ദിവ്യയെ തൊടുന്നോടാ ചാടിയിറങ്ങി ഗോവിന്ദൻ ദിവ്യക്ക് വേണ്ടി കൂട്ടനിലവിളി പാർട്ടി ആപ്പീസിൽ അടി പൊട്ടി
എ.ഡി.എം നവീന്‍ ബാബുവിന്റെ ആത്മഹത്യാ കേസില്‍ പ്രതിയായ മുന്‍ ജില്ലാ പഞ്ചായത്ത് പ്രസിഡന്റ് പി.പി. ദിവ്യയെ പാര്‍ട്ടി ഭാരവാഹിത്വത്തിലേക്ക് തിരിച്ചെടുക്കുന്നതില്‍ സി.പി.എം സംസ്ഥാന നേതൃത്വം നിലപാട് കടുപ്പിക്കുന്നു. ദിവ്യയെ പാര്‍ട്ടി ജില്ലാ കമ്മിറ്റിയിലേക്ക് തിരിച്ചെടുക്കണമെന്ന ചില നേതാക്കളുടെ ആവശ്യം സംസ്ഥാന സെക്രട്ടറി എം.വി. ഗോവിന്ദന്‍ കര്‍ശനമായി എതിര്‍ത്തതായാണ് വിവരം. കേസില്‍ നിരപരാധിത്വം തെളിയിക്കപ്പെടുന്നത് വരെ കടുത്ത തീരുമാനങ്ങളില്‍ മാറ്റമുണ്ടാകില്ലെന്ന ഗോവിന്ദന്റെ നിലപാടാണ് പാര്‍ട്ടിയില്‍ സര്‍വ്വത്ര ശരിയെന്ന ചര്‍ച്ച ഉയര്‍ത്തുന്നത്.
തുടര്‍ച്ചയായ മൂന്നാം ഭരണമെന്ന ഇടത് സ്വപ്നങ്ങള്‍ക്ക് വലിയ തിരിച്ചടിയായ സംഭവങ്ങളില്‍ ഒന്നായിരുന്നു നവീന്‍ ബാബുവിന്റെ ദാരുണമായ മരണം. ഈ വിഷയം പൊതുസമൂഹത്തില്‍ ഉണ്ടാക്കിയ വലിയ പ്രതിഷേധവും ജനവികാരവും പാര്‍ട്ടിക്ക് നല്‍കിയ ആഘാതം ചെറുതല്ല. വരാനിരിക്കുന്ന തിരഞ്ഞെടുപ്പുകളില്‍ ഈ പാപം ചുമക്കേണ്ടി വരുമെന്ന ഭയം പാര്‍ട്ടിക്കുണ്ട്. അതിനാല്‍ തന്നെ ജനങ്ങള്‍ മറക്കാത്ത ഒരു വിഷയത്തില്‍ കുറ്റാരോപിതയായ നേതാവിന് ഇളവ് നല്‍കുന്നത് വന്‍ തിരിച്ചടിയാകുമെന്നാണ് കരുതപ്പെടുന്നത്.
ബ്രാഞ്ച് കമ്മിറ്റിയിലേക്ക് തരംതാഴ്ത്തിയ പാര്‍ട്ടി നടപടി പുനഃപരിശോധിക്കണമെന്ന് ആവശ്യപ്പെട്ട് പി.പി. ദിവ്യ സി.പി.എം കേന്ദ്ര നേതൃത്വത്തിന് പരാതി നല്‍കിയതോടെയാണ് വിഷയം വീണ്ടും ചൂടുപിടിച്ചത്. കത്ത് ലഭിച്ച കാര്യം ജനറല്‍ സെക്രട്ടറി എം.എ. ബേബി സ്ഥിരീകരിക്കുകയും ചെയ്തു. എന്നാല്‍ അന്തിമ തീരുമാനം എടുക്കേണ്ടത് സംസ്ഥാന ഘടകമാണെന്ന നിലപാടില്‍ കേന്ദ്ര നേതൃത്വവും ഉറച്ചുനില്‍ക്കുകയാണ്. കണ്ണൂരില്‍ ചേര്‍ന്ന വിശാല ജില്ലാ കമ്മിറ്റി യോഗത്തില്‍ ദിവ്യയ്ക്കായി മുതിര്‍ന്ന നേതാക്കളായ പി.കെ. ശ്രീമതിയും ഇ.പി. ജയരാജനും രംഗത്തെത്തിയിരുന്നു. നിലവിലുള്ള ഒഴിവുകളിലേക്ക് ദിവ്യയെ പരിഗണിക്കണമെന്ന് ഇരുവരും ആവശ്യപ്പെട്ടെങ്കിലും എം.വി. ഗോവിന്ദന്‍ അത് നിഷ്‌കരുണം തള്ളുകയായിരുന്നു. ജില്ലാ സെക്രട്ടറി കെ.കെ. രാഗേഷിനും ദിവ്യയോട് സഹതാപ നിലപാടാണുള്ളത്.
തരംതാഴ്ത്തലിന് പകരം പാപ്പിനിശ്ശേരി ഏരിയാ കമ്മിറ്റിയുടെ ചുമതല നല്‍കാമെന്ന വാഗ്ദാനം പാര്‍ട്ടി തനിക്ക് നല്‍കിയിരുന്നെന്നും എന്നാല്‍ ദിവ്യ അത് നിരസിക്കുകയായിരുന്നു എന്നുമാണ് പുറത്തുവരുന്ന സൂചനകള്‍. എന്നാല്‍ തനിക്ക് അര്‍ഹമായ പദവികള്‍ തിരികെ വേണമെന്ന ശാഠ്യത്തിലാണ് ദിവ്യ കേന്ദ്ര നേതൃത്വത്തിലേക്ക് വരെ അപ്പീലുമായി പോയത്. ദിവ്യയെ ഇപിയും ശ്രീമതിയും രാഗേഷും അനുകുലിക്കുന്നത് കണ്ണൂര്‍ സിപിഎമ്മില്‍ പുതിയ ചേരിയുടെ സമവാക്യ സൂചനയാണ്.
ജനാധിപത്യ മഹിളാ അസോസിയേഷന്‍ ഭാരവാഹിത്വത്തില്‍ നിന്ന് തന്ന ഒഴിവാക്കിയത് ചില നേതാക്കളുടെ വ്യക്തിപരമായ പകപോക്കലാണെന്ന് ദിവ്യ കേന്ദ്രത്തിന് അയച്ച കത്തില്‍ ആരോപിക്കുന്നു. മറ്റ് പല നേതാക്കള്‍ക്കെതിരെയും കേസുകള്‍ നിലനില്‍ക്കുന്നുണ്ടെങ്കിലും തന്നോട് മാത്രമാണ് പാര്‍ട്ടി വിവേചനം കാണിക്കുന്നതെന്നാണ് ദിവ്യയുടെ പ്രധാന പരാതി. ഫലത്തില്‍ മാസപ്പടി കേസില്‍ പിണറായിയ്‌ക്കെതിരായ നീക്കങ്ങളുടെ പശ്ചാത്തലത്തിലാണ് ദിവ്യയുടെ നീക്കങ്ങള്‍.
https://www.facebook.com/Malayalivartha
