നെടുമ്പാശ്ശേരി മിനി കൂപ്പർ ദുരന്തത്തിൽ പ്രതികളുടെ കള്ളങ്ങളെല്ലാം പൊളിച്ചടുക്കി പോലീസ് സ്പെഷ്യൽ ഇൻവെസ്റ്റിഗേഷൻ ടീം. താൻ മണിക്കൂറിൽ 120 കിലോമീറ്റർ വേഗതയിലാണ് വാഹനം ഓടിച്ചതെന്ന പ്രതി സുഹൈൽ സജീവിന്റെ മൊഴി പൂർണ്ണമായും കള്ളമാണെന്ന് പോലീസ് കണ്ടെത്തി. അപകടം നടക്കുന്നതിന് തൊട്ടുമുമ്പ് കാറിലുണ്ടായിരുന്ന സുഹൃത്ത് ജോയൽ പകർത്തിയ സ്നാപ്ചാറ്റ് വീഡിയോ ദൃശ്യങ്ങളാണ് കേസിൽ വഴിത്തിരിവായത്. ലക്ഷ്വറി കാറിന്റെ സ്പീഡോമീറ്റർ 140-നും 150-നും ഇടയിൽ കാണിക്കുന്ന ഈ വീഡിയോ സൈബർ പോലീസ് വീണ്ടെടുത്തു കഴിഞ്ഞു. വെറും 11 സെക്കൻഡുകൾ കൊണ്ടാണ് ഈ ആഡംബര വാഹനം 500 മീറ്റർ ദൂരം പാഞ്ഞുതീർത്തത്. കൂടുതൽ ശാസ്ത്രീയ തെളിവുകൾക്കായി കാറിന്റെ ഇഡിആർ ചിപ്പ് ജർമ്മനിയിലെ ബിഎംഡബ്ല്യു ആസ്ഥാനത്തേക്ക് അയക്കാനുള്ള നടപടികളും പോലീസ് വേഗത്തിലാക്കി.