സ്വര്ണക്കടത്തുകാര് ഞെട്ടിവിറക്കുന്നു; എന്.ഐ.എയുടെ കൈയില് നിന്നു രക്ഷപ്പെടാന് കസ്റ്റംസിന് മുന്നില് കീഴടങ്ങുന്നു; യു.എ.പി.എയെ ഭയന്ന് ഉറക്കം നഷ്ടപ്പെട്ട സ്വര്ണക്കടത്തുകാര്; എന്.ഐ.എ മാസാണ്
സ്വര്ണക്കടത്ത് കേസ് എന്.ഐ.എ അന്വേഷിക്കാന് എത്തിയതോടെ സ്വര്ണക്കടത്തുകാരുടെ ചങ്കിടിപ്പ് കൂടുകയാണ്. സാധാരണ കസ്റ്റംസും അതിനപ്പുറം ഇ.ഡി.യും മാത്രം അന്വേഷിച്ചിരുന്ന സ്വര്ണക്കടത്ത് കേസിലേക്ക് എന്.ഐ.എ.കൂടി വന്നതോടെ ഭയപ്പാടിലാണ് കേരളത്തിലെ സ്വര്ണക്കടത്ത് സംഘങ്ങള്. രാജ്യത്ത് ആദ്യമായാണ് സ്വര്ണക്കടത്ത് എന്.ഐ.എ. അന്വേഷിക്കുന്നത്. യു.എ.പി.എ. സെക്ഷന് 15 പ്രകാരം രാജ്യത്തിന്റെ സാമ്പത്തികഭദ്രത തകര്ക്കുന്ന ഏതൊരു പ്രവൃത്തിയും തീവ്രവാദപ്രവര്ത്തനമായാണ് കാണുന്നത്. കേസില് എന്.ഐ.എ. അറസ്റ്റ് ചെയ്തിരിക്കുന്ന എല്ലാവരുടെയുംപേരില് യു.എ.പി.എ. പ്രകാരമാണ് കേസെടുത്തത്. ഇതോടെ സ്വര്ണക്കടത്തുകാര് നെട്ടോട്ടതിലായി.
സ്വര്ണക്കടത്തിന് എന്.ഐ.എ കേസെടുക്കുന്നത് രാജ്യവിരുദ്ധപ്രവര്ത്തനത്തിനായിരിക്കും. ചുമത്തുന്നത് യു.എ.പി.എ. സെക്ഷന് 16, 17, 18 വകുപ്പുകളും. സെക്ഷന് 15 പ്രകാരം സാമ്പത്തിക കുറ്റകൃത്യവും ഭീകരപ്രവര്ത്തനമാണെന്നാണ് എന്.ഐ.ഐ പറയുന്നത്. അതോടെ കള്ളക്കടത്തുകാര്ക്ക് ജാമ്യംകിട്ടാനുള്ള സാധ്യത വിരളമാകും. കുറ്റക്കാരനല്ലെന്ന് തെളിയിക്കേണ്ട ബാധ്യത അറസ്റ്റിലാകുന്നവര്ക്ക്. അഞ്ചു വര്ഷം മുതല് ജീവപര്യന്തംവരെ തടവുരെ കിട്ടാവുന്ന കുറ്റം. അതുകൊണ്ടു തന്നെ കസ്റ്റംസിന് പിടികൊടുത്താലും വേണ്ടില്ലെന്ന് സ്വര്ണക്കടത്തുകാര് വിചരിക്കുന്നത്. കസ്റ്റംസാണ് സ്വര്ണം പിടിക്കുകയും പ്രതികളെ അറസ്റ്റു ചെയ്യുകയും ചെയ്താലും 60 ദിവസത്തിനകം കുറ്റപത്രം നല്കിയില്ലെങ്കില് സ്വഭാവികജാമ്യം ലഭിക്കും. സ്വര്ണം കണ്ടുകെട്ടുമെങ്കിലും ജയില്ശിക്ഷ ലഭിക്കുന്നത് കുറവ്. കസ്റ്റംസ് ആക്ട് സെക്ഷന് 136 പ്രകാരം പരമാവധി ശിക്ഷ ഏഴുവര്ഷം തടവ്. കുറ്റപത്രം കൊടുക്കുന്നതിന് മുന്പേ നികുതിയും പിഴയും അടച്ചാല് ഇളവ് ലഭിക്കാം. കോഫേ പോസ ചുമത്തിയാലും ലഭിക്കുക ഒരു വര്ഷം തടവ്.
നയതന്ത്ര ബാഗിന് മറവില് നടന്ന സ്വര്ണക്കടത്തുമായി ബന്ധമില്ലെന്ന് സ്ഥാപിക്കാനുള്ള തത്രപ്പാടിലാണ് ഇപ്പോള് സ്വര്ണകള്ളക്കടത്തുകാര്. എന്.ഐ.എ.യുടെ അന്വേഷണവഴിയില്പ്പെടാതിരിക്കാനാണ് ഈ നീക്കം. സ്വര്ണക്കടത്തുമായി ബന്ധപ്പെട്ടവര് മുന്പില്ലാത്തവിധം മുന്കൂര് ജാമ്യംതേടി ഹൈക്കോടതിയിലെത്തുന്നത് ഈ ഭീതിയുടെ ഭാഗമാണെന്ന് നിയമവൃത്തങ്ങള് പറയുന്നു. സ്വര്ണക്കടത്ത് കേസില് അറസ്റ്റിലായ സംജുവിന്റെ ബന്ധു കോഴിക്കോട് എരഞ്ഞിക്കല് സ്വദേശി ഷംസുദ്ദീന് മുന്കൂര് ജാമ്യംതേടി കഴിഞ്ഞദിവസം ഹൈക്കോടതിയെ സമീപിച്ചിരുന്നു. കസ്റ്റംസ് അറസ്റ്റ് ചെയ്ത മറ്റ് മൂന്നുപേരും ജാമ്യംതേടി ഹൈക്കോടതിയെ സമീപിച്ചിട്ടുണ്ട്. നയതന്ത്ര ബാഗേജിന്റെ മറവില് നടന്ന സ്വര്ണക്കടത്തുമായി ഏതെങ്കിലും ബന്ധമുള്ളവര് സ്വയംസന്നദ്ധരായി കസ്റ്റംസിനു മുന്നില് കീഴടങ്ങാന് എത്തുന്നതായും വിവരമുണ്ട്. എന്.ഐ.എ.യുടെ അന്വേഷണം നടക്കുന്നതിനാല് മുന്കരുതല് എന്ന നിലയിലാണ് ഈ നീക്കമെന്ന് മുതിര്ന്ന അഭിഭാഷകര് പറയുന്നു.
https://www.facebook.com/Malayalivartha
