സ്വപ്ന സുരേഷുമായുള്ള ബന്ധം കാരണം സര്‍വതും തകര്‍ന്ന നിലയിലാണ് സര്‍ക്കാര്‍ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കര്‍. ജീവിതത്തില്‍ നിന്നു തന്നെ മനസമാധാനം നഷ്ടപ്പെട്ടു. എത്ര പ്രാവശ്യമാ അന്വേഷണ സംഘം ശിവശങ്കറെ ചോദ്യം ചെയ്തത്. പലപ്പോഴും അറസ്റ്റ് ഉറപ്പെന്ന തരത്തിലാണ് വാര്‍ത്തകള്‍ വന്നുകൊണ്ടിരുന്നത്. എന്നാല്‍ ശക്തമായ തെളിവിന്റെ അഭാവം ഒന്നുകൊണ്ട് മാത്രമാണ് ശിവശങ്കരന് ഊരിപ്പോരാനായത്. കഴിഞ്ഞ ദിവസം ചോദ്യം ചെയ്യാന്‍ വിളിച്ച എന്‍ഫോഴ്‌സ്‌മെന്റ് ഡയറക്ടറേറ്റ് അഥവാ ഇഡിയില്‍ നിന്നും ശിവശങ്കര്‍ ഊരി വന്നതാണ്. ഇടിത്തി പോലുള്ള ഇഡിയുടെ ഒന്നൊന്നര ചോദ്യമാണ് ശിവശങ്കറെ കഴിഞ്ഞ ദിവസം സംശയ മുനയിലാക്കിയത്. സ്വപ്നയുമായുള്ള സുഹൃത് ബന്ധത്തിനപ്പുറം ഒന്നുമില്ലെന്നാണ് ശിവശങ്കര്‍ തിരിച്ചും മറിച്ചും ചോദിച്ചിട്ടും ഉത്തരം പറഞ്ഞത്. എന്നാല്‍ ഒരു കോടിയിലും ഒരു കിലോ സ്വര്‍ണത്തിലും തട്ടിയാണ് ശിവശങ്കര്‍ വീണത്.

അതോടെയാണ് വീണ്ടും അടുത്തയാഴ്ച വീണ്ടും ഹാജരാകാന്‍ ഇ.ഡി നിര്‍ദേശിച്ചത്. കൊച്ചിയിലെ ഇ.ഡി ഓഫീസിലെ അഞ്ച് മണിക്കൂറോളം നീണ്ട ചോദ്യം ചെയ്യലിന് ശേഷമാണ് ശിവശങ്കര്‍ താമസസ്ഥലത്തേക്ക് മടങ്ങിയത്.

സ്വര്‍ണക്കടത്ത് കേസില്‍ ചോദ്യം ചെയ്യലിനായി ഹാജരാകാന്‍ ശിവശങ്കറിന് എന്‍ഫോഴ്‌സ്‌മെന്റ് ഡയറക്ടറേറ്റ് നേരത്തെ നോട്ടീസ് നല്കിയിരുന്നു. സ്വപ്നയെപ്പറ്റി കൂടുതല്‍ അറിയാന്‍ അദ്ദേഹത്തെ ചോദ്യം ചെയ്യുമെന്നും ഇ.ഡി വ്യക്തമാക്കിയിരുന്നു. സ്വപ്‌നയുടെ രണ്ട് ബാങ്ക് ലോക്കറുകളെപ്പറ്റിയാണ് എന്‍ഫോഴ്‌സ്‌മെന്റ് പ്രധാനമായും അന്വേഷണം നടത്തുന്നത്. ശിവശങ്കര്‍ ആവശ്യപ്പെട്ടതിനെ തുടര്‍ന്നാണ് ലോക്കര്‍ തുറന്നതെന്ന് ചാര്‍ട്ടേഡ് അക്കൗണ്ടന്റ് മൊഴി നല്‍കിയിരുന്നു.

രണ്ട് ലോക്കറുകളില്‍ നിന്നായി ഒരു കോടി രൂപയും ഒരു കിലോ സ്വര്‍ണവുമാണ് കണ്ടെടുത്തത്. ശിവശങ്കറിന്റെ ബിനാമി ഇടപാടാണോ ഇതെന്ന് എന്‍ഫോഴ്‌സ്‌മെന്റ് അന്വേഷിക്കും. ലൈഫ് മിഷന്‍ വഴി കിട്ടിയ കമ്മിഷനാണ് ഒരു കോടിയെന്ന് സ്വപ്‌ന മൊഴി നല്‍കിയിട്ടുണ്ട്.സ്വപ്‌നയുടെ മൊഴിയില്‍ നിന്ന് കിട്ടിയ നിര്‍ണായക വിവരങ്ങള്‍ അനുസരിച്ച് ശിവശങ്കറിനെ ചോദ്യം ചെയ്യണമെന്ന് എന്‍ഫോഴ്‌സ്‌മെന്റ് ഡയറക്ടറേറ്റ് ആവശ്യപ്പെട്ടിരുന്നു. ദേശീയ അന്വേഷണ ഏജന്‍സിക്കും കസ്റ്റംസിനും പിന്നാലെയാണ് എന്‍ഫോഴ്‌മെന്റ് ഡയറക്ടറേറ്റും എം ശിവശങ്കറിനെ ചോദ്യം ചെയ്തത്. ശിവശങ്കറിന് സ്വപ്‌നയുടെ വ്യക്തിത്വത്തെ കുറിച്ച് വ്യക്തമായ ധാരണ ഉണ്ടായിരുന്നുവെന്നും അടുത്ത ബന്ധമാണ് ഇരുവരും തമ്മില്‍ ഉണ്ടായിരുന്നതെന്നും എന്‍ഫോഴ്‌സ്‌മെന്റ് ഡയറക്ടറേറ്റ് പറഞ്ഞിരുന്നു. മുഖ്യമന്ത്രിയുടെ ഓഫീസില്‍ നല്ല സ്വാധീനമുണ്ടെന്ന് സ്വപ്ന എന്‍ഫോഴ്‌സ്‌മെന്റിന് മൊഴി നല്‍കിയിരുന്നു. പ്രളയ സഹായം സ്വരൂപിക്കാന്‍ ശിവശങ്കര്‍ യു.എ.ഇയില്‍ പോയ സമയത്ത് സ്വപ്‌നയും ഒപ്പം ഉണ്ടായിരുന്നുവെന്നാണ് എന്‍ഫോഴ്‌സ്‌മെന്റ് കണ്ടെത്തല്‍. ഇതോടെയാണ് വീണ്ടും ഹാജരാകാന്‍ ഇഡി നിര്‍ദേശിച്ചത്.

അതേസമയം സ്വര്‍ണക്കടത്ത് കേസിലെ മുഖ്യ പ്രതി സ്വപ്‌ന സുരേഷ് വിദേശ കറന്‍സിയും കടത്തിയതായി റിപ്പോര്‍ട്ടുകള്‍ വന്നു. പ്രവാസി മലയാളികളെ തിരികെ കൊണ്ടുവരാന്‍ കേന്ദ്രസര്‍ക്കര്‍ ആരംഭിച്ച വന്ദേ ഭാരത് പദ്ധതിയെ മുതലെടുത്ത് ജൂണ്‍ പകുതിയോടെ വിദേശത്തേക്ക് പറന്ന വിമാനങ്ങളില്‍ സ്വപ്നയുടെ ശുപാര്‍ശയില്‍ കയറിപ്പറ്റിയ ചില വിദേശികള്‍ ദുബായിലേക്ക് വിദേശകറന്‍സി കടത്തിയതായി സംശയമുണ്ട്.

ഇവര്‍ക്ക് യാത്രയ്ക്കായുള്ള വിമാനടിക്കറ്റുകളെടുത്തു നല്‍കിയതു തിരുവനന്തപുരത്തെ യുഎഇ കോണ്‍സുലേറ്റില്‍ നിന്നാണെന്ന വിവരങ്ങളെ അടിസ്ഥാനമാക്കി അന്വേഷണ സംഘം പരിശോധന ആരംഭിച്ചതായാണ് വിവരം. സ്വപ്ന വന്‍തോതില്‍ വിദേശ കറന്‍സി ശേഖരിച്ചതായി അന്വേഷണ സംഘങ്ങള്‍ക്കു വിവരം ലഭിച്ചതായും റിപ്പോര്‍ട്ടുകള്‍ ഉണ്ട്. ഇതോടൊപ്പമാണ് സ്വപ്നയുടെ ദുബായ് യാത്രയും അന്വേഷിക്കുന്നത്. സ്വപ്നയും ശിവശങ്കറും ഒന്നിച്ച് ദുബായില്‍ എത്തിയതിനെപ്പറ്റിയും അന്വേഷണം നടക്കുന്നുണ്ട്. എന്തായാലും അനന്തമായി നീളുന്ന ശിവശങ്കറിന്റെ ചോദ്യം ചെയ്യലിന്റെ ക്ലൈമാക്‌സ് അറിയാന്‍ ഇനിയും കാത്തിരിക്കണം.