മൂന്നാം നിലയിലെ ബാല്‍ക്കണിയില്‍ നിന്ന് മുറുക്കി തുപ്പുന്നതിനിടെ 11 കെവി ഹൈടെന്‍ഷന്‍ വൈദ്യുതിലൈനില്‍ നിന്ന് ഷോക്കേറ്റ് 65കാരന്‍ മരിച്ചു. മദ്ധ്യപ്രദേശിലെ വിദിഷ ജില്ലയില്‍ ഗഞ്ച്ബസോദയിലെ ഗായത്രി നഗറില്‍ പ്രഭുലാല്‍ ഗുപ്തയാണ് മരിച്ചത്. കഴിഞ്ഞ വെള്ളിയാഴ്ച ഉച്ചയ്ക്ക് ഒരു മണിയോടെ വാടകവീട്ടിലെ മൂന്നാം നിലയിലെ ബാല്‍ക്കണിയിലാണ് അപകടം ഉണ്ടായത്. ഗുട്ക ചവച്ചശേഷം തുപ്പുന്നതിനിടെ ഉമിനീര്‍ സമീപത്തുകൂടി കടന്നുപോകുന്ന വൈദ്യുതിലൈനുമായി സമ്പര്‍ക്കത്തിലായതോടെ ഗുരുതരമായി പൊള്ളലേറ്റെന്നാണ് പ്രദേശവാസികള്‍ പറയുന്നത്.

ഛത്തര്‍പുര്‍ സ്വദേശിയായ പ്രഭുലാല്‍ ഗുപ്ത പത്തുവര്‍ഷമായി ഗായത്രി നഗറിലെ വാടകവീട്ടിലായിരുന്നു താമസം. കെട്ടിടനിര്‍മാണ തൊഴിലാളിയായി ജോലി ചെയ്തുവരികയായിരുന്നു ഇയാള്‍. അപകടത്തെത്തുടര്‍ന്ന് വൈദ്യുതി വകുപ്പിനെതിരെ പ്രദേശവാസികള്‍ പ്രതിഷേധവുമായി രംഗത്തെത്തി.

വീടുകള്‍ക്ക് സമീപം അപകടകരമാംവിധത്തില്‍ ഹൈടെന്‍ഷന്‍ ലൈനുകള്‍ കടന്നുപോകുന്നതിനെ നാട്ടുകാര്‍ രൂക്ഷമായി വിമര്‍ശിച്ചു. ഇത്തരം ലൈനുകള്‍ മാറ്റണമെന്ന് പലതവണ പരാതിപ്പെട്ടിട്ടും അധികൃതര്‍ നടപടി സ്വീകരിച്ചില്ലെന്നാണ് നാട്ടുകാരുടെ ആരോപണം. പ്രദേശത്തെ വൈദ്യുതിത്തൂണുകളുടെയും ലൈനുകളുടെയും വിതരണ ട്രാന്‍സ്‌ഫോര്‍മറുകളുടെയും അവസ്ഥ മോശമാണെന്നും നാട്ടുകാര്‍ ചൂണ്ടിക്കാട്ടി.

ഉമിനീരില്‍ ജലാംശവും ലവണങ്ങളും അടങ്ങിയിട്ടുള്ളതിനാല്‍ ചില സാഹചര്യങ്ങളില്‍ ഇത്തരത്തില്‍ അപകടം സംഭവിക്കാമെന്നാണ് വിദഗ്ധര്‍ ചൂണ്ടിക്കാട്ടുന്നത്. ഇലവന്‍ കെവി പോലെ ഉയര്‍ന്ന വോള്‍ട്ടേജുള്ള വൈദ്യുതിലൈനിന് സമീപത്ത് വൈദ്യുതി വായുവിലൂടെ സഞ്ചരിക്കാനുള്ള സാദ്ധ്യതയുണ്ട്. ശരീരത്തിലൂടെ വൈദ്യുതപ്രവാഹത്തിന് പാതയൊരുങ്ങിയാല്‍ ഗുരുതരമായ പൊള്ളലിനും മരണത്തിനും വരെ കാരണമാകാമെന്നും വിദഗ്ദ്ധര്‍ പറയുന്നു.