എന്‍.ഐ.എ. കോടതിയില്‍ പ്രത്യേകിച്ച്‌ ഭാവഭേദം ഒന്നുമില്ലാതെ സ്വപ്ന സുരേഷും സന്ദീപ് നായരും. പോലീസുകാരനോട് നിരന്തരം സംസാരിച്ച്‌ നില്‍ക്കുകയായിരുന്നു സന്ദീപ്. ബെഞ്ചില്‍ മാറി ഇരിക്കുകയായിരുന്നു സ്വപ്‌ന.

ഇരുവര്‍ക്കുംവേണ്ടി അഭിഭാഷകര്‍ ഹാജരായിരുന്നില്ല. ഹൈക്കോടതിയില്‍ സ്വപ്നയ്ക്കുവേണ്ടി മുന്‍കൂര്‍ ജാമ്യഹര്‍ജി നല്‍കിയ അഭിഭാഷകനെയും ബന്ധപ്പെട്ടിരുന്നില്ലെന്നാണ് സൂചന. രക്തസമ്മര്‍ദം അടക്കമുള്ള രോഗങ്ങള്‍ ഉള്ളതിനാല്‍ മരുന്ന് വേണമെന്ന് സന്ദീപ് കോടതിയില്‍ ആവശ്യപ്പെട്ടിരുന്നു.

സ്വപ്നയും ശാരീരിക അസ്വസ്ഥതകള്‍ ഉണ്ടെന്ന് പറഞ്ഞെങ്കിലും തനിക്ക് മരുന്ന് വേണ്ടെന്നും യോഗ ചെയ്താല്‍ ശരിയാകുമെന്നും പിന്നീട് അറിയിച്ചു. അതേസമയം സ്വപ്നയെയും സന്ദീപിനെയും കുടുക്കാന്‍ കേന്ദ്ര ഇന്റലിജന്‍സിനെ സഹായിച്ചത് 'സെല്‍ പൂളിങ്' എന്ന രീതിയായിരുന്നു. പ്രതികളുമായി അടുത്ത് ബന്ധമുള്ളവരുടെ ഫോണുകള്‍ നിരന്തരമായി നിരീക്ഷിക്കുന്ന സംവിധാനമാണിത്.

പ്രതികളുടെ സുഹൃത്തുക്കളുടെയും അടുത്തബന്ധുക്കളുടെയും ഫോണ്‍ നമ്ബറുകള്‍ ഒരു ഗ്രൂപ്പാക്കി സദാ സൈബര്‍ നിരീക്ഷണത്തിലാക്കിയ ശേഷം ഈ നമ്ബറുകളിലേക്ക് പൊതുവായി ഏതെങ്കിലും ഒരു നമ്ബറില്‍നിന്ന് കോള്‍ വരുന്നുണ്ടോയെന്ന് പരിശോധിക്കും.

ഇത്തരത്തില്‍ വരുന്ന ഫോണിന്റെ ടവര്‍ ലൊക്കേഷന്‍ കണ്ടെത്തി വിളിച്ചയാള്‍ ആരാണെന്ന് കണ്ടെത്തും. ഇത്തരത്തില്‍ ബെംഗളൂരുവില്‍നിന്ന് വന്ന ഫോണ്‍ നമ്ബര്‍ പിന്തുടര്‍ന്നാണ് പ്രതികളുടെ ടവര്‍ ലൊക്കേഷനും താമസസ്ഥലവും കണ്ടെത്തിയത്.