സ്വര്‍ണക്കടത്ത് കേസിലെ അന്വേഷണം ദുബായിലും പുരോഗമിക്കുകയാണ്. അറ്റാഷെയേയും കോണ്‍സുലേറ്റ് ജനറലിനേയും മുന്നില്‍ നിര്‍ത്തി രക്ഷപ്പെടാനുള്ള സ്വപ്നയുടെ ശ്രമങ്ങള്‍ ഇതോടെ വീണുടയും. അതേസമയം ശിവശങ്കറിന് മേലുള്ള കുരുക്കും മുറുകുകയാണ്. സ്വര്‍ണം അടങ്ങിയ ബാഗേജ് വിട്ടു നല്‍കാന്‍ കസ്റ്റംസില്‍ സ്വാധീനം ചെലുത്തണമെന്ന തന്റെ ആവശ്യം പ്രിന്‍സിപ്പല്‍ സെക്രട്ടറിയായിരുന്ന ശിവശങ്കര്‍ നിരാകരിച്ചു എന്ന സ്വപ്‌ന സുരേഷിന്റെ മൊഴിയാണ് ശിവശങ്കറിനെ കൂടുതല്‍ പ്രതിരോധത്തിലാക്കുന്നത്.

ആഭ്യന്തര വകുപ്പ് കൈകാര്യം ചെയ്യുന്ന മുഖ്യമന്ത്രിയുടെ അന്നത്തെ പ്രധാന സെക്രട്ടറി എന്ന നിലയില്‍ സ്വര്‍ണക്കടത്ത് സംബന്ധിച്ച സുപ്രധാന വിവരം അധികൃതര്‍ക്ക് കൈമാറാതെ മറച്ചുവച്ചതാണ് അദ്ദേഹത്തിനെതിരെയുള്ള കുരുക്ക് മുറുകാന്‍ ഇടയാക്കുന്നത്.

രാജ്യത്തിന്റെ സമ്പദ് വ്യവസ്ഥയെ തന്നെ പ്രതികൂലമായി ബാധിക്കുന്ന സുപ്രധാന വിവരം അടിയന്തരമായി ശിവശങ്കര്‍ പോലീസിനെയും മറ്റ് ബന്ധപ്പെട്ട ഉദ്യോഗസ്ഥരേയും അറിയിക്കേണ്ടതായിരുന്നു. എന്നാല്‍ കേസിന്റെ ഒരു ഘട്ടത്തിലും ഇക്കാര്യം വെളിപ്പെടുത്താന്‍ അദ്ദേഹം തയാറായില്ല. എന്‍.ഐ.എ ചോദ്യം ചെയ്തപ്പോഴും ഈ വിവരം ശിവശങ്കര്‍ പറഞ്ഞില്ല.

അതേസമയം കോണ്‍സുലേറ്റ് വഴി ഖുര്‍ആന്‍ എത്തിയതിനു പിന്നില്‍ ദുരുഹതയുണ്ടെന്നു തന്നെയാണ് എന്‍.ഐ.എ കരുതുന്നത്. കേരളത്തില്‍ ആവശ്യത്തിന് ഖുര്‍ആന്‍ പ്രിന്റ് ചെയ്യുന്നുണ്ട്. വിശ്വാസികള്‍ക്ക് സൗജന്യമായി നല്‍കാറുമുണ്ട്. എത്തിയ വിശുദ്ധ ഗ്രന്ഥങ്ങള്‍ എത് ഭാഷയിലാണ് അച്ചടിച്ചത് എന്നതിനെപ്പറ്റിയും പ്രിന്റ് ചെയ്ത സ്ഥാപനത്തെപ്പറ്റിയും അന്വേഷിക്കും. വിദേശത്തു നിന്നും എത്തിയ ഖുറാന്റെ പ്രതികളും പരിശോധിക്കുമെന്നാണ് സൂചന.

സ്വര്‍ണക്കടത്തില്‍ സ്വപ്നാ സുരേഷ് പങ്കാളിയാണെന്നതിന് പ്രഥമദൃഷ്ട്യാ തെളിവുണ്ടെന്നും അവര്‍ക്കെതിരേ ചുമത്തിയ യു.എ.പി.എ. നിലനില്‍ക്കുമെന്നും എന്‍.ഐ.എ. കോടതി കണ്ടെത്തിയതും ശിവശങ്കറേയും ദോഷം ചെയ്യും. അല്ലെങ്കില്‍ ശിവശങ്കറിന്റെ കേസും ദുര്‍ബലമായേനെ.

സ്വര്‍ണക്കടത്തിലൂടെ നടന്നത് രാജ്യത്തിന്റെ സാമ്പത്തിക സുസ്ഥിരത തകര്‍ക്കുകയെന്ന ഭീകരവാദമാണെന്നാണ് കോടതി കണ്ടെത്തിയത്. ഇതേക്കുറിച്ച് വ്യക്തമായ അറിവോടെയും ലക്ഷ്യത്തോടെയുമാണ് പ്രതികള്‍ പ്രവര്‍ത്തിച്ചത്. അതിനാല്‍ യു.എ.പി.എ. 43 ഡി വകുപ്പ് പ്രതികള്‍ക്കെതിരേ നിലനില്‍ക്കുമെന്നാണ് കോടതി ചൂണ്ടിക്കാട്ടിയത്.

കോടതിയില്‍ എന്‍.ഐ.എ. ഹാജരാക്കിയ കേസ് ഡയറിയില്‍ ചൂണ്ടിക്കാട്ടിയിരിക്കുന്ന കാര്യങ്ങളും പ്രതികളുടെ മൊഴിയും യു.എ.പി.എ. നിലനിര്‍ത്തുന്നതാണെന്നും കോടതി നിരീക്ഷിച്ചു.

സ്വപ്‌നാ സുരേഷ്, ടി.എം. മുഹമ്മദ് അന്‍വര്‍, മുഹമ്മദ് അബ്ദുള്‍ ഷമീം, ജിഫ്‌സല്‍ എന്നിവരുടെ ജാമ്യ ഹര്‍ജി ഹൈക്കടതിയില്‍ വാദം കേള്‍ക്കുകയാണ്. എന്നാല്‍ സ്വര്‍ണക്കടത്ത് ഗുരുതരമായ സാമ്പത്തിക കുറ്റകൃത്യമാണെന്നും ഇതില്‍ പങ്കാളികളായവര്‍ വന്‍ കള്ളക്കടത്ത് സംഘത്തിന്റെ ഭാഗമാണെന്നും കസ്റ്റംസ് ഹൈക്കോടതിയെ അറിയിച്ചിട്ടുമുണ്ട്. രണ്ടുപേരെ വിദേശത്തുനിന്ന് അറസ്റ്റ് ചെയ്യാനുണ്ട്. പ്രതികള്‍ക്ക് ജാമ്യം അനുവദിച്ചാല്‍ തെളിവ് നശിപ്പിക്കാനും സാക്ഷികളെ സ്വാധീനിക്കാനുമുള്ള സാധ്യത ഏറെയാണ്. അത് അന്വേഷണത്തെ ദുര്‍ബലപ്പെടുത്തും കസ്റ്റംസ് കോടതിയെ അറിയിച്ചു.

ജാമ്യ ഹര്‍ജി എതിര്‍ത്തുകൊണ്ട് ഒരോരുത്തരുടെയും പേരില്‍ പ്രത്യേകം റിപ്പോര്‍ട്ട് കസ്റ്റംസ് കോടതിയില്‍ സമര്‍പ്പിച്ചു. ഹവാല ഇടപാടിലൂടെയാണ് സ്വര്‍ണക്കടത്തിനാവശ്യമായ പണം വിദേശത്ത് എത്തിച്ചത്. കടത്തിക്കൊണ്ടുവരുന്ന സ്വര്‍ണം ഈ റാക്കറ്റുംകൂടി പങ്കാളിയായ ജൂവലറിയിലൂടെ മാറ്റിയെടുക്കുമെന്ന് കസ്റ്റംസ് പറഞ്ഞു. ഹൈക്കോടതി കൂടി ജാമ്യ ഹര്‍ജി തള്ളിയാല്‍ സ്വപ്നയ്ക്കും കൂട്ടര്‍ക്കും കൂടുതല്‍ കുരുക്ക് മുറുകുന്നതാണ്.