കേരള കോണ്‍ഗ്രസില്‍ (എം) വിപ്പ് നല്‍കാനുള്ള അധികാരം ആര്‍ക്കെന്നതില്‍ ജോസഫ്, ജോസ് വിഭാഗങ്ങള്‍ തമ്മില്‍ തര്‍ക്കം
രാജ്യസഭാ തിരഞ്ഞെടുപ്പില്‍ വിപ്പ് നല്‍കേണ്ട സാഹചര്യം ഉയര്‍ന്നപ്പോള്‍ കേരള കോണ്‍ഗ്രസില്‍ (എം) വിപ്പ് നല്‍കാനുള്ള അധികാരം ആര്‍ക്കെന്നതില്‍ ജോസഫ്, ജോസ് വിഭാഗങ്ങള്‍ തമ്മില്‍ തര്‍ക്കം.
കേരള കോണ്‍ഗ്രസ് എം (ജോസ് വിഭാഗം) രാജ്യസഭ തിരഞ്ഞെടുപ്പില്‍ നിന്ന് വിട്ടുനില്‍ക്കുമെന്നും ഇക്കാര്യം നിര്‍ദേശിച്ച് പാര്‍ട്ടി എംഎല്‍എമാര്‍ക്ക് റോഷി അഗസ്റ്റിന്‍ എംഎല്‍എ വിപ്പ് നല്‍കുമെന്നും ജോസ് കെ.മാണി എംപി പറഞ്ഞു.
വിപ്പ് നല്‍കാനുള്ള അധികാരം ആര്‍ക്കാണെന്ന് കെ.എം. മാണി ഉള്ളപ്പോള്‍ത്തന്നെ തീരുമാനിച്ചതാണ്. ഇതനുസരിച്ച് പി.ജെ.ജോസഫ് ഉള്‍പ്പെടെയുള്ള എംഎല്‍എമാര്‍ക്കെല്ലാം റോഷി വിപ്പ് നല്‍കുമെന്നും ജോസ് കെ.മാണി പറഞ്ഞു. സംസ്ഥാന സര്‍ക്കാരിനെതിരെ യുഡിഎഫ് കൊണ്ടുവരുന്ന അവിശ്വാസപ്രമേയം സംബന്ധിച്ച് സര്‍ക്കാര്‍ തീരുമാനമെടുക്കുമ്പോള്‍ പാര്‍ട്ടിയും തീരുമാനമെടുക്കും.
അതേസമയം, ജോസ് കെ. മാണി വിഭാഗത്തിലെ എംഎല്‍എമാര്‍ക്ക് സ്വതന്ത്ര നിലപാട് സ്വീകരിക്കാനാവില്ലെന്ന് ജോസഫ് വിഭാഗം വര്‍ക്കിങ് ചെയര്‍മാന്‍ പി.ജെ. ജോസഫ് പറഞ്ഞു. പാര്‍ട്ടിയുടെ വിപ്പ് നല്‍കുക മോന്‍സ് ജോസഫ് എംഎല്‍എയായിരിക്കുമെന്നും കേരള കോണ്‍ഗ്രസിലെ 5 എംഎല്‍എമാരും ഈ വിപ്പ് പാലിക്കണമെന്നും ഇല്ലെങ്കില്‍ നിയമനടപടി സ്വീകരിക്കുമെന്നും പി.ജെ. ജോസഫ് പറഞ്ഞു.
പാര്‍ട്ടിയുടെ നിയമസഭാകക്ഷി നേതാവ് താനും ഡപ്യൂട്ടി ലീഡര്‍ സി.എഫ്.തോമസുമാണ്. ഇതു സംബന്ധിച്ച് സ്പീക്കര്‍ക്ക് കത്ത് നല്‍കിയിട്ടുണ്ട്. കെ.എം. മാണിയുടെ കാലത്തെ പാര്‍ട്ടി വിപ്പാണ് റോഷി അഗസ്റ്റിന്‍. ഇപ്പോള്‍ അതു ബാധകമല്ലെന്നും ജോസഫ് പറഞ്ഞു. പാര്‍ട്ടിയുടെ ചീഫ് ഇലക്ഷന്‍ ഏജന്റും പാര്‍ട്ടിയുടെ വിപ്പും താനാണെന്ന് മോന്‍സ് ജോസഫും പറഞ്ഞു. കേരള കോണ്‍ഗ്രസിന്റെ 5 എംഎല്‍എമാരില്‍ 2 പേര്‍ ജോസ് കെ. മാണി വിഭാഗത്തിലും 3 പേര്‍ ജോസഫ് വിഭാഗത്തിലുമാണ്.
https://www.facebook.com/Malayalivartha
