാപിക്കുന്നത് സംബന്ധിച്ച് അദ്ദേഹം യു.എ.ഇയിലെ അന്വേഷണ എജന്‍സിയുമായി സംസാരിച്ചതായിയാണ് വിവരം. കള്ളക്കടത്തിലെ മുഴുവന്‍ കണ്ണികളെയും പിടികൂടുന്നതിന് എവിടെ നിന്നും സ്വര്‍ണ വന്നുവെന്നും ആരിലേക്കക്കാണ് സ്വര്‍ണം പോകുന്നതെന്നും അറിയേണ്ടതുണ്ട്. ഇതിന്റെ ഭാഗമായി എന്‍.ഐ.എ അന്വേഷണം യു.എ.ഇലേക്കും വ്യാപിപ്പിക്കാനാണ് തീരുമാനം. ഇതിനോടകം തന്നെ യു.എ.ഇയും അന്വേഷണം പ്രഖ്യാപിച്ചുണ്ട്. അതുകൊണ്ട് തന്നെ യു.എ.ഇ അന്വേഷണത്തോട് സഹകരിക്കുമെന്ന് അജിത് ഡോവലിന് ഉറപ്പു നല്‍കിട്ടുണ്ട്.

ആഭ്യന്തര മന്ത്രാലയവും ധനമന്ത്രാലയവും കേസ് സൂക്ഷ്മമായി നിരീക്ഷിക്കുകയാണ്. ഇതോടൊപ്പം പ്രധാനമന്ത്രിയുടെ ഓഫീസും വിവരങ്ങള്‍ തേടിയിട്ടുണ്ടെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. കേസില്‍ ഭീകര ബന്ധം ഉള്‍പ്പെടെ കേന്ദ്രം സംശയിക്കുന്നുണ്ട്. സ്വര്‍ണക്കടത്തിലൂടെ ലഭിച്ച പണത്തിന്റെ ഉറവിടം സംബന്ധിച്ചും എന്‍.ഐ.എ അന്വേഷണം നടത്തും. ഇതിന് മുമ്പ് രാജ്യത്ത് പിടിക്കപ്പെട്ട സ്വര്‍ണക്കടത്ത് പരിശോധിക്കുമ്പോള്‍ നല്ലൊരു ശതമാനം വരുന്നത് യു.എ.ഇയില്‍ നിന്നാണ്. ഇതില്‍ തന്നെ 80 ശതമാനവും കേരളത്തിലെ വിമാനത്താവളം വഴിയും. ഈ സാഹചര്യത്തില്‍ വിശദമായ അന്വേഷണം ആവശ്യമാണെന്നാണ് കേന്ദ്ര എജന്‍സിയുടെ നിലപാട്.

കൂടാതെ അന്താരാഷ്ട്ര ഭീകരസംഘടനയായ ഇസ്‌ലാമിക് സ്‌റ്റേറ്റിന്റെ (ഐ.എസ്.) പങ്കും എന്‍.ഐ.എ അന്വേഷിക്കും. ഐ.എസിന്റെ ദക്ഷിണേന്ത്യാ ഘടകവുമായി സ്വര്‍ണം കടത്തിയവര്‍ക്കു ബന്ധമുണ്ടെന്ന സംശയത്തിലാണ് അന്വേഷണം. കേരളത്തില്‍ ഇതിനുമുമ്പ് എത്തിയ സ്വര്‍ണം ഏതു വഴികളിലൂടെ പോയെന്നും ആരൊക്കെ ഉപയോഗിച്ചെന്നും അതില്‍ ഭീകരസംഘടനകളുടെ ബന്ധമുണ്ടോയെന്നുമുള്ള കാര്യങ്ങളും അന്വേഷണത്തിന്റെ ഭാഗമാകും. അഫ്ഗാനിസ്താനിലെ കാബൂള്‍ സര്‍വകലാശാല കേന്ദ്രീകരിച്ച് ഐ.എസിന്റെ ദക്ഷിണേഷ്യാഘടകം ആശയപ്രചാരണം നടത്തി ഓണ്‍ലൈന്‍ റിക്രൂട്ട്‌മെന്റ് നടത്തുന്നതായി അന്താരാഷ്ട്ര രഹസ്യ ഏജന്‍സികള്‍ റിപ്പോര്‍ട്ട് ചെയ്തിരുന്നു. കേരളത്തില്‍നിന്ന് അഫ്ഗാനിലേക്കു പോയി കാണാതായ മലയാളികളില്‍ ചിലരും ഇത്തരം ഓണ്‍ലൈന്‍ റിക്രൂട്ട്‌മെന്റില്‍ ഉള്‍പ്പെട്ടതായി സൂചനയുണ്ട്.

തിരുവനന്തപുരത്തെ സ്വര്‍ണക്കടത്തുകാര്‍ക്ക് തമിഴ്‌നാടുമായുള്ള ബന്ധവും എന്‍.ഐ.എ. അന്വേഷിക്കും. തിരുവനന്തപുരത്ത് എത്തിക്കുന്ന സ്വര്‍ണം ചെന്നൈയിലേക്കാണു കൊണ്ടുപോയിരുന്നതെന്ന് കസ്റ്റംസ് അന്വേഷണത്തില്‍ വ്യക്തമായിരുന്നു. ഈ സ്വര്‍ണം ഏറ്റുവാങ്ങിയവരെക്കുറിച്ചാണ് ഇപ്പോള്‍ എന്‍.ഐ.എ. അന്വേഷിക്കുന്നത്. തമിഴ്‌നാട്ടില്‍ എന്‍.ഐ.എ.യുടെ പിടികിട്ടാപ്പുള്ളികളുടെ പട്ടികയിലുള്ള ഏഴു തീവ്രവാദികള്‍ക്ക് ഇവരുമായി ബന്ധമുണ്ടോയെന്ന് പരിശോധിക്കും. തമിഴ്‌നാട് പോലീസ് വര്‍ഷങ്ങളായി തിരയുന്ന ഹാജാ ഫക്രുദ്ദീന്‍ ഉള്‍പ്പെടെയുള്ള ഏഴുപേരാണിത്. ഐ.എസുമായി ബന്ധപ്പെട്ട് തമിഴ്‌നാട്ടില്‍നിന്ന് സംഘടനയിലേക്ക് യുവാക്കളെ റിക്രൂട്ട് ചെയ്തത് ഹാജാ ഫക്രുദ്ദീന്റെ നേതൃത്വത്തിലാണെന്ന് എന്‍.ഐ.എ. കണ്ടെത്തിയിരുന്നു. ഇവരുടെ റിക്രൂട്ട്‌മെന്റ് പ്രവര്‍ത്തനങ്ങള്‍ക്കായി സ്വര്‍ണക്കടത്ത് ഉപയോഗിച്ചിട്ടുണ്ടാകാമെന്ന് എന്‍.ഐ.എ. കരുതുന്നു.