ഹൂതി മിസൈല്‍ ആക്രമണത്തില്‍ സൗദി അറേബ്യയുടെ പ്രതിരോധ സംവിധാനം തകര്‍ന്നു
ബാലിസ്റ്റിക് മിസൈലുകള്‍ സൗദി അറേബ്യയുടെ പ്രതിരോധ സംവിധാനം തകര്‍ത്തതായി റിപ്പോര്‍ട്ട്. മിസൈലുകള്‍ തടഞ്ഞതിനെത്തുടര്‍ന്ന് അവയുടെ അവശിഷ്ടങ്ങള്‍ മക്ക, മദീന മേഖലകളില്‍ പതിച്ചതായി സൗദി സിവില്‍ ഡിഫന്‍സ് അറിയിച്ചു. രണ്ട് ബാലിസ്റ്റിക് മിസൈലുകളില്‍ നിന്നുള്ള അവശിഷ്ടങ്ങളാണ് വിവിധ പ്രദേശങ്ങളില്‍ പതിച്ചതെന്ന് സൗദി സിവില്‍ ഡിഫന്‍സ് എക്‌സ് പോസ്റ്റിലൂടെ വ്യക്തമാക്കി. മക്കയ്ക്ക് പുറത്തുള്ള വാദി മുഗമാസ്, ജിദ്ദയിലെ അല്‍ നുസ്ഹ മേഖല, തായിഫിലെ വാദി ജലീല്‍, റാബിഗിലെ ജനവാസമില്ലാത്ത പ്രദേശം എന്നിവിടങ്ങളിലാണ് അവശിഷ്ടങ്ങള്‍ വീണത്.
സൗദി ആഭ്യന്തര മന്ത്രാലയത്തിന് കീഴില്‍ പ്രവര്‍ത്തിക്കുന്ന സിവില്‍ ഡിഫന്‍സ്, സംഭവങ്ങള്‍ക്ക് പിന്നാലെ പടിഞ്ഞാറന്‍ മേഖലയിലെ നാല് പ്രവിശ്യകളില്‍ ജാഗ്രതാ നിര്‍ദേശം പുറപ്പെടുവിച്ചിരുന്നു. മക്ക അടക്കമുള്ള പ്രദേശങ്ങളിലെ ജനങ്ങളോട് അപകടസാധ്യത കണക്കിലെടുത്ത് സുരക്ഷിത സ്ഥാനങ്ങളിലേക്ക് മാറാനും നിര്‍ദേശിച്ചു.
വെള്ളിയാഴ്ചയും ശനിയാഴ്ചയുമായി സൗദിയിലെ വിവിധ കേന്ദ്രങ്ങള്‍ ആക്രമിച്ചതായി ഹൂതികള്‍ അവകാശപ്പെട്ടു. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളം, ദമാം, നജ്‌റാന്‍ മേഖലകളിലെ വിമാനത്താവളങ്ങള്‍ എന്നിവ ലക്ഷ്യമിട്ടെന്നാണ് ഹൂതി സൈനിക വക്താവ് യഹ്യ സരീയുടെ പ്രസ്താവന. തെക്കന്‍ മേഖലയിലെ ഖമീസ് മുഷൈത്ത് വ്യോമതാവളവും കിഴക്കന്‍ മേഖലയില്‍നിന്ന് പടിഞ്ഞാറന്‍ മേഖലയിലേക്ക് ക്രൂഡ് ഓയില്‍ എത്തിക്കുന്ന പൈപ്പ്‌ലൈനും എണ്ണ പമ്പിംഗ് കേന്ദ്രങ്ങളും ആക്രമണലക്ഷ്യങ്ങളായിരുന്നുവെന്നും ഹൂതികള്‍ അറിയിച്ചു.
https://www.facebook.com/Malayalivartha
