തിരുവനന്തപുരം ഡിപ്ലോമാറ്റിക് ബാഗേജിന്റെ മറവില്‍ നടത്തിയ സ്വര്‍ണക്കടത്ത് കേസ് അന്വേഷിക്കുന്ന എന്‍ഐഎ സംഘത്തിലെ പ്രധാന ഉദ്യോഗസ്ഥരിലൊരാളായ എ പി ഷൗക്കത്ത് അലി സംസ്ഥാന പൊലീസില്‍ നിന്ന് ഐപിഎസ് ലഭിക്കേണ്ടവരുടെ പട്ടികയില്‍. 2018 ബാച്ചില്‍ ഐപിഎസ് ലഭിക്കാവുന്ന പരിഗണനാ പട്ടികയില്‍ പതിനൊന്നാമനായാണ് ഷൗക്കത്ത് അലിയെ ഡിജിപി ലോക്നാഥ് ബഹ്റ ശുപാര്‍ശ ചെയ്തിരിക്കുന്നത്.

ടിപി വധക്കേസ് അന്വേഷണത്തിന്റെ പേരില്‍ സിപിഎമ്മിന്റെ കണ്ണിലെ കരടായ കെ വി സന്തോഷിന്റെ പേരും ഉള്‍പ്പെടുന്ന പട്ടിക സംസ്ഥാന സര്‍ക്കാരിന്റെ പരിഗണനയിലാണ്. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി ശിവശങ്കറിന്റെ സെക്രട്ടേറിയറ്റിനു സമീപമുള്ള ഫ്ലാറ്റില്‍ റെയിഡ് നടത്തിയത് ഷൗക്കത്തലിയുടെ നേതൃത്വത്തിലയിരുന്നു. ബംഗളൂരുവില്‍ നിന്ന് സ്വപ്ന സുരേഷിനെ അറസ്റ്റ് ചെയ്ത സംഘത്തെ നയിച്ചതും ഷൗക്കത്തലി ആയിരുന്നു.

കേരളം ഞെട്ടിപ്പോയ ടിപി ചന്ദ്രശേഖരന്‍ കൊലക്കേസ് പ്രതികളില്‍ മാത്രമായി ഒതുങ്ങി പോകാതെ ഗൂഢാലോചന വരെ അന്വേഷിച്ച് കണ്ടുപിടിച്ച് ആളാണ് എ.പി ഷൗക്കത്തലി. രാഷ്ട്രീയ എതിരാളികളെ തരിമ്പും കൂസാത്ത ഈ വീരന്‍, ടിപി കേസിന് പുറകെ എന്‍.ഐ.എ യില്‍ ഡെപ്യൂട്ടേഷന്‍ നിയമനം നേടുകയായിരുന്നു.2015 പാരിസ് ഭീകരാക്രമണ കേസ് അന്വേഷണവുമായി ബന്ധപ്പെട്ട് ഇന്ത്യ അയച്ച എന്‍ഐഎ സംഘത്തെ നയിച്ചത് ഷൗക്കത്തലി, തീവ്രവാദ വിരുദ്ധ സ്പെഷലിസ്റ്റായാണ് അറിയപ്പെടുന്നത്.

2018 ബാച്ചിലെ എസ്പിമാരില്‍ 11 പേര്‍ക്കാണ് കേന്ദ്ര സര്‍ക്കാര്‍ ഐപിഎസ് നല്‍കേണ്ടത്. പതിനൊന്ന് തസ്തികകളിലേക്ക് പരിഗണിക്കാനായി 40 എസ്പിമാരുടെ പട്ടികയാണ് ഡിജിപി ശുപാര്‍ശയായി നല്‍കിയത്. ഇതില്‍ പതിനൊന്നാമത്തെ പേര് എന്‍ഐഎയുടെ അഡീഷണല്‍ എസ്പി എ പി ഷൗക്കത്ത് അലിയുടേതാണ്. ടിപി വധക്കേസ് അന്വേഷിച്ച മറ്റൊരു ഉദ്യോഗസ്ഥന്‍ കെ വി സന്തോഷ് പട്ടികയിലെ പതിമൂന്നാമനാണ്. സംസ്ഥാന പൊലീസിലെ മികച്ച അന്വേഷണ ഉദ്യോഗസ്ഥരെന്ന നിലയില്‍ ഇരുവര്‍ക്കും ഐപിഎസ് ലഭിക്കാനാണ് സാധ്യത. 2017ലെ പട്ടികയില്‍ ഉള്‍പ്പെട്ട ഏഴ് എസ്പിമാര്‍ക്ക് കേന്ദ്രം ഇപ്പോഴും ഐപിഎസ് നല്‍കേണ്ടതുണ്ട്.

അതിനായി നല്‍കിയ പട്ടിക ഇപ്പോഴും കേന്ദ്രത്തിന്റെ പരിഗണനയിലാണ്. ഈ പട്ടികയില്‍ ഉള്‍പ്പെട്ടിട്ടുളള ചില ഉദ്യോഗസ്ഥരും 2018 ലെ പട്ടികയില്‍ ഉള്‍പ്പെട്ടിട്ടുണ്ട്. ഇവര്‍ക്ക് 2017 ലെ പട്ടിക അനുസരിച്ചു തന്നെ ഐപിഎസ് ലഭിച്ചാല്‍ 2018ലെ പട്ടികയിലുള്ള ഷൗക്കത്ത് അലിയുടെയുയും കെ വി സന്തോഷിന്റെയും സാധ്യത വര്‍ധിക്കുകയും ചെയ്യും. ഡിജിപി നല്‍കിയ പട്ടികയ്ക്കൊപ്പം ഉദ്യോഗസ്ഥരുടെ കോണ്‍ഫിഡന്‍ഷ്യല്‍ റിപ്പോര്‍ട്ടുമുണ്ട്. ഇത് സംസ്ഥാന ആഭ്യന്തര വകുപ്പിന്റെ പരിഗണനയിലാണ്. സര്‍ക്കാരിന്റെ ശുപാര്‍ശയോടെയാകും പട്ടിക കേന്ദ്ര ആഭ്യന്തരമന്ത്രാലയത്തിന് കൈമാറുക. ടി പി വധക്കേസിലെ അന്വേഷണത്തിന് ശേഷം സിപിഎമ്മിന്റെ കണ്ണിലെ കരടായ ഷൗക്കത്ത് അലി എന്‍ഐഎയില്‍ ഡെപ്യൂട്ടേഷന്‍ വാങ്ങി പോവുകയായിരുന്നു. കെ വി സന്തോഷ് കുമാര്‍ ഇപ്പോള്‍ ക്രൈംബ്രാഞ്ച് എസ് പിയാണ്.